అనధికారిక లేఅవుట్లలో ప్లాట్లు కొన్నవారికి గుడ్ న్యూస్

ఏపీలోని పట్టణ, నగరవాసులకు ముఖ్య గమనిక.. రాష్ట్రంలో అనుమతులు లేకుండా వేసిన లేఅవుట్ల క్రమబద్ధీకరణకు ఏపీ ప్రభుత్చం అవకాశం కల్పిస్తోంది. LRS కోసం తాజాగా ఉత్తర్వులు కూడా జారీ చేసింది. అయితే రాజధాని ప్రాంత అభివృద్ధి సంస్థ (సీఆర్డీఏ)కు మాత్రం మినహాయింపు ఇచ్చారు. సీఆర్డీఏ మినహా రాష్ట్రంలోని పట్టణాభివృద్ధి సంస్థలు, నగరపాలక సంస్థలు, పురపాలక సంస్థలలో అనుమతులు లేని లేఅవుట్లను క్రమబద్ధీకరించుకునేందుకు అవకాశం కల్పిస్తున్నారు. లేఅవుట్ రెగ్యులరైజేషన్ స్కీమ్ (LRS) అమలుకు సంబంధించిన మార్గదర్శకాలను ఏపీ ప్రభుత్వం తాజాగా విడుదల చేసింది. ఏపీ పురపాలక, పట్టణాభివృద్ధి శాఖ శనివారం ఈ గైడ్‌లైన్స్ జారీ చేసింది.

LRS Guidelines ప్రకారం 2025 జూన్‌ 30కి ముందు వేసిన లేఔట్లను ఈ పథకం వర్తిస్తుంది. దీని ద్వారా రాష్ట్రంలోని సుమారు 18000 ఎకరాల్లో వేసిన అనధికారిక లేఅవుట్లను క్రమబద్ధీకరించుకునే వీలుందని లెక్కలు చెప్తున్నాయి. ఎల్ఆర్ఎస్ స్కీమ్ కోసం ఆగస్ట్ ఒకటో తేదీ నుంచి పోరట్ల అందుబాటులోకి తేనున్నారు. అలాగే 2014-19 సమయంలో నిర్దేశించిన బేసిక్ ధరలనే ఇప్పుడు కూడా ఎల్ఆర్ఎస్ కోసం అమలు చేయనున్నారు. అయితే ఎల్ఆర్ఎస్‌లో నిర్ణయించిన ధరను.. స్థానిక సబ్ రిజిస్ట్రార్ ధరలతో పోల్చి.. ఏది తక్కువగా ఉంటే దానిని వసూలు చేస్తారు. మరోవైపు ఎల్ఆర్ఎస్ అప్లికేషన్ కోసం 90 రోజులు గడువు ఉండనుంది. అలాగే పదిశాతం ఓపెన్ స్పేస్ లేకపోతే 14 శాతం అదనపు ఛార్జీలు విధిస్తారు.

మరోవైపు 2014-19 మధ్య ఎల్ఆర్ఎస్, బీపీఎస్ తీసుకువచ్చారు. గడువు ముగియడంతో ఆ తర్వాత నిలిపివేశారు. అప్పుడు స్వీకరించిన దరఖాస్తుల్లోఎల్‌ఆర్‌ఎస్‌లో 65 శాతం వరకు పరిష్కారమయ్యాయి. అయితే ఆ తర్వాతి కాలంలో చాలాచోట్ల అక్రమ లేఅవుట్లు, అనధికారిక లేఅవుట్లు వెలిశాయని అధికారులు భావిస్తున్నారు. ఈ సంఖ్య సుమారుగా 20 వేలకు పైగా ఉంటుందని అంచనా. ముఖ్యంగా గుంటూరు, వైఎస్ఆర్ కడప, చిత్తూరు, నెల్లూరు, కృష్ణా, ప్రకాశం, తూర్పుగోదావరి, అనకాపల్లి జిల్లాల్లో అనధికారిక లేఅవుట్‌లు ఎక్కువగా ఉన్నాయని సమాచారం. ఈ నేపథ్యంలో అలాంటిచోట్ల ప్లాట్లు కొన్న వారు ఎల్ఆర్ఎస్ ద్వారా వాటిని క్రమబద్ధీకరించుకోవచ్చని అధికారులు చెప్తున్నారు.