ఏపీకి మరో ఐటీ సంస్థ.. అప్పుడే ప్రారంభం కూడా

ఏపీలో మరో అంతర్జాతీయ సంస్థ కొలువుదీరింది. ఆంధ్రప్రదేశ్ రాజధాని అమరావతిని ఐటీకి హబ్‌గా తీర్చిదిద్దాలన్న ప్రభుత్వం లక్ష్యం వైపుగా.. బ్లాక్ చైన్ టెక్నాలజీ రంగంలో అంతర్జాతీయ కంపెనీ ఏపీలో కొలువు దీరింది. గ్లోబల్ బ్లాక్‌చెయిన్ టెక్నాలజీ సంస్థ BONbLOC టెక్నాలజీస్ లిమిటెడ్ గన్నవరంలోని ఐటీ టవర్స్‌లో తన అత్యాధునిక హబ్‌ను ఏర్పాటు చేసింది. అమెరికాకు చెందిన BONbLOC టెక్నాలజీస్ లిమిటెడ్ దేశంలో తమ సేవలు విస్తరించాలనే ఆలోచనలో ఉంది. ఈ క్రమంలోనే గన్నవరం ఐటీ టవర్స్‌లో తన ఆఫీసు ప్రారంభించింది.

మరోవైపు ఏపీ ప్రభుత్వం ఆగస్ట్ 15 నుంచి మహిళలకు ఉచిత బస్సు ప్రయాణ సౌకర్యం కల్పించనున్న సంగతి తెలిసిందే. స్త్రీ శక్తి పథకం పేరుతో రాష్ట్రవ్యాప్తంగా ఈ కార్యక్రమం అమలు చేయనున్నారు. ఈ నేపథ్యంలోనే ఏపీఎస్ఆర్టీసీ బస్సులకు కావాల్సిన అధునాతన పరికరాలను బాన్‌బ్లాక్ సంస్థ సమకూర్చనుంది. ఈ మేరకు ఆంధ్రప్రదేశ్ ప్రభుత్వం BONbLOC టెక్నాలజీస్ లిమిటెడ్ మధ్య ఒప్పందం కుదిరింది. ఈ కార్యక్రమంలో మాట్లాడిన BONbLOC టెక్నాలజీస్ లిమిటెడ్ సీఈఓ సౌరి గోవింద రాజన్.. పలు కీలక వివరాలు వెల్లడించారు.

తమ సంస్థ స్పాట్ బస్ ఐవోటీ డివైజ్ అభివృద్ధి చేసిందన్న ఆయన.. పైలెట్ ప్రాజెక్టు కింద ఈ పరికరాన్ని ఆర్టీసీ బస్సులలో అమర్చనున్నట్లు వివరించారు. విజయవాడ, గుంటూరు, కాకినాడ, విశాఖపట్నం, తిరుపతి నగరాలలోని బస్సులలో ఈ స్పాట్ బస్ ఐవోటీ డివైస్ అమర్చనున్నట్లు వెల్లడించారు. సీఎం నారా చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రులు నారా లోకేష్, వంగలపూడి అనిత, అనగాని సత్యప్రసాద్ చేతుల మీదుగా వేర్వేరు ప్రాంతాల్లో ఈ కార్యక్రమం ఉంటుందన్నారు.

ఏంటీ స్పాట్ బస్ ఐవోటీ డివైజ్..?

స్పాట్ బస్ ఐవోటీ డివైజ్‌లలో 360 డిగ్రీల కెమెరాలను అమర్చుతారు. దీంతో ఆర్టీసీ బస్సు కదలికలను నిరంతరం రియల్ టైమ్‌లో పర్యవేక్షించేందుకు వీలవుతుంది. అలాగే అత్యవసర సేవలు, భద్రత, ఆపరేషనల్ డేటా మేనేజ్‌మెంట్‌లలో ఈ పరికరం ఉపయోగపడుతుంది. మహిళా సాధికారత, ప్రజా సేవలకు సంబంధించి ప్రభుత్వ కార్యక్రమాలలో ఆర్టిఫిషియల్ ఇంటెలిజెన్స్ ఆధారిత సేవలు అందించనున్నట్లు BONbLOC టెక్నాలజీస్ లిమిటెడ్ సీఈవో చెప్తున్నారు. వీటితో పాటుగా ఫార్మా, ఆరోగ్యం, ఆటోమోటివ్, రిటైల్, ఫుడ్ సెక్టార్లకు సంబంధించి సర్వీసులలో ఈ సంస్థకు అనుభవం ఉంది. మరోవైపు విజయవాడలో త్వరలోనే BONbLOC టెక్నాలజీస్ లిమిటెడ్ సెంటర్ ఆఫ్ ఎక్సలెన్స్ ఏర్పాటు చేయనుంది.