ఒంటిమిట్ట కోదండరామస్వామి ఆలయంలో నిత్యాన్నదానం.. నిధులు కేటాయించిన టీటీడీ

తిరుమల తిరుపతి దేవస్థానం ( టీటీడీ ) మరో కీలక నిర్ణయం తీసుకుంది. తిరుమలలోని అన్నమయ్య భవన్‌లో టీటీడీ ధర్మకర్తల మండలి సమావేశం మంగళవారం జరిగింది. ఈ సమావేశంలో టీటీడీ పాలకమండలి పలు కీలక నిర్ణయాలు తీసుకోగా.. టీటీడీ ఛైర్మన్ బీఆర్ నాయుడు ఈ వివరాలను వెల్లడించారు. ఈ క్రమంలోనే ఒంటిమిట్టలోని కోదండరామస్వామి ఆలయంలో భక్తులకు నిత్యాన్నదానం అమలు చేయాలని నిర్ణయించారు. ఒంటిమిట్టకు వచ్చే భక్తులకు నిరంతరాయంగా అన్నప్రసాదాలు అందజేసేందుకు రూ.4.35 కోట్లు కేటాయింపునకు టీటీడీ పాలకమండలి ఆమోదం తెలిపింది. మరోవైపు ఒంటిమిట్టలో పూర్తిస్థాయి అన్నప్రసాదాల పంపిణీకి టీటీడీ ఇప్పటికే చర్యలు మొదలుపెట్టింది. టీటీడీ ఈవో శ్యామలరావు ఈ విషయమై జూలై నెలలోనే సమీక్షా సమావేశం నిర్వహించారు.

ఒంటమిట్టలో భక్తులకు నిత్యాన్నదానం అమలు చేయాలని సీఎం చంద్రబాబు టీటీడీ అధికారులను ఆదేశించిన సంగతి తెలిసిందే. ఈ నేపథ్యంలో టీటీడీ ఈ అంశం మీద స్పెషల్ ఫోకస్ పెట్టింది. తిరుమల తరహాలో ఒంటిమిట్ట కోదండరామస్వామి ఆలయంలోనూ భక్తులకు అన్నప్రసాదాలు పంపిణీ చేసేందుకు చర్యలు చేపట్టింది. ఆగస్ట్ నెల నుంచి ఈ విధానం అమలు చేయాలని టీటీడీ భావిస్తోంది. ఇందుకోసం ఆలయం వద్ద తాత్కలికంగా జర్మన్ షెడ్స్ ఏర్పాటు చేయనున్నారు. అలాగే ఒంటమిట్టలో అన్నప్రసాదాలు పంపిణీ కోసం అవసరమైన వంటసామాగ్రి, సదుపాయాలు, సిబ్బందిని ఏర్పాటు చేసుకోవాలని టీటీడీ ఇప్పటికే అధికారులను ఆదేశించింది.

మరోవైపు ఏపీలో పలు చారిత్రక వైభవం కలిగిన ఎన్నో పురాతన ఆలయాలు ఉన్నాయి. ఈ నేపథ్యంలో రాష్ట్రంలోని ముఖ్యమైన ఆలయాల్లో నిత్యాన్నదాన పథకం అమలు చేయాలని సీఎం చంద్రబాబు అధికారులను ఇప్పటికే ఆదేశించారు. ప్రస్తుతం తిరుమల, విజయవాడ కనకదుర్గమ్మ ఆలయం, శ్రీశైలం మల్లన్న ఆలయం, సింహాచలం అప్పన్న ఆలయం వంటి చోట్ల మాత్రమే నిత్యాన్నదాన పథకం అమలు చేస్తున్నారు. అయితే వీటితో పాటుగా రాష్ట్రంలోని మరో 16 ప్రధాన ఆలయాల్లోనూ అన్నదానం అమలు చేయాలన్న చంద్రబాబు.. రుచి, నాణ్యత విషయంలో ఎలాంటి రాజీ ఉండకూడదని దేవాదాయశాఖ అధికారులను ఆదేశించారు. ఈ క్రమంలోనే ఆగస్ట్ నుంచి ఒంటిమిట్టలో నిత్యాన్నదానం అమలు చేసేందుకు టీటీడీ చర్యలు చేపడుతోంది.