శరీరంలోని మొండి కొవ్వుని కరిగించే పవర్ ఫుల్ పొడి

శరీరంలోని మొండి కొవ్వుని కరిగించే పవర్ ఫుల్ పొడి, ఇంకెన్నో లాభాలు కూడా, ఎలా తీసుకోవాలో చెప్పిన కార్డియాలజిస్ట్

ఈ రోజుల్లో చాలా మంది అధిక బరువుతో బాధపడుతున్నారు. శరీరంలో పేరుకుపోయిన మొండి కొవ్వు వదిలించుకోవడానికి చాలా కష్టపడుతున్నారు. చాలా మంది ఆహారంలో మార్పులు చేసుకుంటే.. మరికొందరు జిమ్‌లో చెమటలు చిందిస్తున్నారు. ఈ రోజుల్లో చాలా మంది బరువు తగ్గడానికి గ్రీన్ టీ ఉపయోగిస్తున్నారు. అయితే, గ్రీన్ టీ కన్నా పవర్ ఫుల్ అయినది ఇంకోటి ఉంది. అదే మాచా. దీన్ని జపనీస్ ప్రజలు శతాబ్దాలుగా సూపర్ ఫుడ్‌గా పిలుచుకుంటున్నారు. ఇది కేవలం టీకే పరిమితం కాదు.. మాచా ఐస్ క్రీమ్, లాట్స్, చాక్లెట్స్, నూడుల్స్, ఫేస్ మాస్క్‌ల్లో కూడా ఉపయోగిస్తున్నారు.

​మాచా ఇప్పుడు యువతలో బాగా క్రేజ్ తెచ్చుకుంది. మాచా అనేది ప్రత్యేకంగా పెరిగిన, ప్రాసెస్ చేయబడిన గ్రీన్ టీ ఆకుల నుంచి తయారు చేయబడిన ఒక ప్రత్యేక రకం పొడి. సాధారణ గ్రీన్ టీలా కాకుండా మొత్తం టీ ఆకును మాచాలో ఉపయోగిస్తారు. ఇందులో యాంటీ ఆక్సిడెంట్లు ఎక్కువగా ఉంటాయి. కార్డియాలజిస్ట్ అండ్ కంటెంట్ సృష్టికర్త డాక్టర్ అలోక్ చోప్రా ఇన్‌స్టాగ్రామ్‌లో మాచాను ప్రశంసించారు. దీన్ని రోజువారీ జీవితంలో చేర్చుకోవడం చాలా మంచిదని చెప్పారు. మాచా పౌడర్ ఎలా పనిచేస్తుంది, ప్రయోజనాలేంటి, ఎలా తీసుకోవాలో ఇప్పుడు తెలుసుకుందాం.

మాచా చేసే మ్యాజిక్

మాచా అనేది ఎల్-థియనిన్ కలిగి ఉన్న ఒక మూలికా పొడి. ఇది అలసట లేకుండా శరీరానికి చురుకుదనాన్ని ఇస్తుంది. దీనిని తీసుకోవడం వల్ల జీవక్రియ పెరుగుతుంది. అంతేకాకాకుండా సెల్యులార్ శక్తిని పెంచుతుంది. దీనిలో ఉండే క్లోరోఫిల్ శరీరం నుంచి విషాన్ని అంటే టాక్సిన్లు బయటకు పంపడంలో సాయపడుతుంది. ఈ టీ కెఫిన్ + ఎల్-థియనిన్ కలయిక. ఇది ఒత్తిడి లేని శక్తిని ఇస్తుంది. ఇది సాధారణ గ్రీన్ టీ కంటే 137 రెట్లు ఎక్కువ EGCG కలిగి ఉందని నిపుణులు తెలిపారు. ఇది శక్తివంతమైన యాంటీఆక్సిడెంట్.

మాచా వెనక సైన్స్

PSRI హాస్పిటల్‌లోని నాన్-ఇన్వేసివ్ కార్డియాలజీ స్పెషలిస్ట్ సీనియర్ కన్సల్టెంట్ డాక్టర్ రాజ్ కుమార్ ఈ ప్రయోజనాలన్నింటి వెనుక కొంత శాస్త్రీయ ఆధారం ఉందని వివరిస్తున్నారు. ఈ టీలో L-థియనిన్ ఉంటుంది. ఇది ఏకాగ్రతను పెంచుతుంది. నిద్రకు కారణం కాకుండా మనసును నియంత్రిస్తుంది. ఇది ఆల్ఫా మెదడు తరంగాలను పెంచుతుంది. ఈ టీ ఒత్తిడిని తగ్గిస్తుందని, చురుకుదనాన్ని పెంచుతుందని పలు అధ్యయనాలు సూచిస్తున్నాయి.

మాచా పౌడర్ వల్ల లాభాలు

ఫ్యాట్ బర్నర్

ఇది EGCG (ఎపిగాల్లో కాటెచిన్ గాలెట్)కి సంబంధించిన అద్భుతమైన ఫ్యాట్ బర్నర్. ఇది జీవక్రియ, కొవ్వు ఆక్సీకరణను కొద్దిగా పెంచుతుంది. బరువు తగ్గాలనుకునేవారికి ఇది బెస్ట్ ఆప్షన్. వ్యాయామంతో పాటు మాచాని జీవనశైలిలో భాగం చేసుకుంటే మొండి కొవ్వు కరగుతుంది. అంతేకాకుండా శరీరానికి ఎంతో మేలు జరుగుతుంది. మాచాలో కాటెచిన్లు పుష్కలంగా ఉన్నాయి. ఇవి శరీరాన్ని ప్రీ రాడికల్స్ నుంచి రక్షిస్తాయి.

గ్రీన్ టీ కంటే మాచా పవర్ ఫుల్

మాచాలో గ్రీన్ టీ కంటే 137 రెట్లు ఎక్కువగా EGCG ఉందని డాక్టర్ అలోక్ కుమార్ చెప్పారు. ఇది ప్రయోగశాల పరీక్షల్లో కనుగొనబడిందని ఆయన తెలిపారు. దీని అర్థం ఒక కప్పు మాచా ఐదు కప్పుల గ్రీన్ టీకి సమానమైన ప్రయోజనాలను అందిస్తుంది. ఎక్కువ యాంటీఆక్సిడెంట్స్‌తో జీవక్రియ వేగవంతం అవ్వాలంటే మాచా మంచి ఎంపిక కావచ్చు. కానీ ఇందులో కెఫిన్ కూడా ఎక్కువగా ఉంటుంది, కాబట్టి మితంగా తీసుకోవడం చాలా ముఖ్యం. కెఫిన్ తీసుకుంటే ఇబ్బందిపడేవారు మితంగా తీసుకోవాలి. మాచాలోని ఎల్-థియనిన్ GABA, సెరోటోనిన్, డోపమైన్‌ను పెంచడం ద్వారా మనస్సును ప్రశాంతపరుస్తుంది.

ఎలా తీసుకోవాలంటే

మాచా టీ రుచి, నాణ్యత ప్రధానంగా దాని పొడిపై ఆధారపడి ఉంటుంది. మార్కెట్లో అనేక రకాల మాచా పౌడర్ అందుబాటులో ఉన్నాయి. కానీ ఉత్తమ ఫలితాల కోసం, సెరిమోనియల్ గ్రేడ్ మాచాను ఎంచుకోండి. ఇది అధిక నాణ్యత గల మాచా. ముదురు ఆకుపచ్చ రంగును కలిగి ఉంటుంది. వంట గ్రేడ్ మాచాను సాధారణంగా స్వీట్లు, డెజర్ట్‌ల తయారీలో ఉపయోగిస్తారు. కానీ సెరిమోనియల్ గ్రేడ్ టీకి బెస్ట్ అంటున్నారు నిపుణులు. మాచా టీ తయారుచేసేటప్పుడు పొడి, నీటి నిష్పత్తి చాలా ముఖ్యం. ఎక్కువ పొడిని జోడించడం వల్ల టీ చేదుగా మారుతుంది. తక్కువ పొడిని జోడించడం వల్ల రుచి చప్పగా ఉంటుంది. అందువల్ల, 60-80 మి.లీ వేడి నీటిలో ఒక టీస్పూన్ (సుమారు 2 గ్రాములు) మాచా పొడిని కలపండి. ఈ నిష్పత్తి టీ రుచి, వాసనను మెరుగుపరుస్తుంది.