జపాన్, అమెరికాలు సునామీ హెచ్చరికలు,,,,,ఎలాంటి ఆస్తి, ప్రాణ నష్టం సంభవించలేదన్న అధికారులు

మన దగ్గర గత కొన్ని రోజులుగా భారీ వరదలు, వర్షాలతో ఇబ్బంది పడుతున్నాం. అలానే అమెరికా , చైనా వంటి దేశాల్లో కూడా భారీ వరదలు సంభవించి పెద్ద సంఖ్యలో ప్రాణనష్టం వాటిల్లుతుంది. ఇదిలా ఉండగా మరి కొన్ని దేశాల్లో భూకంపం వంటి ప్రకృతి విపత్తులు సంభవించి.. ప్రపంచాన్ని భయపెడుతున్నాయి. తాజాగా రష్యాలో 8.7 తీవ్రతతో అతి భారీ భూకంపం సంభవించింది. దీంతో అధికారులు సునామీ హెచ్చరికలు జారీ చేశారు. ఆ వివరాలు..

రష్యాలో అతి భారీ భూకంపం సంభవించింది. దేశంలోని కంచెట్కా ద్వీపకల్పం వెంబడి ఉన్న పసిఫిక్ మహా సముద్రంలో 8.7 తీవ్రతతో అతి శక్తివంతమైన భూకంపం సంభవించింది. దీని గురించి అమెరికా జియోలాజికల్ సర్వే ప్రకటన చేసింది. రష్యాలో వచ్చిన అతి భారీ భూకంపం వల్ల.. హువాయి సహా పసిఫిక్ మహాసముద్ర ప్రాంతాలకు సునామీ హెచ్చరికలు జారీ చేశారు. అలానే అమెరికాలో కూడా సునామీ హెచ్చరికలు చేశారు.

అమెరికా జియోలాజికల్ ప్రకారం.. ఈ భూకంప కేంద్రం.. రష్యాలోని కంచెట్కా ద్వీపకల్పంలోని పెట్రోపావ్లోవ్స్క్ నుంచి తూర్పున 136 కిలోమీటర్లు దూరంలో..19 కిలోమీటర్లు లోతులో ఉందని తెలుస్తోంది. రష్యాలో భూకంపం నేపథ్యంలో అమెరికన్ అధికారులు అలస్కా, హవాయి వంటి ప్రాంతాలకు సునామీ హెచ్చరికలు జారీ చేశారు.

సముద్రంలో సంభవించిన ఈ భూకంపం వల్ల సునామీ వచ్చే ప్రమాదం ఏర్పడిందని అధికారులు వెల్లడించారు. భూకంప ప్రభావం పసిఫిక్ మహాసముద్రంలోని తీరప్రాంతాలపై ఉంటుందని అంచనా వేస్తున్నారు. అయితే భూకంపం వల్ల రష్యా భూభాగంపై ఇప్పటివరకు ఎలాంటి ఆస్తి, ప్రాణ నష్టం వాటిల్లలేదని అధికారులు తెలిపారు.

కానీ 8.7 తీవ్రతతో సంభవించిన అతి భారీ భూకంప ధాటికి తీర ప్రాంతాల వెంబడి ఉన్న నివాస గ‌ృహాలు, ఇతర బిల్డింగ్‌లు కంపించిన దృశ్యాలు సోషల్ మీడియాలో వైరల్ అవుతున్నాయి. కొన్ని ప్రాంతాల్లో 8-10 సెకన్లు, అంతకన్నా ఎక్కువసేపు భూమి కంపించింది. ప్రజలు ప్రాణ భయంతో భవనాల నుంచి బయటకు పరుగులు తీశారు.

నేషనల్ వెదర్ సర్వీస్ జారీ చేసిన సునామీ హెచ్చరిక ప్రకారం, జులై 30 బుధవారం అర్ధరాత్రి 12:30కు తీర ప్రాంత సమీపంలోని పశ్చిమ తీరాన్ని మొదటి సునామీ తరంగాలు తాకే అవకాశం ఉందని అంచనా వేసింది. రష్యాలోని పసిఫిక్ తీరంలో సంభవించిన 8.7 తీవ్రత గల భూకంపం ప్రభావం వల్ల సునామీ తరంగాలు తాకే అవకాశం ఉందని అధికారులు తెలిపారు.

అలానే కాలిఫోర్నియా తీరంలో సునామీ వచ్చే అవకాశం ఉందని.. జులై 30 తెల్లవారుజామున 12:15కి సునామీ తరంగాలు మొదలయ్యే అవకాశం ఉందని.. తీర ప్రాంతాల్లో ఉన్న ప్రజలు.. తదుపరి అప్‌డేట్స్ వచ్చే వరకు అప్రమత్తంగా ఉండాలని నేషనల్ వెదర్ సర్వీస్ ఓ ప్రకటన విడుదల చేసింది.

నేషనల్ వెదర్ సర్వీస్ సునామీ హెచ్చరిక కేంద్రం, సునామీ తరంగాలు వచ్చే సమయానికి సంబంధించిన టైమ్ టేబుల్ విడుదల చేసింది. దీని ప్రకారం, జులై 29 మంగళవారం రాత్రి 11.50 సమయంలో సునామీ తరంగాలు.. కాలిఫోర్నియాలోని ఫోర్ట్ బ్రాగ్ ప్రాంతాన్ని తాకే అవకాశం ఉందని అంచనా వేశారు. అలానే కాలిఫోర్నియా పశ్చిమ తీరంలోని ఇతర ప్రాంతాల్లో కూడా సునామీ తరంగాలు కొనసాగే అవకాశం ఉందంటున్నారు. అలానే బుధవారం తెల్లవారుజామున 1.15 గంటలకు సునామీ తరంగాలు లా జొల్లా, ఓషన్‌సైడ్ ప్రాంతాలను తాకే అవకాశం ఉందని తెలిపారు.

సునామీ తరంగాల అంచనా సమయాలు (స్థానిక కాలమానంలో)..

ఫోర్ట్ బ్రాగ్ – జూలై 29 రాత్రి 11:50 గంటల సమయంలో

క్రెసెంట్ సిటీ – జూలై 29 రాత్రి 11:55 గంటల ప్రాంతంలో

మాంటెరీ – జూలై 30 తెల్లవారుజామున 12:15 గంటల సమయంలో

పోర్ట్ సాన్ లూయిస్ – జూలై 30 తెల్లవారుజామున 12:35 ప్రాంతంలో

సాన్ ఫ్రాన్సిస్కో – జూలై 30 తెల్లవారుజామున 12:40 గంటల సమయంలో

సాంటా బార్బరా – జూలై 30 తెల్లవారుజామున 12:50 గంటలకు

లాస్ ఏంజెల్స్ హార్బర్ – జూలై 30 తెల్లవారుజామున 1:05 ప్రాంతంలో

న్యూపోర్ట్ బీచ్ – జూలై 30 తెల్లవారుజామున 1:10 గంటల సమయంలో

ఓషన్‌సైడ్ – జూలై 30 తెల్లవారుజామున 1:15 గంటల ప్రాంతంలో

లా జొల్లా – జూలై 30 తెల్లవారుజామున 1:15 గంటల సమయంలో తాకే అవకాశం ఉందని అంటున్నారు.

సునామీ తరంగాల నేపథ్యంలో ఆస్తి, ప్రాణ నష్టం సంభవించకుండా చూడటం కోసం తీర ప్రాంతాల్లో ఉన్న ప్రజలు అప్రమత్తంగా ఉండాలని అధికారులు సూచిస్తున్నారు.