ఐరన్ బాక్స్ లేకుండానే ఈ చిట్కాలతో ఇస్త్రీ చేయోచ్చు

వర్షాకాలం వచ్చిందంటే అందరూ ఎదుర్కొనే కామన్ ప్రాబ్లమ్. దుస్తులు సరిగ్గా ఆరకపోవడం. ఇదే చిరాకు అనుకుంటే..ఇక ముడతలు మరింత ఇబ్బంది పెడతాయి. కాసేపు వేసుకుని పక్కన పెట్టినా సరే కొన్ని షర్ట్స్, ప్యాంట్స్ చాలా త్వరగా ముడతలి పడిపోతాయి. ముడతలు వాటిని వేసుకోడానికి మనసు ఒప్పదు. మళ్లీ వాటిని ఐరన్ చేయాల్సి ఉంటుంది. ఇంకొందరు వాటిని కాస్త తడిపి ఆరేసి ఆ తరవాత మళ్లీ ఐరన్ చేస్తారు. కానీ..ఈ వానాకాలంలో అసలు బట్టలు ఆరటానికి చాలా సమయం పడుతుంది. అలాంటప్పుడు ఇలా పదే పదే తడపడం కష్టమే. అయితే..ఈ చికాకులు ఏమీ లేకుండా, అసలు ఐరన్ బాక్స్ అవసరమే లేకుండా ముడతలు పడిన దుస్తులను ఇస్త్రీ చేసుకోవచ్చు. ఆ ముడతలు పోగొట్టి మళ్లీ మామూలుగా మార్చుకోవచ్చు. కాకపోతే ఇందుకోసం కొన్ని చిట్కాలు పాటించాలి. మరి ఆ సింపుల్ టిప్స్ గురించి తెలుసుకుందామా.

ఆవిరితో కూడా దుస్తులను ఇస్త్రీ చేసుకోవచ్చు. ఓ గిన్నెలో నీళ్లు పోసి బాగా మరిగించాలి. అవి అలా మరుగుతుండగానే ఏదైనా ఓ గ్లాస్ జార్ లోకి వాటిని తీసుకోవాలి. ఇలా చేయడం వల్ల ఎక్కువ సేపు నీళ్లు వేడిగా ఉంటాయి. అయితే..ఆ నీళ్ల నుంచి వచ్చే ఆవిరిని దుస్తులకు అంటేలా చూడాలి. అంటే..షర్ట్ ని ఈ ఆవిరిపైన అటూ ఇటూ కదపాలి. ముడతలు ఎక్కువగా ఉన్న చోట కాస్త ఎక్కువ ఆవిరి తగిలేలా చూసుకోవాలి. ఇలా చేసిన తరవాత ఆ దుస్తులను ఆరేయాలి. ఈ చిట్కాతోనూ ముడతలు తగ్గిపోతాయి.

ముడతలు పోగొట్టే లిక్విడ్

ముడతలు పోగొట్టడానికి ప్రతిసారీ ఐరన్ చేయాల్సిన అవసరం లేదు. సింపుల్ గా ఓ లిక్విడ్ తయారు చేసుకుని వాడితే సరిపోతుంది. ఈ లిక్విడ్ ఎలా తయారు చేయాలంటే ముందుగా ఓ స్ప్రే బాటిల్ లో నాలుగు లేదా ఐదు కప్పుల నీళ్లు పోయాలి. అందులో ఫ్యాబ్రిక్ సాఫ్ట్ నర్ లిక్విడ్ ఓ టేబుల్ స్పూన్ మేర పోయాలి. నీళ్లలో ఈ లిక్విడ్ బాగా కలిసేలా షేక్ చేసి పెట్టుకోవాలి. ఈ లిక్విడ్ ని ముడతలు పడిన షర్ట్ లేదా ప్యాంట్ పై చల్లాలి. అలా చల్లిన తరవాత దుస్తులను మడతబెట్టకుండా అలాగే ఉంచాలి. తరవాత ఆరేయాలి. తడి ఆరిపోయిన తరవాత క్రమంగా ముడతలు తగ్గిపోతాయి.

వేడి ప్యాన్ తో

​ఈ చిట్కా పాటించడం కూడా సులభమే. ఇస్త్రీ పెట్టె లేకుండానే చాలా సింపుల్ గా ఐరన్ చేసుకోవచ్చు. అదెలా అంటే ముందుగా షర్ట్ పై ఏదైనా ఓ క్లాథ్ వేయాలి. మరీ పల్చగా కాకుండా, మరీ మందంగా కాకుండా మోస్తరుగా ఉండే క్లాత్ వాడితే మంచిది. స్టవ్ పై ప్యాన్ వేడి చేసి అది వేడిగా ఉండగానే క్లాథ్ పై అటూ ఇటూ ఐరన్ బాక్స్ ని కదిపినట్టుగా కదపాలి. ఇలా చేయడం వల్ల ఆ వేడికి కింద ఉన్న షర్ట్ ముడతలు తగ్గిపోతాయి. అయితే..ఈ చిట్కాని మరో విధంగా కూడా ట్రై చేయొచ్చు. ఓ గిన్నెలో నీళ్లు తీసుకుని బాగా వేడి చేయాలి. హాట్ ప్యాన్ కి బదులుగా ఈ హాట్ వాటర్ ఉన్న గిన్నెని క్లాత్ పై ఉంచితే సరిపోతుంది. ఇదే ఐరన్ బాక్స్ లా పని చేసి ముడతలన్నింటినీ తగ్గిస్తుంది.

హెయిర్ డ్రయర్

ఇక మడతలు పోగొట్టే రెండో చిట్కా ఏంటంటే హెయిర్ డ్రయర్ వినియోగించడం. సాధారణంగా జుట్టు బాగా తడిగా ఉన్నప్పుడు, చాలా త్వరగా ఆరేందుకు హెయిర్ డ్రయర్స్ వాడుతుంటారు. అయితే..కేవలం జుట్టుకే కాకుండా.. ముడతలు పడిన దుస్తులపైనా ఇది చాలా బాగా పని చేస్తుంది. హెయిర్ డ్రయర్ తో ఇస్త్రీ చేసినట్టుగా దుస్తులను మార్చుకోవచ్చు. దీని కోసం ముందుగా ఓ పని చేయాలి. షర్ట్ పై నీళ్లు చల్లాలి.

స్ప్రే బాటిల్ ఉంటే దానితో స్ప్రే చేయడం మంచిది. అలా మొత్తంగా తడిసిన తరవాత ముడతలు ఉన్న చోట చేతులతో కాస్త అద్దుతూ హెయిర్ డ్రయర్ తో హీట్ చేయాలి. ఇలా చేయడం వల్ల సులువుగా ముడతలు తగ్గిపోతాయి. అచ్చం ఇస్త్రీ చేసినట్టే మారిపోతుంది. అయితే..మరీ ఎక్కువ సేపు డ్రయర్ వినియోగించడం మంచిది కాదు. కాస్త వేడి తగిలితే సరిపోతుంది. ఆ మోతాదు చూసుకుని ఆపేస్తే సరిపోతుంది.

హెయిర్ స్ట్రెయిట్ నర్

ఐరన్ బాక్స్ అవసరం లేకుండానే ముడతలు పోగొట్టాలంటే ఓ సింపుల్ చిట్కా పాటించాలి. మీ ఇంట్లో హెయిర్ స్ట్రెయిట్ నర్ ఉంటే చాలు. దాంతోనే చొక్కాలు, ప్యాంట్ లు ఇస్త్రీ చేసుకోవచ్చు. హెయిర్ స్ట్రెయిట్ నర్ హ్యాండిల్ చేయడం చాలా సులభం. సాధారణంగా అయితే..జుట్టుని దాని మధ్యలో ఉంచి చిక్కులు పడిన వెంట్రుకలను సరి చేసుకుంటారు. అచ్చం ఇలాగే దుస్తుల విషయంలో చేయాల్సి ఉంటుంది. బాగా ముడతలు పడిన చొక్కాను ఈ స్ట్రెయిటనర్ మధ్యలో ఉంచి అటూ ఇటూ కదపాలి. అంటే..ఎక్కడైతే ఎక్కువగా ముడతలు ఉన్నాయో అక్కడ ఉంచాలి. ఇలా చేయడం వల్ల చాలా త్వరగా ముడతలు పోతాయి. అయితే..మరీ పల్చగా ఉండే దుస్తులపై మాత్రం ఈ ప్రయోగం చేయకూడదు. హీట్ ఎక్కువైతే కాలిపోయే ప్రమాదం ఉంటుంది.