విమానాల్లో 13 నంబర్ సీటు ఎందుకు ఉండదు

"నక్కతోక తొక్కి వచ్చినట్లు ఉన్నాడు.." అని అంటుంటారు చాలా మంది. అదృష్టవంతుడు అని చెప్పడానికి ఈ సామెతను వాడతారు. 1998లో థాయ్ ఎయిర్‌వేస్ విమానం ప్రమాదానికి గురికాగా 101 మంది చనిపోయారు. కానీ, 11A సీటులో కూర్చున్న థాయ్ నటుడు, సింగర్.. జేమ్స్ రుయాంక్సాక్ లోచుసక్ అదృష్టవశాత్తు ప్రాణాలతో బయటపడ్డాడు. ఇటీవల జరిగిన అహ్మదాబాద్ ఎయిర్ ఇండియా విమాన ప్రమాదంలో అందులో ఉన్నవారందరూ మరణించారు.. ఒక్క 11A సీటులో కూర్చున్న రమేశ్‌ తప్ప. అదృష్టమే అతడిని కాపాడిందని చెప్పాలి. అప్పటినుంచి ఈ సీటులో కూర్చుంటే అదృష్టం వరిస్తుందని భావిస్తున్నారు. అందుకే ఈ సీటుకు డిమాండ్ బాగా పెరిగింది. అయితే, దీనికి విరుద్ధంగా కొన్ని నంబర్ల సీట్లను ప్రయాణికులు దురదృష్టంగా భావిస్తారు. విమానంలో 13వ నంబర్ సీటు ఉండదని తెలుసా..? దీని వెనుక ఉన్న నేపథ్యం ఏంటి? వివరాలు. చాలా విమానాల్లో 13వ నంబర్ సీట్ ఉండదు. 12వ నంబర్ సీటు తర్వాత నేరుగా 14వ సీటు ఉంటుంది. మరి కొన్ని విమానాల్లో 17వ నంబర్ సీటు కూడా కనిపించదు. విమానాల్లో ప్రయాణించే సమయంలోచాలా మంది ఈ విషయాన్ని గమనించి ఉంటారు..!

చాలా మందికి ప్రయాణాలంటే తెలియని భయాలు, యాంక్సైటీ ఉంటుంది. ఇంకొంత మందికి కంఫర్ట్‌గా అనిపించదు. మరి కొంత మందికి అనేక రకాల నమ్మకాలు, విశ్వాసాలు ఉండటంతో.. ఈ 13వ నంబర్‌ను దురదృష్టంగా భావిస్తారు. అలాంటి వారికి ఇబ్బంది కలిగించకూడదని విమానయాన సంస్థలు ఇలాంటి నిర్ణయాలు తీసుకున్నాయి. విమాన తయారీ కంపెనీలు కూడా.. తమ సీటింగ్ చార్టుల్లో 13 నంబర్‌ను విడిచిపెడతాయట.

కొన్ని ప్రాంతాల్లో 13న వంబర్ సీటు అంటే వణికిపోతారు. దీనికి ట్రిస్కైడేకఫోబియా అనే పేరు కూడా పెట్టారండోయ్. యూరో వార్తా సంస్థ చెప్పిన వివరాల ప్రకారం.. ఈ నమ్మకం గురించి 1911లో ఓ అమెరికా సైకాలిజీ జర్నల్‌లో రాశారట. అంతేకాకుండా కొన్ని జానపద కథలు, చారిత్రక సంప్రదాయాలు, మత విశ్వాసాల ప్రకారం కూడా ఈ నంబర్‌ను చెడుగా భావిస్తారట.

నార్సే మైతాలజీ, సంప్రదాయాల ప్రకారం 12వ నంబర్.. 12 నెలలు, 12 రాశులను ప్రతిబింబిస్తుంది. కానీ, 13వ నంబర్‌ను అనవసరంగా భావిస్తారు. అంతేకాకుండా 13వ అతిథిగా 'లోకి' వచ్చి విధ్వంసం సృష్టించాడని.. అందుకే ఆ నంబర్‌ను దురదృష్టంగా భావిస్తారు. క్రిస్టియన్ మైథాలజీ ప్రకారం.. లాస్ట్ సప్పర్‌లో 13 మంది ఉంటారు. అందుకే చాలా విమానయాన సంస్థలు ప్రజల విశ్వాసాల ప్రకారం.. విమానాల్లో సీట్లకు 13వ నంబర్‌ను కేటాయించవు. దీంతో ప్రయాణికుల మనోభావాలు దెబ్బతినవని వారి నమ్మకం. ఇక ప్యాసింజర్లకు కూడా 13వ నంబర్ సీటు లేకపోతే కంఫర్ట్‌గా ఫీల్ అవుతారట.

17వ నంబర్ కూడా..

బ్రెజిల్‌ లాంటి దేశాల్లో 17వ నంబర్‌ను కూడా దురదృష్టంగా భావిస్తారు. ఎందుకంటే రోమన్ నంబర్లలో 17ను XVII అని రాస్తారు. అయితే దాన్ని రీ-అరేంజ్ చేసినప్పుడు.. VIXI అని వస్తుంది. లాటిన్‌లో VIXI అంటే "నేను బతికి ఉండేవాణ్ని (I have lived)", "నా జీవితం అయిపోయింది" అని అర్థం వస్తుంది. అందుకే ఈ నంబర్‌ను ఇటలీ, బ్రెజిల్‌తో పాటు యూరప్‌లోని పలు దేశాల్లో దురదృష్టంగా భావిస్తారు.

ఏయే విమానయాన సంస్థలు ఇది పాటిస్తున్నాయి..

వివిధ ప్రాంతాల్లో.. పలు ప్రధాన విమానయాన సంస్థలు తమ విమానాలలో 13వ సీటు వరుసను దాటవేస్తున్నాయి. సింప్లీ ఫ్లైయింగ్, యూరో న్యూస్ ప్రకారం.. ఆ విమానయాన సంస్థలు ఇవే:

యురోపియన్ క్యారియర్లు:

లుఫ్తాన్సా (Lufthansa)

రైయానైర్ ఎయిర్‌లైన్స్ ( Ryanair)

ఐబీరియా ఎయిర్‌లైన్స్ (Iberia)

ITA ఎయిర్‌వేస్ (ITA Airways )

KLM రాయల్ డచ్ ఎయిర్‌లైన్స్(KLM Royal Dutch Airlines)

ఎయిర్ ఫ్రాన్స్ (Air France)

మిడిల్ ఈస్ట్ క్యారియర్లు:

ఎమిరేట్స్ (Emirates)

ఖతార్ ఎయిర్‌వేస్ (Qatar Airways)

ఆసియా విమానయాన సంస్థలు :

సింగపూర్ ఎయిర్‌లైన్స్ (Singapore Airlines)

క్యాథే పసిఫిక్ (Cathay Pacific)

థాయ్ ఎయిర్‌వేస్ (Thai Airways)

హాంకాంగ్ ఎయిర్‌లైన్స్ (Hong Kong Airlines)

అన్ని ఎయిర్‌లైన్స్ ఇదే ప్యాటర్న్ ఫాలో అవ్వవు. అమెరికాలో.. అమెరికన్, డెల్టా, సౌత్‌వెస్ట్ వంటి ఎయిర్‌లైన్స్ 13న సీట్ల వరుసను అలాగే ఉంచుతాయి. కానీ, యునైటెడ్ ఎయిర్‌లైన్స్.. 13తో పాటు 14వ వరుస సీట్లను కూడా స్కిప్ చేస్తుంది. చైనీయుల నమ్మకాల ప్రకారం.. 14 అనేది "నేను చనిపోతా (will die)" అనే శబ్దానికి దగ్గరగా ఉంటుందట. ఇక యూకేలో.. వర్జిన్ అట్లాంటిక్ 13 నంబర్ సీట్ల వరుసను ఉంచదు. కానీ, బ్రిటీష్ ఎయిర్‌వేస్, ఈజీ జెట్, జెట్2 సంస్థలకు చెందిన విమానాల్లో 13వ నంబర్ సీట్లు కనిపిస్తాయి.

ప్రయాణికుల నమ్మకాలు సీటు నంబర్‌తోనే ఆగిపోలేదండోయ్. విమానాల్లో ప్రయాణించేటప్పుడు కొంతమంది ప్యాసింజర్లు తమ లక్కీ సాక్సులను ధరిస్తారట. శుక్రవారం 13వ తేదీ అయితే విమాన ప్రయాణం చేయరట. అందుకే యూకే నుంచి యూరప్‌కు వెళ్లే విమానాల్లో 13వ తేదీ శుక్రవారం వస్తే.. టిక్కెట్ రేట్లు 39 శాతం తక్కువగా ఉంటాయని చెబుతున్నారు. అంతేకాదు.. ప్లేన్ ఎక్కేముందు ప్యాసింజర్లు విమాన బాడీని తాకుతారు. ఇక్కడ విశేషం ఏంటంటే.. ఇలా చేస్తే 17 శాతం మంది ప్యాసింజర్లు ప్రయాణ సమయంలో ప్రశాంతంగా ఉంటారట.

ప్రయాణికులకే కాదు, పైలట్లకూ నమ్మకాలు ఉంటాయటండోయ్. విమాన ఎక్కే ముందు తినడం, దాని రెక్కలను తడిమి చూడటం.. లాంటివి చేస్తారట. ఇలా చేస్తే, సురక్షితంగా గమ్యం చేరతామని వారి నమ్మకం. మొత్తానికి.. ప్రజల విశ్వాసాలను, నమ్మకాలను కూడా విమానయాన సంస్థలు క్యాష్ చేసుకుంటున్నాయి. అయితే, ఇందులో ఎవరికి ఏం ఇబ్బంది లేదు. 13వ నంబర్ సీట్లు లేనందుకు ప్యాసింజర్లు హ్యాపీ. ఆ సీట్లు తీసేయడం ద్వారా ప్రయాణికులు టిక్కెట్లు కొంటే.. ఎయిర్‌లైన్స్ ఖాజానా నిండుతుంది. ఎవరి నమ్మకాలు వారివి. అనుకున్నట్టుగా పనులు జరిగితే చాలు! ఏమంటారూ..?!