మ్యూచువల్ ఫండ్ కొత్త పథకాల్లో ఇన్వెస్ట్ చేస్తున్నారా? ఈ విషయాలు ముందే తెలుసుకోండి

రిస్క్ ఉన్నా హైరిటర్న్స్ కోరుకునే వారిలో చాలా మంది మ్యూచువల్ ఫండ్స్ ఎంచుకుంటున్నారు. ప్రతి నెల కోట్లాది రూపాయలు ఇన్వెస్ట్ చేస్తున్నారు. మార్కెట్లో లాంచ్ అయ్యేందుకు సిద్ధంగా ఉన్న కొత్త ఫండ్లలో పెట్టుబడి పెట్టేందుకు ప్రత్యేకమైన అవకాశాన్ని కల్పిస్తాయి అసెట్ మేనేజ్మెంట్ కంపెనీలు. తక్కువ ధరకే అందిస్తాయి. దీర్ఘకాలంలో అధిక రాబడులు అందించేందుకు మార్కెట్ పరిస్థితులకు అనుగుణంగా ఈ న్యూ ఫండ్ ఆఫర్ స్కీమ్స్ తీసుకొస్తున్నట్లు చెబుతాయి. దీంతో చాలా మంది పెట్టుబడిదారులు వీటిని మంచి పెట్టుబడి ఎంపికగా పరిగణిస్తారు. అయితే సాధారణ ఫండ్ల లా కాకుండా కొత్త ఫండ్లు పని తీరు అంచనా వేయడానికి ట్రాక్ రికార్డ్ ఉండదు. కాబట్టి కొత్త పథకాల్లో ఇన్వెస్ట్ చేయడం మంచి నిర్ణయమేనా అని ఓసారి ప్రశ్నించుకోవాలి.

ప్రస్తుతం మార్కెట్ అనేక న్యూ ఫండ్ ఆఫర్లతో నిండి ఉంది. దీంతో పెట్టుబడిదారులు ఎలాంటి కొత్త ఫండ్ ఎంపిక చేసుకోవాలో గందరగోళంలో ఉన్నారని చెప్పవచ్చు. అందువల్ల వీటిలో పెట్టుబడి పెట్టే ముందే కొన్ని విషయాలు తెలుసుకోవాలి. ఏఎంసీలు కొత్తగా నిధిని ప్రారంభించడాన్ని న్యూ ఫండ్ ఆఫర్ ( ఎన్ఎఫ్ఓ ) అంటారు. ఈ స్కీమ్ సబ్‌స్క్రిప్షన్ పరిమిత కాలం వరకే ఉంటుంది. స్థిరమైన ధరకు ఫండ్ యూనిట్లు కొనుగోలు చేయవచ్చు. వీటి ద్వారా మార్కెట్లో కొత్తగా లాంచ్ అవుతోన్న పథకంలో పాల్గొనేందుకు అవకాశం లభిస్తుంది. పెట్టుబడిదారుల నుంచి డబ్బును సేకరించి స్టాక్స్, బాండ్లలో ఇన్వెస్ట్ చేస్తుంది.

ఓపెన్ ఎండెడ్ ఎన్ఎఫ్ఓలో యూనిట్లు ఆఫర్ కాలంలో సబ్‌స్క్రిప్షన్‌కు అందుబాటులో ఉంటాయి. ఆ తర్వాత కూడా ఓపెన్ మార్కెట్ నుంచి ఎప్పుడైనా కొనుగోలు చేయవచ్చు, విక్రయించవచ్చు. అయితే, క్లోజ్ ఎండెడ్ ఫండ్లు స్థిర టెన్యూర్ తో వస్తాయి. పెట్టుబడి టెన్యూర్ ముగిసే వరకు వాటిని రిడీం చేయడానికి ఉండదు. ఇందులో టెన్యూర్ 3 ఏళ్ల నుంచి 5 ఏళ్లు ఆపైన ఉంటుంది. ఎన్ఎఫ్ఓ సబ్‌స్క్రిప్షన్ కనీస మొత్తం రూ.500 నుంచి రూ.5000 వరకు ఉంటుంది.

స్టాక్ మార్కెట్ ఐపీఓలకు మ్యూచువల్ ఫండ్ ఎన్ఎఫ్ఓలకు దగ్గరి పోలికలు ఉన్నా వ్యత్యాసాలు ఉంటాయి. లిస్టింగ్ తర్వాత ఐపీఓల నుంచి నిష్క్రమించి లాభం పొందవచ్చు. అయితే ఎన్ఎఫ్ఓలు అలాంటి ప్రారంభ లాభాలు అందించవు. మ్యూచువల్ ఫండ్ ఎన్ఎఫ్ఓ అంటే దీర్ఘకాలంలో లాభాన్ని అందిస్తుంటాయి. వీటిల్లో ఇన్వెస్ట్ చేసే ముందు ఫండ్ హౌస్‌ గురించి తెలుసుకోవాలి. గొప్ప చారిత్రామక పని తీరు, రికార్డు కలిగి ఉన్న ఫండ్ హౌస్ పెట్టుబడిదారులను ఆకర్షిస్తుంది. ఫండ్ హౌస్ గత చరిత్ర, రాబడులను పరిగణనలోకి తీసుకోవాలి. పథకంతో సంబంధం ఉన్న ఖర్చులను పరిశీలించాకే ఎన్ఎఫ్ఓలో ఇన్వెస్ట్ చేయాలి. తక్కువ వ్యయ నిష్పత్తి ఉన్న పథకంలో ఇన్వెస్ట్ చేయడం మంచిదని నిపుణులు చెబుతున్నారు.

పెట్టుబడి పెట్టే ముందే స్కీమ్ ఇన్ఫర్మేషన్ డాక్యుమెంట్ చూడాలి. మీ లక్ష్యాలకు సరిపోతుందో లేదో తేల్చుకునేందుకు ఫండ్ రిస్క్ ప్రొఫైల్ చూడాలి. మీ రిస్క్ సామర్థ్యంతో సరిపోలితే ఎంచుకోవచ్చు. ఎన్ఎఫ్ఓ థీమ్ తనిఖీ చేయాలి. మూలధన పెరుగుదల, పెట్టుబడి, వృద్ధి ప్రయోజనాలపై ఎన్ఎఫ్ఓలు ఆధారపడి ఉంటాయి. ఎన్ఎఫ్ఓ థీమ్ అనేది మీ ప్రయోజనాలతో సరిపోలితే ఎంచుకోవచ్చు. వీటితో పాటు ఫండ్ మేనేజర్ వివరాలూ కచ్చితంగా తనిఖీ చేయాలి. అనుభవం, నైపుణ్యం గురించి తెలుసుకోవాలి. ఎన్ఎఫ్ఓ థీమ్‌తో ఇప్పటికే వేరే ఫండులో ఇన్వెస్ట్ చేస్తూ ఉంటే కొత్తగా ఎంచుకోవడం సరికాదు.