మావోయిస్టుల కోసం వెతికితే బంకర్‌లో భారీగా నోట్ల కట్టలు

ఇటీవలే ఓ ఫారెస్ట్ ఆఫీసర్ ఇంట్లో భారీగా నోట్ల కట్టలు, బంగారం బయటపడి సంచలనం సృష్టించింది. అయితే తాజాగా ఫారెస్టులోనే భారీగా నోట్ల కట్టలు దొరకగా.. పోలీసులు షాక్ అయ్యారు. ముఖ్యంగా మావోయిస్టుల కోసం వెతుక్కుంటూ వెళ్లగా.. బంకర్ లాంటి ఓ ప్రదేశం కనిపించింది. అనుమానం వచ్చిన పోలీసులు దాన్ని తవ్వి చూడగా.. అందులోని కవర్లలో పెద్ద ఎత్తున డబ్బులు కట్టలు కనిపించాయి. వాటిని పూర్తిగా బయటకు తీసిన పోలీసులు లెక్కించగా.. మొత్తంగా రూ. 35 లక్షల వరకు ఉన్నట్లు తెలిసింది.

జార్ఖండ్‌లోని చాయిబాసా అడవుల్లోని సరాందా ప్రాంతంలో భద్రతా దళాలు మావోయిస్టులకు గట్టి ఎదురుదెబ్బ తగిలేలా చేశారు. ముఖ్యంగా అటవీ ప్రాంతంలోని భూగర్భంలో దాచి ఉంచిన రూ. 35 లక్షల నగదును భద్రతా దళాలు స్వాధీనం చేసుకున్నాయి. మావోయిస్టుల ఏరివేత ఆపరేషన్‌లో భాగంగా జార్ఖండ్ జాగ్వార్, సీఆర్పీఎఫ్ దళాలు సంయుక్తంగా ఈ విజయాన్ని సాధించాయి.

పోలీసులు తెలిపిన వివరాల ప్రకారం.. మావోయిస్టుల కోసం వెతుకుతూ వెళ్లగా తమకు బంకర్‌లాంటి ప్రదేశం కనిపించినట్లు చెప్పారు. అనుమానం వచ్చి తవ్వి చూడగా భారీగా నోట్ల కట్టలు కనిపించినట్లు వెల్లడించారు. అవన్నీ ప్లాస్టిక్ కవర్లలో ఉండగా.. నోట్ల కట్టలు మొత్తాన్ని న్యూస్ పేపర్‌తో చుట్టినట్లు ఉందని వివరించారు. మొత్తంగా రూ.34.99లక్షలు ఉన్నట్లు స్పష్టం చేశారు. అయితే ఈ డబ్బులను.. మావోయిస్టులు భద్రతా దళాలపై ల్యాండ్‌మైన్‌లు అమర్చడానికి అవసరమైన పేలుడు పదార్థాలను కొనుగోలు చేయడానికే దాచి ఉంటారని తాము భావిస్తున్నట్లు చెప్పారు. తమకు ఈ డబ్బు దొరకడం వల్ల పేలుడు పదార్థాల కొనుగోళ్లను గణనీయంగా అడ్డుకున్నట్లు స్పష్టం చేశారు.

గతంలో కూడా ఇలాంటి సంఘటనలు చాలానే చోటుచేసుకున్నాయి. ముఖ్యంగా మే నెలలో.. జార్ఖండ్-బీహార్ సరిహద్దులో మావోయిస్టులకు చెందిన రెండు లాకర్లు, భారీ ఎత్తున మందుగుండు సామగ్రిని భద్రతా దళాలు స్వాధీనం చేసుకున్నాయి. ఆ లాకర్లను కూడా మావోయిస్టులు ప్రజల నుంచి బహిరంగంగా వసూలు చేసిన పన్ను (లెవీ) డబ్బును దాచడానికి ఉపయోగించినట్లు భావిస్తున్నారు. ఈ వరుస విజయాలు భద్రతా దళాలు మావోయిస్టుల ఆర్థిక మూలాలను దెబ్బతీయడంలో పటిష్టమైన చర్యలు తీసుకుంటున్నాయని స్పష్టం చేస్తున్నాయి. చాయిబాసా అటవీ ప్రాంతంలో ఈ విజయం, మావోయిస్టుల ప్రాబల్యాన్ని తగ్గించడంలో కీలక పాత్ర పోషిస్తుంది.