‘ట్రంప్ ఆ బిల్లు ఆమోదిస్తే.. కొత్త పార్టీ పెడతా’,,,ఎలాన్ మస్క్ సంచలన ప్రకటన..

అమెరికా అధ్యక్షుడు డొనాల్డ్ ట్రంప్, టెస్లా అధినేత ఎలాన్ మస్క్ ఇద్దరూ కూడా అమెరికా ఎన్నికల ముందు వరకు కూడా ప్రాణ స్నేహితులు అన్నట్లుగా కలరింగ్ ఇచ్చారు. ట్రంప్ అధ్యక్ష బాధ్యతలు స్వీకరించిన తర్వాత ఇద్దరి మధ్య విబేధాలు పొడచూతున్నాయి. తాజాగా వీరిద్దరి మధ్య ఉన్న విబేధాలు మరోసారి తెర మీదకు వచ్చాయి. అమెరికా అధ్యక్షుడు డొనాల్డ్ ట్రంప్ ప్రభుత్వం తీసుకొచ్చిన బిగ్ బ్యూటిఫుల్ బిల్లు ఇద్దరి మధ్య విబేధాలను మరింత పెంచుతుంది. ఈ బిల్లును మస్క్ ముందు నుంచి కూడా తీవ్రంగా వ్యతిరేకిస్తున్నారు. ఈక్రమంలో తాజాగా మస్క్ కీలక ప్రకటన చేశారు. ఈ బిల్లు ఆమోదం పొందితే వెంటనే కొత్త పార్టీ పెడతానంటూ మస్క్ హెచ్చిరించారు.

అమెరికా అధ్యక్షుడు ప్రతిపాదించిన ఈ బిల్లు అమెరికన్ల రుణాన్ని మరింత పెంచుతుందని, అందుకే దీన్ని వ్యతిరేకిస్తున్నానని మస్క్ తెలిపారు. అంతేకాకుండా, ఈ బిల్లుకు మద్దతు ఇచ్చే చట్టసభ సభ్యులను పదవుల నుంచి తొలగిస్తానని కూడా మస్క్ హెచ్చరించారు. ఇక తాాజాగా ఈ బిల్లుకు సెనెట్‌లో ఆమోదం లభించింది. దీనిపై మస్క్ ట్విట్టర్ వేదికగా వరుస పోస్టులు పెట్టారు. ఈ బిల్లు సామాజిక సంక్షేమ కార్యక్రమాలను తగ్గిస్తుందని, అమెరికన్ల రుణాన్ని మరింత పెంచుతుందని మస్క్ ఆందోళన వ్యక్తం చేశారు.

ఇదొక పిచ్చి బిలు అని మస్క్ విమర్శలు చేశారు. ఇది రుణ పరిమితిని 5 ట్రిలియన్ డాలర్లకు పెంచుతుందని ఆయన తెలిపారు.ప్రభుత్వాలు ఇలాంటి పనికిమాలిన బిల్లులకు ఆమోదం తెలుపుతున్నాయి. కనుక ప్రజల గురించి ఆలోచించే కొత్త రాజకీయ పార్టీ ఇప్పుడు అవసరమని మస్క్ అభిప్రాయపడ్డారు. ప్రభుత్వ ఖర్చును తగ్గిస్తామని చెప్పిన చట్టసభ సభ్యులు, ఇప్పుడు రుణ భారాన్ని పెంచే బిల్లుకు ఓటు వేసినందుకు సిగ్గుపడాలంటూ మస్క్ ఘాటు వ్యాఖ్యలు చేశారు.

ఈ బిల్లు ఆమోదం పొందితే వెంటనే తను ది అమెరికా పార్టీ అనే కొత్త పార్టీని ప్రారంభిస్తానని మస్క్ హెచ్చరించారు. అమెరికా ప్రజలకు డెమోక్రటిక్, రిపబ్లికన్ పార్టీలకు ప్రత్యామ్నాయం కావాలని మస్క్ చెప్పుకొచ్చారురు. కొత్త పార్టీ ప్రజల గొంతుకగా ఉంటుందని ఆయన స్పష్టం చేశారు. ట్రంప్ టీమ్ గురించి చెబుతూ.. అధికారంలోకి వచ్చే ముందు వరకు కూడా వారుప్రభుత్వ వ్యయాన్ని తగ్గిస్తామని ప్రచారం చేశారు. ఇప్పుడు మాత్రం అమెరికన్ల రుణభారాన్ని పెంచే బిల్లుపై ఓటు వేస్తే సిగ్గుతో తలదించుకోవాల్సి వస్తోంది అని మస్క్ అన్నారు.

అమెరికా అధ్యక్ష ఎన్నికల వేళ.. ఎలాన్ మస్క్‌.. ట్రంప్‌కు మద్దతుగా పెద్ద ఎత్తున ప్రచారం నిర్వహించిన సంగతి తెలిసిందే. ఇక తన గెలుపులో ఎలాన్ మస్క్ కీలక పాత్ర పోషించారని.. ట్రంప్ స్వయంగా ప్రకటించారు వీరిద్దరూ కలిసి మేక్ అమెరికా గ్రేట్ అగైన్ అనే నినాదంతో గత 4, 5 నెలలు కలిసి పని చేశారు కూడా. ట్రంప్ అధ్యక్ష బాధ్యతలు స్వీకరించిన తర్వాత.. మస్క్ డోజ్ నుంచి వైదొలగారు. అలానే ట్రంప్ తీసుకు వచ్చిన బిగ్ బ్యూటిఫుల్ బిల్లును మస్క్ బహిరంగంగానే వ్యతిరేకించారు.