విమాన ప్రమాదం నాటి కొత్త వీడియోలు వెలుగులోకి

అహ్మదాబాద్ విమానాశ్రయం సమీపంలో జరిగిన ఎయిర్ ఇండియా విమాన ప్రమాదం సృష్టించిన విషాదం అంతా ఇంతా కాదు. లండన్ బయలుదేరిన ఈ విమానం టేకాఫ్ అయిన కొద్ది నిమిషాలకే బీజే మెడికల్ కాలేజ్ హాస్టల్‌పై కుప్పకూలడంతో భీకర మంటలు చెలరేగాయి. విమాన శిథిలాలు ఆ చుట్టు పక్కల ప్రాంతాలపై కూడా పడగా.. అనేక మంది ప్రాణాలు కోల్పోయారు. విమానంలో ఉన్న వారే కాకుండా.. స్థానిక ప్రజలు సైతం అసువులు బాశారు. ముఖ్యంగా విమానం కూలిన వెంటనే పెద్ద ఎత్తున మంటలు, పొగలు వ్యాపించాయి. దీంతో హాస్టల్లో ఉన్న అనేక మంది విద్యార్థులు ఈ ప్రమాదం నుంచి తప్పించుకునేందుకు ప్రయత్నించారు. అందుకోసం భవనం పైనుంచి కిందకు దూకేశారు. ప్రస్తుతం ఇందుకు సంబంధించిన వీడియోలు నెట్టింట తెగ వైరల్ అవుతున్నాయి.

బోయింగ్ 787 డ్రీమ్‌లైనర్ విమానం టేకాఫ్ అయిన ఐదు నిమిషాలకే కుప్పకూలిపోయింది. ముఖ్యంగా నిమిషానికి 475 అడుగుల నిలువు వేగంతో కాలేజీ హాస్టల్ మెస్ ప్రాంతంలో కూలిపోయింది. అప్పుడు విమానంలో లక్షా 26 వేల లీటర్ల ఇంధనం ఉండగా.. పెద్ద ఎత్తున మంటలు చెలరేగాయి. ఇంధనం అంతా కాలడంతో మంటలు మరింతగా వ్యాపించాయి. అలాగే పెద్ద ఎత్తున పొగ కూడా నిండుకుపోయింది. సరిగ్గా అదే సమయంలో అక్కడి విద్యార్థులు భోజనం చేస్తున్నారు. ఇలా పెద్ద ఎత్తున ప్రమాదం జరగ్గా.. అందులోని చాలా మంది విద్యార్థులు ప్రాణాలు కోల్పోయారు.

అయితే హాస్టల్‌లోని ఇతర గదుల్లో ఉన్న విద్యార్థులు మాత్రం ఈ ప్రమాదం నుంచి తప్పించుకునేందుకు విపరీతమైన ప్రయత్నాలు చేశారు. ముఖ్యంగా కొందరు విద్యార్థులు అయితే మంటలు చుట్టుముట్టడంతో.. ప్రాణాలు కాపాడుకునేందుకు బాల్కనీల నుంచి కిందకు దూకడం ప్రారంభించారు. మరికొందరేమో తమ వద్ద ఉన్న దుస్తులను తాడులుగా కట్టుకుని కిందకు దిగే ప్రయత్నం చేశారు. ఒకరికొకరు సాయం చేసుకుంటూ ఇలా చకచకా కిందకు దిగేసి.. తమను తాము కాపాడుకున్నారు. ప్రస్తుతం ఇందుకు సంబంధించిన వీడియోలు నెట్టింట తెగ వైరల్ అవుతున్నాయి.

ఇవి చూసిన ప్రతీ ఒక్కరూ ధైర్య, సాహసాలు ప్రదర్శించి మరీ మీరు ప్రమాదం నుంచి తప్పించుకోవడం చాలా బాగుందంటూ కామెంట్లు చేస్తున్నారు. ప్రాణాల మీదకు వస్తే ఎవరైనా సరే ఇలా పరుగులు తీయాల్సిందేనని మరికొందరు చెబుతున్నారు. ఇదిలా ఉండగా.. ఈ భయంకర ప్రమాదంలో విమానంలోని ఒకే ఒక్క ప్రయాణికుడు ప్రాణాలతో బయటపడగా.. మిగతా 241 మంది అక్కడికక్కడే చనిపోయారు. మరోవైపు హాస్టల్ ప్రాంగణంలో కూడా దాదాపు 35 మంది ప్రాణాలు కోల్పోయారు.