ఏపీలో ఉచిత బస్సు పథకంపై అలాంటివి నమ్మొద్దు

ఆంధ్రప్రదేశ్ వ్యాప్తంగా మహిళలకు ఉచిత బస్సు పథకం అమల్లోకి వచ్చింది. ఆగస్ట్ 15వ తేదీన సీఎం నారా చంద్రబాబు నాయుడు చేతుల మీదుగా స్త్రీ శక్తి పథకం ప్రారంభమైంది. పంద్రాగస్టు రోజు సాయంత్రం నుంచి ఫ్రీ బస్ జర్నీ అమల్లోకి రాగా.. రాష్ట్రవ్యాప్తంగా ఉన్న మహిళలు ఈ అవకాశాన్ని ఉపయోగించుకుంటున్నారు. గుర్తింపు కార్డులు చూపించి ఐదు రకాల బస్సులలో ఉచితంగా ప్రయాణిస్తున్నారు. పథకం అమల్లోకి వచ్చిన తర్వాత పరిస్థితులను అనుసరించి కొన్ని కొన్ని మార్పులు చేస్తూ వస్తున్నారు. తొలుత ఘాట్ రోడ్లలో అనుమతించలేదు. అయితే మహిళా ప్రయాణికుల నుంచి వచ్చిన విజ్ఞప్తి మేరకు ఘాట్ రోడ్లలోనూ ఉచిత బస్సు పథకం అమలు చేస్తున్నారు.

అలాగే తిరుపతి నుంచి తిరుమలకు వెళ్లే బస్సుల్లోనూ తొలుత మహిళలకు ఉచిత ప్రయాణ సౌకర్యం కల్పించలేదు. అయితే ఈ విషయంలోనూ ఆర్టీసీ మార్పులు చేసింది. తిరుమలకు కూడా స్త్రీ శక్తి పథకం అమలు చేస్తోంది. తిరుమలకు వెళ్లే మహిళా భక్తులు కూడా గుర్తింపు కార్డులు చూపించి ఉచితంగా ప్రయాణించేందుకు వీలుంది. అయితే ఘాట్ రోడ్డు కావటంతో కేవలం సీటింగ్‌కు మాత్రమే అనుమతి ఇచ్చారు. నిల్చుని ప్రయాణించే వీలు లేదు. అలాగే ఎలక్ట్రికల్ బస్సులకు కూడా ఈ ఉచిత బస్సు పథకం వర్తించదు. ఇక ఏపీలో ఉచిత బస్సు పథకం అమల్లోకి వచ్చిన సోషల్ మీడియాలో కొన్ని ఫోటోలు, వీడియోలు వైరల్ అవుతున్నాయి.

ఈ నేపథ్యంలోనే విజయనగరం నుంచి కొత్తవలస వెళ్ళే బస్సులో సీట్ల కోసం మహిళా ప్రయాణికుల కొట్లాట అంటూ ఓ వీడియో సోషల్ మీడియాలో వైరల్ అవుతోంది. అందులో ఇద్దరు మహిళలు సీటు కోసం గొడవ పడుతున్నారు. ఇలాంటి వీడియోలు నెట్టింట వైరల్ కాగా.. ఏపీ ప్రభుత్వం ఫ్యాక్ట్ చెకింగ్ విభాగం స్పందించింది. తెలంగాణలో జరిగిన ఘటనను ఏపీకి ముడిపెడుతూ వైరల్ చేస్తున్నారని క్లారిటీ ఇచ్చింది. ఈ మేరకు ఎక్స్ వేదికగా ట్వీట్ చేసింది.

" తెలంగాణ రాష్ట్రంలో 2024 జనవరి 1న బస్సు ప్రయాణంలో మహిళల మధ్య జరిగిన కొట్లాటను ఏపీలో స్త్రీ శక్తి పథకం కింద ఉచిత ప్రయాణం చేస్తున్న మహిళలు కొట్టుకుంటున్నట్టు ఫేక్ ప్రచారం చేస్తున్నారు. ఇది పూర్తిగా అవాస్తవం. ప్రభుత్వ ప్రతిష్ట మంటగలిపే ఇటువంటి ఫేక్ పోస్టులపై కఠిన చర్యలు తప్పవు." అంటూ ఏపీ ప్రభుత్వం ఫ్యాక్ట్ చెకింగ్ విభాగం క్లారిటీ ఇచ్చింది. ఇలాంటి తప్పుడు ప్రచారం చేసేవారిపై చర్యలు తీసుకుంటామని హెచ్చరించింది.