మొక్కలు ఏపుగా పెరగడానికి కలబంద ఎరువు, ఎలా తయారు చేయాలో తెలుసా

పైగా ఈ చిట్కాతో మొక్కలు చాలా త్వరగా ఎదుగుతాయి. పైగా ఇది పాటించడం కూడా సులువే. సింపుల్ గా కలబందతో ఈ ఎరువు తయారు చేసుకోవచ్చు. కలబందలో ఎన్ని పోషకాలుంటాయో ప్రత్యేకంగా చెప్పనక్కర్లేదు. అయితే..ఆరోగ్యం కోసం వాడే ఈ కలబందనే మొక్కల పెంపకానికి ఎరువుగా వాడవచ్చు. మరి ఈ ప్రాసెస్ ఏంటి. అలోవెరాతో ఫర్టిలైజర్ ఎలా తయారు చేయాలి. ఎలా వాడాలి. ఈ వివరాలు తెలుసుకుందాం.

కలబంద

​కలబందలో ఎన్నో ఔషధ గుణాలుంటాయి. ముఖ్యంగా చర్మ ఆరోగ్యానికి దీన్ని ఎక్కువగా వినియోగిస్తారు. అంతే కాదు. రకరకాల మందులలోనూ దీన్ని వాడుతుంటారు. ఆయుర్వేదంలో కలబందకు ఎంతో ప్రాధాన్యత ఉంటుంది. చర్మంపై ఏదైనా గాయం అయినప్పుడు దానికి మందుగా కలబంద వాడతారు. ఇందులో యాంటీ బ్యాక్టీరియల్, యాంట ఇన్ ఫ్లమేటరీ గుణాలు పుష్కలంగా ఉంటాయి. జుట్టు త్వరగా పెరగడానికి కూడా ఇదే మంచి మెడిసిన్ లా పని చేస్తుంది. ఇలా ఎన్నో ఆరోగ్య ప్రయోజనాలు కలిగించే కలబంద మొక్కల పెంపకంలో కూడా బాగా పని చేస్తుంది. వాటికి ఓ మంచి ఎరువులా ఉంటుంది. ఇంట్లో మొక్కలు పెంచుకునే వారు బయట నుంచి ప్రతిసారీ ఫర్టిలైజర్ తీసుకురావాల్సిన పని లేకుండా ఇప్పుడు చెప్పినట్టుగా అలోవెరాతో ఎరువు తయారు చేసుకోవచ్చు.

ఎలా తయారు చేయాలి

అలోవెరా ఫర్టిలైజర్ తయారు చేయడం చాలా సులభం. ముందు కలబంద ఆకులను కట్ చేయాలి. ఆ తరవాత ఓ బకెట్ లో నీళ్లు పోయాలి. అందులో ఈ కట్ చేసిన అలోవెరా ఆకులను వేయాలి. రెండు మూడు పెద్ద ఆకులను తీసి కట్ చేసుకుంటే మంచిది. అందులో జెల్ బాగా ఉండేలా చూసుకోవాలి. ఆరోగ్యకరంగా ఉన్న అలోవెరా మొక్కనే ఎంచుకోవాలి. నీళ్లలో వేసిన తరవాత వాటిని అలాగే ఉంచాలి. ఎక్కువ రోజుల పాటు నానబెట్టడం మంచిది. ఫర్టిలైజర్ ఎఫెక్టివ్ గా పని చేయాలంటే మాత్రం కనీసం మూడు వారాల పాటు వాటిని అలాగే నీళ్లలో ఉంచాలి. కాస్త టైమ్ ఉంది అనుకుటే నాలుగు వారాల పాటు అంటే..దాదాపు నెల రోజులు వాటిని నీళ్లలోనే నానబెట్టాలి. ఇలా చేయడం వల్ల కలబందలో ఉన్న పోషకాలన్నీ సరైన విధంగా నీటిలోకి చేరుకుంటాయి.

తరవాత ఏం చేయాలి

ఇలా నెల రోజుల పాటు నీళ్లలో ఉంచడం వల్ల ఆ నీటి రంగు మారిపోతుంది. కాఫీ కలర్ లోకి వచ్చేస్తాయి. ఆ కలర్ కనిపించింది అంటే ఫర్టిలైజర్ తయారైందని అర్థం. అయితే..ఈ నీళ్లని నేరుగా వాడడం మంచిది కాదు. అందులో మరి కొన్ని నీళ్లు కలపాలి. అంటే..ఈ ఫర్టిలైజర్ వాడిని ప్రతిసారీ మామూలు నీళ్లతో డైల్యూట్ చేయాలి. ఆ తరవాతే మొక్కలకు వాడాలి. అప్పుడే మొక్కలకు అందాల్సిన పోషకాలు సరైన విధంగా అందుతాయి. పూలు సరిగ్గా పూయకపోయినా, ఆకులు ఎండిపోయి రాలిపోతున్నా ఈ సమస్యలకు కలబంద ఫర్టిలైజర్ తో పరిష్కారం దొరుకుతుంది. ముఖ్యంగా వేర్లను బలంగా మార్చడంలో అలోవెరా తోడ్పడుతుంది. దీని వల్లే మొక్కలు చాలా త్వరగా ఎదుగుతాయి. చాలా రోజుల పాటు ఆరోగ్యంగా ఉండేందుకు వీలుంటుంది.

మరెన్నో ప్రయోజనాలు

మొక్కల వేర్లు ఆరోగ్యంగా ఉంటేనే మొక్క కూడా ఆరోగ్యంగా ఉంటుంది. కలబంద ఈ వేర్లను చాలా హెల్తీగా మార్చేస్తుంది. ముఖ్యంగా మొక్కలపై ఒత్తిడిని తగ్గిస్తుంది. మట్టి నుంచి పోషకాలు తీసుకోవడానికి మొక్కలు చాలా ప్రయత్నాలు చేస్తాయి. ఈ విషయంలో ఇబ్బందులు ఎదురైతే వెంటనే వాడిపోతాయి. కలబంద ఈ సమస్యను తీర్చేస్తుంది. కావాల్సిన సూక్ష్మ పోషకాలు, మినరల్స్ ని పుష్కలంగా అందిస్తుంది. వీటి వల్ల మొక్క ఎక్కువ రోజుల పాటు పచ్చగా ఉంటుంది. పైగా ఎలాంటి కీటకాలు వీటి దరి చేరవు. ఇలా ముందస్తుగానే సహజసిద్ధమైన ఈ ఫర్టిలైజర్ వాడితే ఎలాంటి ఇబ్బంది లేకుండా ఉంటుంది. ఇంట్లో ఎక్కువ మొత్తంలో మొక్కలు పెంచే వారికి ఈ చిట్కా చాలా బాగా ఉపయోగపడుతుంది.

ఇలా కూడా చేయొచ్చు

ఇప్పుడు చెప్పిన పద్ధతిలోనే కాకుండా మరో రకంగా కూడా కలబంద ఎరువు తయారు చేసుకోవచ్చు. ముందుగా ఓ కిలో కలబందను ముక్కలుగా చేసుకోవాలి. వీలైనంత వరకూ చిన్నగా కట్ చేసుకోవాలి. అందులో రెండు లీటర్ల నీళ్లు కలుపుకోవాలి. దీంతో పాటు కాస్తంత బెల్లం సుమారు 10 గ్రాములు, ఓ 50 మిల్లీ లీటర్ల పాలు యాడ్ చేయాలి. ఈ మిశ్రమాన్ని కనీసం 24 గంటల పాటు అలాగే ఉంచాలి. అంత కన్నా ఎక్కువ ఉంచినా పరవాలేదు. ఆ తరవాత ఈ మిశ్రమాన్ని మరోసారి బాగా కలిపి నేరుగా మొక్కలకు ఎరువులా వాడుకోవచ్చు. ఆకులపై పిచికారీ చేస్తే మంచిది. తద్వారా మొక్కలకు కావాల్సిన పోషకాలు అందుతాయి.