హరి హర వీరమల్లు సినిమా పైరసీ.. ఐబొమ్మపై ఫిర్యాదు

ఏపీ డిప్యూటీ సీఎం, జనసేనాని పవన్ కళ్యాణ్ నటించిన లేటెస్ట్ మూవీ హరి హర వీరమల్లు సినిమా.. ఈ మధ్యనే ఈ సినిమా విడుదలైంది. పవన్ కళ్యాణ్ డిప్యూటీ సీఎంగా బాధ్యతలు స్వీకరించిన తర్వాత వచ్చిన తొలి సినిమా కావటంతో అటు పవన్ కళ్యాణ్ అభిమానులతో పాటుగా సాధారణ సినీ ప్రేక్షకులు కూడా ఈ సినిమా కోసం ఎంతో ఆసక్తిగా ఎదురుచూశారు. అయితే హరి హర వీరమల్లు సినిమాను ఇప్పుడో సమస్య వేధిస్తోంది. అదే పైరసీ.. హరి హర వీరమల్లు సినిమా రిలీజై మూడు రోజులు కూడా గడవకముందే ప్రింట్, అందుబాటులోకి రావటంతో పవర్ స్టార్ అభిమానులు, సినీ ప్రేమికులు ఆందోళన చెందుతున్నారు. ఈ క్రమంలోనే తిరుపతికి చెందిన జనసేన నేత కిరణ్ రాయల్ పోలీసులకు ఫిర్యాదు చేశారు.

డిప్యూటీ సీఎం పవణ్ కళ్యాణ్ నటించిన హరి హర వీరమల్లు సినిమా పైరసీపై కిరణ్ రాయల్ పోలీస్ స్టేషన్‌లో ఫిర్యాదు చేశారు. తిరుపతి ఈస్ట్ పోలీస్ స్టేషన్‌లో కిరణ్ రాయల్ ఫిర్యాదు చేశారు. Ibomma , Movierulz వంటి కొన్ని వెబ్‌సైట్లలో హరి హర వీరమల్లు సినిమాను ప్రదర్శిస్తున్నారంటూ కిరణ్ రాయల్ ఫిర్యాదు చేశారు. ఈ వెబ్‌సైట్ల మీద చట్టరీత్యా చర్యలు చేపట్టాలని తిరుపతి అర్బన్ డీఎస్పీకి కిరణ్ రాయల్ విజ్ఞప్తి చేశారు. తక్షణమే దీనిపైన చర్యలు చేపట్టి.. ఆయా వె‌బ్‌సైట్ల నుంచి సినిమాలు తొలగించాలని డిమాండ్ చేశారు.

మరోవైపు హరి హర వీరమల్లు సినిమాను విద్యార్థుల కోసం ఉచితంగా ప్రదర్శిస్తున్న సంగతి తెలిసిందే. రాజానగరం జనసేన ఎమ్మెల్యే బత్తుల బలరామకృష్ణ అద్వర్యంలో నియోజవర్గంలోని పలు ప్రాంతాల్లో హరి హర వీరమల్లు సినిమాను ప్రదర్శించనున్నారు. రాజానగరం నియోజకవర్గంలోని మూడు మండలాలలో ఉన్న ప్రభుత్వ పాఠశాలలు, కళాశాలలలో చదివే 9, 10 విద్యార్థులు, ఇంటర్, డిగ్రీ విద్యార్థులకు హరి హర వీరమల్లు సినిమాను ఉచితంగా ప్రదర్శించనున్నారు. మరోవైపు భారతీయ చరిత్ర, సంస్కృతిని నేటి తరం విద్యార్థులకు తెలియజేయాలనే ఉద్దేశంతోనే విద్యార్థులకు ఉచితంగా హరి హర వీరమల్లు సినిమా చూపించబోతున్నట్టు ఎమ్మెల్యే బత్తుల బలరామక‌ృష్ణ తెలిపారు.

ఏపీ భవన్‌లోనూ హరి హర వీరమల్లు షో..

మరోవైపు ఢిల్లీలోని ఏపీ భవన్‌లోనూ రెండు రోజుల పాటు హరి హర వీరమల్లు మూవీని ప్రదర్శించనున్నారు. జులై 26, 27 తేదీలలో ఏపీ భవన్‌లోని అంబేద్కర్ ఆడిటోరియంలో సినిమాను ప్రదర్శించనున్నారు.