ప్రాణాలకు తెగించి చిరుతతో పోరాటం..: వీడియో వైరల్

ఉత్తర ప్రదేశ్‌లోని లఖింపూర్ ఖేరి జిల్లా జుగ్నుపూర్ ప్రాంతంలో మెడైలాల్ వర్మకు చెందిన ఇటుకల బట్టీలోకి ఒక భారీ చిరుత పులి చొరబడింది. ఎవరూ లేని సమయంలో అక్కడకు వెళ్లిన చిరుత చిమ్నీలో దాక్కుంది. ఈ విషయం ఎవరూ గుర్తించలేదు. ఈక్రమంలోనే అక్కడ పని చేసే వారంతా తమ పనులు తాము చేసుకుంటున్నారు. ఈసమయంలోనే ఒక్కసారిగా చిరుత పులి 35 ఏళ్ల మిహిలాల్ అనే కార్మికుడిపై దూకింది. వెంటనే విషయం గుర్తించిన మిహిలాల్ తన ప్రాణాలు కాపాడుకోవడానికి చిరుతతో పోరాటానికి దిగాడు. చేతికి అందిన వాటితో దాన్ని కొట్టడం ప్రారంభించాడు. ముఖ్యంగా దాని నోటిని మూస్తూ.. ప్రతిదాడి చేశాడు.

ముఖ్యంగా చిరుత పులిని తరిమికొట్టడానికి ఇటుకలు తీస్తూ దానిపైకి విసిరారు. ఇందులో కొన్ని మిహిలాల్ మీద కూడా పడగా.. అదేమీ పట్టించుకోని అతడు.. తనను తాను కాపాడుకోవడానికి పోరాటం చేస్తూనే ఉన్నాడు. చిరుత పులి ఎంతగా దాడి చేస్తున్నా.. తన శక్తిని కోల్పోకుండా.. దానిని నేలకేసి కొట్టాడు. దాని నోరు గట్టిగా మూసి పట్టుకోవడానికి ప్రయత్నించాడు. చాలాసేపు ఈ పోరాటం జరగ్గా.. తీవ్ర గాయాల పాలైన చిరుత అక్కడి నుంచి పారిపోయింది. స్థానికంగా ఉన్న పొలాల వైపు వెళ్లిపోయింది. ఆ సమయంలోనే కొందరు దీన్ని వీడియోగా తీశారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది.

అయితే ఈ దాడిలో కార్మికుడు మిహిలాల్‌కు కూడా స్వల్ప గాయాలు అయ్యాయి. ఈ ఘటన గురించి సమాచారం అందుకున్న ప్రాంతీయ అటవీ అధికారి  నృపేంద్ర చతుర్వేది.. తన సిబ్బందితో పాటు స్థానిక పోలీసులను తీసుకుని వెంటనే సంఘటనా స్థలానికి చేరుకున్నారు. పొలాల్లోకి వెళ్లిన చిరుత పులిని పట్టుకోవడానికి ప్రయత్నించారు. చిరుత పులిని పట్టుకునే క్రమంలో అది ఐదుగురు అటవీ శాఖ సిబ్బందిపై కూడా దాడి చేసి గాయపరిచింది. అయినప్పటికీ.. అటవీ శాఖ అధికారులు చాలా కష్టపడి చిరుతపులికి మత్తు మందు ఇచ్చి పట్టుకున్నారు. గాయపడిన అటవీ సిబ్బందిని మరియు మిహిలాల్‌ను వెంటనే దగ్గరలోని ఆసుపత్రికి తరలించి చికిత్స అందించారు.

ఈ ఘటనతో లఖింపూర్ ఖేరి ప్రాంత ప్రజలు భయాందోళనలకు గురవుతున్నారు. అటవీ ప్రాంతాలు పక్కనే ఉండటంతో చిరుతలు జనావాసాల్లోకి రావడం పట్ల ప్రజలు ఆందోళన వ్యక్తం చేస్తున్నారు. ఇలాంటి సంఘటనలు పునరావృతం కాకుండా అటవీ శాఖ అధికారులు తగిన చర్యలు తీసుకోవాలని, ప్రజలు అప్రమత్తంగా ఉండాలని హెచ్చరించాలని స్థానికులు కోరుతున్నారు. మరోవైపు ఈ వీడియో చూసిన ప్రతీ ఒక్కరూ మహిలాల్ చూపిన ధైర్య సాహసాలకు ఫిదా అవుతున్నారు. పులితో వీరోచిత పోరాటం చేసి నీ ప్రాణాలు కాపాడుకోవడం చాలా గ్రేట్ అంటూ కామెంట్లు చేస్తున్నారు.