బస్సు ఆపలేదని ఆర్టీసీ డ్రైవర్‌పై మహిళ దాడి

తమ స్టాప్ వద్ద బస్సు అపలేదని ఆగ్రహించిన ఓ మహిళ.. బైక్‌తో వెంబడించి మరీ డ్రైవర్‌పై దాడి చేసింది. ఆపకుండా వెళ్లిపోవడంతో వాగ్వాదానికి దిగి.. చేయిచేసుకుంది. తోటి ప్రయాణికులు వారించినా ఆమె మాత్రం రెచ్చిపోయింది. విస్మయానికి గురిచేసే ఈ ఘటన అనంతపురం జిల్లాలో చోటుచేసుకుంది. వివరాల్లోకి వెళ్తే.. ఏపీఎస్ఆర్టీసీకి చెందిన పల్లెవెలుగు బస్సు.. అనంతపురం నుంచి కళ్యాణదుర్గానికి వెళ్తోంది. మార్గమధ్యంలో నడిమివంక వద్ద ప్రయివేట్ ఉద్యోగం చేస్తోన్న సుచరిత అనే ఓ మహిళ బస్సుకు వేచిచూస్తోంది. కానీ, ఆ స్టాప్‌లో బస్సు ఆగకుండా వెళ్లడంతో ఆమె ఆగ్రహం వ్యక్తం చేసింది.

ఈ క్రమంలో దాని వెనుకే వస్తోన్న ఓ బైక్‌ను ఎక్కి బస్సు వెంబడించింది. బస్సు ను ఓవర్ టేక్ రోడ్డుకు అడ్డంగా బైక్‌తో నిలబెట్టి ఆపేసింది. అనంతరం డ్రైవర్‌తో వాగ్వాదానికి దిగింది. ఎందుకు ఆపవని గొడవ పెట్టుకుంది. అంతటితో ఆగకుండా అతడిపై చేయికూడా చేసుకుంది. తోటి ప్రయాణికులు వారించినా ఆమె వినిపించుకోలేదు. డ్రైవర్ కాలర్ పట్టుకుని చెంప పగులగొట్టింది. ఈ తతంగాన్ని తోటి ప్రయాణికులు వీడియో తీయడంతో ప్రస్తుతం సోషల్ మీడియాలో వైరల్ అవుతోంది. ఆమె దాడిచేయడంతో సహనం కోల్పోయిన డ్రైవర్ చెయిఎత్తి.. మళ్లీ వెనక్కి తగ్గడం.. ఆడదానికి కాబట్టి బతికిపోయావు అనడం వీడియోలో స్పష్టంగా వినిపిస్తోంది. ఆమె మాత్రం స్టాప్‌లో ఉన్న నేను బస్సు ఆపమంటే.. నన్ను చూసి నవ్వుకుంటూ ముందుకు పోనిచ్చాడని ఆరోపించింది. ఆ బస్సులోని మిగతా ప్రయాణికులు.. పోలీస్ స్టేషన్‌కు పోనివ్వమంటూ డ్రైవర్‌కు సలహా ఇవ్వడం గమనార్హం. అటు, ఈ ఘటనపై డ్రైవర్ నటేష్ బాబు పోలీసులకు ఫిర్యాదు చేయడంతో కేసు నమోదయ్యింది.

కాగా, గతంలోనూ ఇలాంటి ఘటనలు చోటుచేసుకున్న సంగతి తెలిసిందే. ఏపీలో ఆగస్టు 15 నుంచి మహిళలకు ఆర్టీసీ బస్సులో ఉచిత ప్రయాణం అందుబాటులోకి వచ్చిన తర్వాత ఇలాంటివి రోజూ ఎన్ని సంఘటలు జరుగుతాయో. మహిళలకు ఫ్రీ బస్సు పథకం అమలవుతోన్న తెలంగాణ ఆర్టీసీ బస్సుల్లో సిగపట్లు, వాగ్వాదాలు, ఘర్షణలు నిత్యకృత్యంగా మారిపోయాయి.