అమెరికా ఆంక్షల వేళ రష్యాకు భారత నేతలు

అంతర్జాతీయ రాజకీయాల్లో కీలకమైన పరిణామాలు చోటు చేసుకుంటున్న వేళ.. భారత విదేశాంగ మంత్రి ఎస్. జైశంకర్ మూడు రోజుల పర్యటన కోసం రష్యా చేరుకున్నారు. ఇటీవల భారత జాతీయ భద్రతా సలహాదారు అజిత్ దోవల్ రష్యా అధ్యక్షుడు వ్లాదిమిర్ పుతిన్‌తో భేటీ అయిన కొద్ది రోజులకే ఈ పర్యటన జరగడంతో ప్రాధాన్యతను సంతరించుకుంది. ఈ పర్యటనలో జైశంకర్.. రష్యా విదేశాంగ మంత్రి సెర్గీ లావ్‌రోవ్‌తో కీలక చర్చలు జరపనున్నారు. అంతేకాకుండా వాణిజ్యం, ఆర్థిక, శాస్త్ర సాంకేతిక, సాంస్కృతిక సహకారానికి సంబంధించిన భారత్-రష్యా అంతర-ప్రభుత్వ కమిషన్ 26వ సమావేశానికి ఆయన సహ-అధ్యక్షత వహించనున్నారు.

ఈ కమిషన్ ఇరు దేశాల మధ్య వాణిజ్య సంబంధాలను పెంపొందించడంలో ఒక ప్రధాన వేదికగా పని చేస్తుంది. అలాగే ఇంధన, రక్షణ రంగాల్లో సహకారం, భారత్‌కు రష్యా నుంచి ముడి చమురు సరఫరా వంటి అంశాలపై కూడా చర్చలు జరగనున్నాయి. దోవల్ పర్యటనకు కొనసాగింపుగా జైశంకర్ పర్యటన ఉండటం, ఇరు దేశాల మధ్య అత్యున్నత స్థాయిలో జరుగుతున్న సమన్వయానికి నిదర్శనంగా నిలుస్తోంది. ఓవైపు రష్యా నుంచి ముడి చమురు కొనుగోలుపై అమెరికా అధిక సుంకాలు, జరిమానాలు విధించడం వంటి చర్యలు తీసుకున్న నేపథ్యంలో ఈ పర్యటన జరగడం గమనార్హం.

జైశంకర్ పర్యటనలో ప్రాంతీయ, అంతర్జాతీయ అంశాలు కూడా చర్చకు రానున్నాయి. ముఖ్యంగా ఉక్రెయిన్‌లో శాంతిని నెలకొల్పడానికి భారత్ తీసుకుంటున్న తాజా చొరవ, ఈ విషయంలో రష్యా సహకారంపై చర్చలు జరపనున్నారు. భారత్-రష్యా సంబంధాలు కేవలం ఆర్థిక, రక్షణ సహకారానికి మాత్రమే పరిమితం కాకుండా.. ఒక నమ్మకమైన, చారిత్రక భాగస్వామ్యంగా పరిగణించబడుతోంది. ఉక్రెయిన్‌పై యుద్ధం నేపథ్యంలో అనేక దేశాలు రష్యాను దూరం పెట్టినప్పటికీ.. భారత్ మాత్రం తన స్వతంత్ర విదేశాంగ విధానాన్ని అనుసరిస్తూ రష్యాతో సంబంధాలను కొనసాగిస్తూ వచ్చింది. ఈ పర్యటన ఆ వైఖరికి మరింత బలాన్ని చేకూరుస్తుంది.

జైశంకర్ పర్యటనతో పాటు రష్యా అధ్యక్షుడు వ్లాదిమిర్ పుతిన్ భవిష్యత్‌లో భారత్‌ను సందర్శించడానికి అవసరమైన ఏర్పాట్లను కూడా ఈ సమావేశాలు సుగమం చేస్తాయని నిపుణులు భావిస్తున్నారు. ఈ భేటీల ద్వారా ఇరు దేశాల మధ్య వ్యూహాత్మక భాగస్వామ్యం మరింత మెరుగు పడుతుందని.. వివిధ రంగాల్లో సహకారం కొత్త శిఖరాలకు చేరుకుంటుందని నిపుణులు అభిప్రాయ పడుతున్నారు. మొత్తం మీద ఈ పర్యటన ఇరు దేశాల మధ్య విశ్వాసాన్ని, పరస్పర సహకారాన్ని పెంచడానికి ఒక కీలకమైన అవకాశంగా నిలవనుంది.