ఈ కార్లపై రూ.2.30 లక్షలు తగ్గింపు.. ఆఫర్ కొద్ది రోజులు మాత్రమే

కొత్త కారు కొనుగోలు చేయాలనుకునే వారికి ప్రస్తుతం చాలా కంపెనీల కార్లు అందుబాటులో ఉన్నాయి. అయితే తమకు కావాల్సిన ఫీచర్లతో తక్కువ ధరలో లభించే కార్లను ఎంచుకోవడం తెలివైన నిర్ణయంగా చెప్పవచ్చు. అలా మీరు కూడా మంచి ప్రీమియం కారును తక్కువ ధరకు కొనుగోలు చేయాలనుకుంటుంటే ప్రస్తుతం మంచి ఆఫర్ అందుబాటులో ఉంది. ప్రముఖ కార్ల తయారీ సంస్థ జేఎన్‌డబ్ల్యూ ఎంజీ మోటార్ భారీ డిస్కౌంట్ ఆఫర్ తీసుకొచ్చింది. భారత్ మార్కెట్లోకి అడుగుపెట్టి ఆరు సంవత్సరాలు పూర్తి చేసుకున్న క్రమంలో తమ కంపెనీకి చెందిన హెక్టార్, హెక్టార్ ప్లస్ మోడల్ కార్లపై డిస్కౌంట్ ప్రకటించింది. గరిష్ఠంగా రూ.2.30 లక్షల వరకు రాయితీలు కల్పిస్తోంది. ఇది పరిమిత కాల ఆఫర్‌గా కంపెనీ పేర్కొంది.

2019లో భారత మార్కెట్లోకి ఎంజీ హెక్టార్ అడుగుపెట్టింది. దేశంలో తొలి ఇంటర్నెట్ కనెక్టెడ్ ఎస్‌యూవీగా ఎంజీ హెకార్ట్ కారు నిలిచింది. డ్యూయల్ పేన్ పనోరమిక్ సన్ రూఫ్, 14 ఇంచుల హెడ్‌డీ టచ్ స్క్రీన్ ఇన్ఫోటైన్‌మెంట్ సిస్టమ్, 70కి పైగా కనెక్టెడ్ ఫీచర్లు, అధునాత ADAS భద్రతా వ్యవస్థలు ఈ కారులో ఉన్నాయి. ఇలాంటి ప్రీమియం ఫీచర్లు కలిగిన కార్లపై గణనీయమైన తగ్గింపులు ప్రకటించింది కంపెనీ. షార్ప్ ప్రో 1.5 పెట్రోల్ ఎంఎన్‌టీ వేరియంట్ కారుపై రూ.2.14 లక్షల వరకు డిస్కౌంట్ కల్పిస్తోంది. ఈ ఆఫర్ సమయంలో ఈ కారును రూ.19 లక్షలు (ఎక్స్ షోరూమ్) ధరకే కొనుగోలు చేయవచ్చు. ఇక బేస్ వేరియంట్ అయిన స్టైల్ ట్రిమ్ కారు ధరను రూ.25 వేలు పెంచడం గమనార్హం.

 ఎంజీ మోటార్ హెక్టార్ ప్లస్ ఎస్‌యూవీ కారు విషయానికి వస్తే 6 సీటర్ వేరియంట్లన్నింటి ధరలు తగ్గించారు. షార్ప్ ప్రో 1.5 పెట్రోల్ ఎంఎన్‌టీ వేరియంట్ కారు ధరపై గరిష్ఠంగా రూ.2.30 లక్షల మేర డిస్కౌంట్ ప్రకటించింది కంపెనీ. హెక్టార్ ప్లస్ 7 సీటర్ ఎస్‌యూవీ కారులోనూ, షార్ప్ 1.5 పెట్రోల్ వేరియంట్లోనూ ఏకంగా రూ.2.30 లక్షల వరకు డిస్కౌంట్ ఇస్తోంది. సెలెక్ట్ ప్రో, షార్ప్ ప్రో, స్నోస్టార్మ్, బ్లాక్ స్టార్మ్, సావీ ప్రో వంటి ట్రిమ్స్ కార్లపై రూ.2 లక్షల వరకు తగ్గింపు ఇస్తున్నారు. ఈ డిస్కౌంట్లు పరిమిత కాలం పాటు అందుబాటులో ఉంటాయని కంపెనీ వెల్లడించింది. అయితే, ఎప్పటి వరకు అందుబాటులో ఉంటాయనే విషయాన్ని తెలపలేదు. మార్కెట్ విశ్లేషకుల ప్రకారం అయితే ఈనెలాఖరు వరకు డిస్కౌంట్ కల్పించే అవకాశాలు ఉన్నాయని అంచనా వేస్తున్నారు.