ఐటీఆర్ ఫైల్ చేశారా? ఈ చిన్న పని మర్చిపోతే అంతా వృథా..

మదింపు సంవత్సరం 2025-26కు సంబంధించిన ఇన్‌కమ్ ట్యాక్స్ రిటర్న్స్ ఫైలింగ్ సీజన్ కొనసాగుతోంది. ఆదాయపు పన్ను చెల్లించే ఉద్యోగులు, స్వయం ఉపాధి పొందుతున్న వారు, వ్యాపారులు తమ రిటర్నులను ఫైల్ చేస్తున్నారు. ఇన్‌కమ్ ట్యాక్స్ విభాగం గణాంకాల ప్రకారం ఇప్పటి వరకు 2.51 కోట్ల మంది తమ రిటర్నులను దాఖలు చేశారు. అందులో 2.43 కోట్ల రిటర్నులు వెరిఫై చేశారు. ఇంకా 1.13 కోట్ల రిటర్నులు వెరిఫై చేసి ప్రాసెస్ సైతం పూర్తయింది. అయితే, ఇన్‌కమ్ ట్యాక్స్ పోర్టల్‌లో ప్రస్తుతం 13.21 కోట్ల మంది రిజిస్టర్ అయి ఉన్నారు. దాదాపు వారంతా రిటర్నులు ఫైల్ చేసే అవకాశం ఉంది. ఈసారి రిటర్నులు ఫైలింగ్ గడువు సెప్టెంబర్ 15, 2025 వరకు ఇచ్చిన సంగతి తెలిసిందే. గడువు సమీపిస్తున్న క్రమంలో ఫైలింగ్ చేస్తున్న వారు పెరుగుతున్నారు.

మీరు కూడా ఐటీ రిటర్నులు ఫైల్ చేస్తే ఈ విషయాన్ని కచ్చితంగా తెలుసుకోవాలి. ఐటీఆర్ ఫైలింగ్ చేయడంతోనే మీ పని పూర్తి అయినట్లు కాదు. దానిని ఇ-వెరిఫైల్ చేయాల్సి ఉంటుంది. రిటర్నుల దాఖలు ప్రాసెస్ పూర్తి కావాలంటే దానిని వెరిఫై చేయాలి. ఇచ్చిన గడువులోపు మీరు మీ ఐటీఆర్ వెరిఫై చేయకపోతే అంతా వృథా అయిపోతుంది. మీ ఐటీఆర్ ఇన్‌వాలిడ్‌గా పరిగణిస్తారు. అసలు ప్రాసెస్ చేయరు, మీకు రీఫండ్ రాదు. అయితే, ఐటీఆర్ వెరిఫై చేసేందుకు ఇ-వెరిఫికేషన్ అనేది చాలా సులభమైన విధానంగా చెప్పవచ్చు.

ఎన్ని రోజుల్లో పూర్తి చేయాలి?

మీరు ఐటీ రిటర్నులు దాఖలు చేసిన తర్వాత వెరిఫికేషన్ పూర్తి చేసేందుకు 30 రోజుల సమయం ఉంటుంది. అంటే మీరు ఐటీఆర్ ఫైల్ చేసిన రోజు నుంచి సరిగ్గా 30 రోజుల్లోగా ఇ-వెరిఫికేషన్ పూర్తి చేయాలి. ఈ 30 రోజుల్లోగా మీరు మీ ఐటీఆర్ వెరిఫై చేయకపోతే దానిని ఇన్‌వాలిడ్‌గా పరిగణిస్తారు. 30 రోజుల్లోగా ఐటీఆర్-వీ సబ్మిట్ చేసినట్లయితే మీరు ఒరిజినల్‌గా సబ్మిట్ చేసిన రోజును పరిగణనలోకి తీసుకుంటారు. ఒక వేళ మీరు 30 రోజులు దాటిన తర్వాత వెరిఫై చేసినట్లయితే అదే తేదీని మీరు ఐటీఆర్ ఫైల్ చేసినట్లుగా చూస్తారు. దీంతో మీరు ఆలస్యంగా ఐటీఆర్ ఫైల్ చేసినట్లు అవుతుంది. అలా చేయడం ద్వారా వచ్చే పర్యావసనాలను ఎదుర్కోవలసి వస్తుంది. ఒక వేళ మీరు వెరిఫై చేసే వరకు గడువు ఉంటే ఇబ్బంది లేదు కానీ, గడువు అయిపోతే మాత్రం పెనాల్టీలు, వడ్డీ వంటివి పడతాయి.

ఎన్ని విధాలుగా వెరిఫై చేయవచ్చు?

మీరు ఆన్‌లైన్ ద్వారా ఇ-వెరిఫై చేయవచ్చు. అందుకు ఆధార్ రిజిస్టర్డ్ మొబైల్ నంబర్ ఉపయోగించి ఓటీపీ ద్వారా పూర్తి చేయవచ్చు. లేదా మీ ప్రీ వాలిడేటెడ్ బ్యాంక్ అకౌంట్ ద్వారా ఎలక్ట్రానిక్ వెరిఫికేషన్ కోడ్ జనరేట్ చేసి చేయవచ్చు. లేదా మీ ప్రీ వాలిడేటెడ్ డీమ్యాట్ అకౌంట్ లేదా ఏటీఎం, నెట్ బ్యాంకింగ్, డిజిటల్ సిగ్నేచర్ సర్టిఫికెట్ ద్వారా ఈవీసీ జనరేట్ చేసి వెరిఫికేషన్ పూర్తి చేయవచ్చు.