రెండు వారాలు రోజుకో ఉసిరి కాయ తింటే మీ శరీరంలో జరిగే మార్పులేంటో తెలుసా

ఉసిరి ఆరోగ్యానికి చేసే మేలు అంతా ఇంతా కాదు. ప్రతి రోజూ ఉసిరి తింటే ఆరోగ్యానికి ఎంతో మేలు జరుగుతుందని న్యూట్రిషనిస్ట్ సోనియా నారంగ్ చెప్పారు. ఆమె ప్రకారం ఉసిరి వల్ల కలిగే లాభాలేంటి, ఎలా తినాలో ఇప్పుడు చుద్దాం.

ఉసిరి ఆరోగ్య సిరి

ఉసిరి కాయ వర్షాకాలం సీజన్‌లో ఎక్కువగా దొరుకుతుంది. ఉసిరి పోషకాల గని. అనేక మంది నిపుణులు దీనిని సూపర్ ఫుడ్‌గా అభివర్ణిస్తారు. ఉసిరిలో పుష్కలంగా విటమిన్ సి అలాగే యాంటీఆక్సిడెంట్లు, ఫైబర్, అనేక ఇతర ముఖ్యమైన పోషకాలు ఆరోగ్యానికి ఎంతో మేలు చేస్తాయి. అందుకే ఆరోగ్య నిపుణులు ప్రతిరోజూ ఒక ఉసిరి తినాలని సిఫార్సు చేస్తున్నారు. ప్రముఖ పోషకాహార నిపుణురాలు సోనియా నారంగ్ తన ఇన్‌స్టాలో ఒక వీడియో షేర్ చేశారు. ఇందులో రెండు వారాల పాటు ఉసిరి తినడం వల్ల కలిగే లాభాలేంటో చెప్పారు. అంతేకాకుండా ఎలా తీసుకోవాలో కూడా వివరించారు. ఆ పూర్తి వివరాలు తెలుసుకుందాం.

జుట్టు రాలడం తగ్గుతుంది

ఈ రోజుల్లో చాలా మంది జుట్టు రాలే సమస్యలతో బాధపడుతున్నారు. అలాంటి వారికి ఉసిరి బెస్ట్ ఫుడ్. ఇందులో విటమిన్ సి పుష్కలంగా ఉంటుంది. ఇది శరీరంలో కొల్లాజెన్ ఉత్పత్తిని పెంచుతుంది. కొల్లాజెన్ మన జుట్టు మూలాల్ని బలపరుస్తుంది. దీని వల్ల జుట్టు రాలే సమస్య క్రమంగా తగ్గుతుందని పోషకాహార నిపుణులు అంటున్నారు.

చర్మంలో మెరుపు వస్తుంది

కొల్లాజెన్ పెరిగినప్పుడు.. చర్మం బిగుతుగా, ఆరోగ్యంగా కనిపిస్తుంది. ఉసిరి కాయ తినడం వల్ల చర్మం లోపలి నుంచి శుభ్రపడుతుంది. ఇది ముఖానికి సహజమైన మెరుపును ఇస్తుంది. చర్మంపై ముడతలు తగ్గిస్తుంది. మిమ్మల్ని యంగ్‌గా కనిపించేలా చేస్తుంది. ముఖం మీద మొటిమలు ఉన్నవారికి ఇది మేలు చేస్తుంది. దీని డీటాక్స్ లక్షణం చర్మాన్ని శుభ్రపరుస్తుంది. బ్యాక్టీరియాతో పోరాడుతుంది. దీంతో, మొటిమల సమస్య తగ్గుతుంది.

బరువు తగ్గవచ్చు

ఉదయం ఖాళీ కడుపుతో ఉసిరి రసం తాగడం వల్ల బరువు తగ్గడమే కాకుండా.. మొత్తం ఆరోగ్యం కూడా మెరుగుపడుతుంది. ఉసిరిలో ఉండే ఫైబర్ జీర్ణవ్యవస్థను ఆరోగ్యంగా ఉంచుతుంది. మిమ్మల్ని ఎక్కువసేపు కడుపు నిండి ఉండేలా చేస్తుంది. దీంతో, మీ ఆకలి నియంత్రణలో ఉంటుంది. అంతేకాకుండా, ఉసిరిలో ఉండే యాంటీఆక్సిడెంట్లు శరీరాన్ని ఫ్రీ రాడికల్స్ నష్టం నుంచి రక్షిస్తాయి.

మోకాళ్ల, కీళ్ల నొప్పులు తగ్గుతాయి

ఉసిరిలో యాంటీ ఇన్ఫ్లమేటరీ ఎలిమెంట్స్, విటమిన్ సి పుష్కలంగా లభిస్తుంది. ఇది శరీరంలో మంటను తగ్గిస్తుంది అంటే ఇన్ఫ్లమేషన్ లెవల్స్ తగ్గిస్తుంది. దీంతో కీళ్ల నొప్పులు, ముఖ్యంగా మోకాళ్ల నొప్పుల నుంచి ఉపశమనం లభిస్తుందని నిపుణులు చెబుతున్నారు.

రక్తంలో షుగర్ లెవల్స్ కంట్రోల్

ఉసిరిలో ఉండే యాంటీఆక్సిడెంట్లు, యాంటీ ఇన్ఫ్లమేటరీ లక్షణాలు ఇన్సులిన్ సెన్సిటివిటీని పెంచడమే కాకుండా శరీరంలో మంటను కూడా తగ్గిస్తాయి. అంతేకాకుండా ఉసిరిలో ఉండే క్రోమియం శరీరానికి అవసరమైన పోషకం. ఇది రక్తంలో చక్కెరను నియంత్రించడంలో ముఖ్యమైన పాత్ర పోషిస్తుంది. ప్రతిరోజూ దీనిని తీసుకోవడం వల్ల రక్తంలో షుగర్ లెవల్స్ అదుపులో ఉంటాయి.

రోగనిరోధక శక్తి పెరుగుతుంది

ప్రతి రోజూ ఉసిరి తీసుకోవడం వల్ల ఇమ్యూనిటీ పవర్ పెరుగుతుంది. ఉసిరిలో విటమిన్-సి, యాంటీఆక్సిడెంట్లు పుష్కలంగా ఉంటాయి. ఇవి మీ శరీరం ఇన్ఫెక్షన్లతో పోరాడటానికి సాయపడతాయి. ఈ మీ రోగనిరోధక శక్తిని బలోపేతం చేస్తాయి. దీంతో, సీజనల్ వ్యాధులతో పోరాడే శక్తి మీకు వస్తుంది.

జీర్ణక్రియ మెరుగుపడుతుంది

ఉసిరిలో ఉండే ఫైబర్ జీర్ణవ్యవస్థను బలపరుస్తుంది. ఇది మలబద్ధకం, గ్యాస్, అజీర్ణం, ఎసిడిటీ వంటి సమస్యలను వదిలించుకోవడానికి సాయపడుతుంది. ప్రతి రోజూ ఉసిరి తీసుకోవడం వల్ల మీ జీర్ణ క్రియ మెరుగుపడుతుంది. దీంతో, జీర్ణ సమస్యలకు చెక్ పెట్టవచ్చని నిపుణులు అంటున్నారు.

ఎలా తీసుకోవాలి?

న్యూట్రిషనిస్ట్ ప్రకారం ఉసిరిని నేరు తినవచ్చు. ఇంకా మెరుగైన ప్రయోజనాలు అందాలంటే ఉసిరి రసం తాగవచ్చు. ఈ రెండింటిని కూడా ఉదయం ఖాళీ కడుపుతో తీసుకోవాలి. దీంతో, దాని ప్రభావం మెరుగ్గా ఉంటుంది. అయితే, ఏదైనా ఆరోగ్య సమస్యలతో బాధపడేవారు ఉసిరి తినే ముందు వైద్యుణ్ని సంప్రదించడం మేలు.