సర్ఫరాజ్..,,2 నెలల్లో 17 కిలోలు తగ్గాడు

టీమిండియా యంగ్ బ్యాటర్ సర్ఫరాజ్ ఖాన్‌.. ఫిట్‌నెస్‌పై దృష్టి సారించాడు. అధిక బరువు, ఫిట్‌నెస్‌ లేకపోవడమనే పరోక్ష కారణాలతో ఇంగ్లాండ్‌తో ఐదు టెస్ట్‌ల సిరీస్‌కు ఎంపిక కాలేకపోయాడు సర్ఫరాజ్. ఈ నేపథ్యంలోనే అతడు తన ఫిట్‌నెస్‌పై ఫోకస్ చేశాడు. తిరిగి టీమిండియాలో చోటు సంపాదించడమే లక్ష్యంగా తీవ్రంగా కసరత్తు చేస్తున్నాడు. ఈ మేరకు కఠిన డైట్, వర్కౌట్స్ చేసి అద్భుత ఫలితాలను అందుకున్నాడు. వారాల వ్యవధిలోనే ఏకంగా 17 కిలోల బరువు తగ్గిపోయాడు.

కొన్ని రోజుల క్రితం సర్ఫరాజ్ ఖాన్ .. బొద్దుగా ఉండేవాడు. ఆస్ట్రేలియాతో టెస్ట్ సిరీస్ సమయంలోనూ అలాగే ఉన్నాడు. అయితే ప్రస్తుతం మాత్రం నమ్మశక్యం కాని విధంగా మారిపోయాడు. కరెంట్ తీగలా సన్నగా మారాడు. 2 నెలల వ్యవధిలోనే ఏకంగా 17 కిలోల బరువు తగ్గిపోయాడు. తాజాగా తన బాడీ ట్రాన్స్‌ఫార్మెషన్‌కు సంబంధించిన ఫొటోలను సర్ఫరాజ్ ఖాన్‌ సోషల్ మీడియా వేదికగా పంచుకున్నాడు. ఈ ఫోటోలను చూసిన నెటిజన్లు షాక్ అవుతున్నారు. ఇతడు సర్పరాజేనా.. అని ఆశ్చర్యపోతున్నారు.

కఠినమైన డైట్, వ్యాయామం..

సన్నగా మారేందుకు అన్నం, గోధుమలతో చేసిన ఆహారాన్ని పూర్తిగా పక్కన పెట్టిన సర్పరాజ్ ఖాన్.. ఉడకబెట్టిన చికెన్, గుడ్లు, కూరగాయాలు మాత్రమే తీసుకున్నట్లు తెలుస్తోంది. తక్కువ మోతాదులో ఆలివ్ ఆయిల్ ఉపయోగించాడట. సర్ఫరాజ్ ఖాన్‌తో పాటు తమ కుటుంబం మొత్తం బరువు తగ్గడంపై ఫోకస్ పెట్టిందని అతని తండ్రి నౌషద్ ఖాన్ ఇటీవల ఓ ఇంటర్వ్యూలో చెప్పారు.

“సర్ఫరాజ్ ఖాన్, ముంబై క్రికెట్ అసోసియేషన్ జిమ్‌లో క్రమం తప్పకుండా జిమ్ చేస్తున్నాడు. రోజు గంట పాటు వారానికి ఆరు రోజులు జిమ్‌కు వెళ్లాడు. ఆ తర్వాత వాకింగ్, స్విమ్మింగ్‌ చేశాడు. గోధుమ పిండి, బియ్యాన్ని పూర్తిగా పక్కనపెట్టాడు. ఉడికించిన చికెన్, గుడ్లు, కూరగాయాలను మాత్రమే తింటున్నాడు. తక్కువ మోతాదులో ఆలివ్ నూనెను ఉపయోగించాడు” అని సర్ఫరాజ్ తండ్రి తెలిపారు.

కాగా 27 ఏళ్ల సర్ఫరాజ్ భారత్‌ తరఫున ఇప్పటివరకు 6 టెస్టులు ఆడి 371 రన్స్‌ చేశాడు. చివరగా గతేడాది నవంబర్‌లో వాంఖడే వేదికగా కివీస్‌తో జరిగిన మ్యాచ్‌లో ఆడాడు. ఆ తర్వాత ఆస్ట్రేలియా సిరీస్‌కు ఎంపికైనా.. తుది జట్టులో అవకాశం రాలేదు. భారత్‌-ఏ తరఫున ఇంగ్లండ్ పర్యటనలో సర్ఫరాజ్ ఖాన్ మెరుగైన ప్రదర్శన చేసినా భారత జట్టులో మాత్రం చోటు దక్కలేదు.