నట్లు, బోల్టులు అంటూ కౌంటర్లు,,,,డిప్యూటీ సీఎం, స్టార్ హీరో మధ్య మాటల యుద్ధం

కన్నడనాట సినీ పరిశ్రమకు, డిప్యూటీ సీఎంకు మధ్య చెలరేగిన నట్లు, బోల్టుల వివాదం చల్లారడం లేదు. నట్లు, బోల్టులు అంటూ.. విమర్శ, ప్రతివిమర్శలకు దిగుతున్నారు. గతంలో ప్రభుత్వం ఏర్పాటు చేసిన కార్యక్రమానికి సినీ నటులు ఎవరూ హాజరుకాకపోవడంపై డీకే శివకుమార్ తీవ్ర ఆగ్రహం వ్యక్తం చేశారు. సినీ పరిశ్రమలో నట్లు బోల్టులు లూజ్ అయ్యాయని.. వాటిని తాము టైట్ చేస్తామంటూ డీకే శివకుమార్ ఘాటు వ్యాఖ్యలు చేశారు. అయితే డిప్యూటీ సీఎం వ్యాఖ్యలపై కన్నడ స్టార్ హీరో కిచ్చా సుదీప్ ఇటీవల స్పందించారు. సినీ పరిశ్రమలో అందరికీ నట్లు, బోల్టులు టైట్‌గానే ఉన్నాయని కౌంటర్ ఇచ్చారు. దీంతో కిచ్చా సుదీప్ చేసిన వ్యాఖ్యలపై పరోక్షంగా స్పందించిన డీకే శివకుమార్.. కాలమే సమాధానం చెబుతుందని పేర్కొన్నారు. దీంతో కన్నడనాట రాజకీయాల్లోనే కాకుండా.. సినిమా ఇండస్ట్రీ, ప్రభుత్వం మధ్య కూడా తీవ్ర విబేధాలు తలెత్తినట్లు తెలుస్తోంది.

బెంగళూరు ఇంటర్నేషనల్ ఫిల్మ్ ఫెస్టివల్ కార్యక్రమంలో కన్నడ చిత్ర పరిశ్రమకు చెందిన నటీనటులు ఎవరూ హాజరుకాకపోవడంపై అప్పట్లో డీకే శివకుమార్ తీవ్ర ఆగ్రహం వ్యక్తం చేశారు. 2022లో జరిగిన మేకెదాటు పాదయాత్ర సమయంలో కూడా సినీ ప్రముఖులు ఎవరూ లేరని గుర్తు చేశారు. అయితే దీన్ని ఒక రిక్వెస్ట్ లేదా హెచ్చరికగా భావించండి.. ప్రభుత్వం సహకరించకపోతే ఏ సినిమా షూటింగ్ జరగదు.. ఎవరికి ఎక్కడ నట్లు, బోల్టులు బిగించాలో మాకు తెలుసు అని డీకే శివకుమార్ బహిరంగంగానే మీడియా ముందు సినిమా ఇండస్ట్రీకి హెచ్చరికలు చేయడం తీవ్ర దుమారం రేపాయి.

అయితే సినిమా ఇండస్ట్రీలో నట్లు, బోల్టులు బిగిస్తాం అంటూ డీకే శివకుమార్ చేసిన వ్యాఖ్యలకు నటుడు కిచ్చా సుదీప్ స్పందించారు. డీకే శివకుమార్ అంటే తనకు చాలా గౌరవం ఉందని.. అయితే ఆయన నట్లు, బోల్టులు అనే ముందు కొన్ని నిజాలు తెలుసుకోవాల్సిందని పేర్కొన్నారు. అలా చేసి ఉంటే ఆయనపై మరింత గౌరవం పెరిగేదని పేర్కొన్న సుదీప్.. చిత్ర పరిశ్రమలోని వారి మనోభావాలు దెబ్బతినేవి కావని వెల్లడించారు. చిత్ర పరిశ్రమ చాలా గౌరవందని.. ఎంత గౌరవం ఇస్తామో అంతే తిరిగి వస్తుందని తెలిపారు. డీకే శివకుమార్ దృష్టిలో సినీ ఇండస్ట్రీలోని కొందరికి అహం ఉండవచ్చని.. కానీ అందరికీ లేదని స్పష్టం చేశారు. డీకే శివకుమార్ మీద ఉన్న గౌరవంతోనే తాము అంతా ఈ విషయంపై వెంటనే స్పందించలేదని.. కానీ ఆయన చేసిన ప్రకటన తమను బాధకు గురిచేసిందని సుదీప్ తెలిపారు. డిప్యూటీ సీఎం నోటి నుంచి 'నట్, బోల్ట్' అనే మాట వచ్చిందని.. అయితే సినీ ఇండస్ట్రీలో అందరి నట్లు, బోల్టులు టైట్‌గానే ఉన్నాయని.. తాము శరీరాన్ని అమ్ముకుని బతికే వాళ్లం కాదని సుదీప్ స్పష్టం చేశారు.

అయితే కిచ్చా సుదీప్ చేసిన వ్యాఖ్యలపై డిప్యూటీ సీఎం డీకే శివకుమార్ స్పందించారు. తాను ఎవరికీ సమాధానం చెప్పాలనుకోవడం లేదని.. తాను చెప్పేది ఏమీ లేదని స్పష్టం చేశారు. ఆ వ్యాఖ్యల గురించి తాను మాట్లాడనని.. మీ రికార్డులు, మీ చరిత్రను తీసుకుని ఫిల్మ్ ఛాంబర్‌కు వెళ్లండని.. వారందరికీ తాను సమాధానం చెప్పాల్సిన అవసరం లేదని.. అన్ని ప్రశ్నలకు కాలమే సమాధానం చెబుతుందని డీకే శివకుమార్ తేల్చి చెప్పారు. ప్రస్తుతం డీకే శివకుమార్ వ్యాఖ్యలపై కిచ్చా సుదీప్ స్పందించిన తీరు.. కర్ణాటకలో తీవ్ర చర్చనీయాంశంగా మారింది. ఈ వ్యవహారంపై రానున్న రోజుల్లో ఎలాంటి పరిణామాలు చోటు చేసుకుంటాయో వేచి చూడాలి.