సింగపూర్‌లో జైలు పాలైన భారతీయ వ్యక్తి.. ఆస్పత్రిలో అలా అడ్డంగా దొరికిపోవడం వల్లే

సింగపూర్‌లో ఉండే ఓ భారతీయ వ్యక్తికి 15 ఏళ్ల క్రితమే వివాహం జరిగంది. భార్యతో పాటు ప్రస్తుతం అతడు అక్కడే ఉంటున్నాడు. కానీ ఈమెకు తెలియకుండా ఆయన రెండో పెళ్లి చేసుకున్నాడు. మొదటి భార్యకు విడాకులు ఇస్తానని కళ్లబొల్లి మాటలు చెబుతూనే కాలం వెళ్లదీస్తున్నాడు. ఇదంతా ఇలా ఉండగా.. సింగపూర్‌లో శాశ్వత నివాసం కోసం దరఖాస్తు చేసుకున్న ఇతడు తనకింకా పెళ్లే కాలేదని అబద్ధం కూడా చెప్పాడు. కానీ రెండు పెళ్లిళ్ల వ్యవహారం బయట పడేసరికి పోలీలుసులు అతడిని అరెస్ట్ చేశారు.

భారత దేశానికి చెందిన 49 ఏళ్ల వైతియలింగం ముత్తు కుమార్‌కు.. 15 ఏళ్ల క్రితమే తొలిసారి వివాహం జరిగింది. ముఖ్యంగా సింగపూర్‌కు చెందిన 51 ఏళ్ల మహిళను 2007లో వివాహం ఆడాడు. 2011లో మొత్తంగా సింగపూర్‌కు వచ్చేశాడు. ఇక అప్పటి నుంచే మరో అమ్మాయితో ప్రేమలో పడ్డాడు. 43 ఏళ్ల వయసు కల్గిన సల్మా బీ అబ్దుల్ రజాక్ అనే మహిళతో సహజీవనం కూడా ప్రారంభించాడు. అయితే ఈమెకు అతడికి ముందే పెళ్లి అయినట్లు తెలుసు. కానీ ముత్తు కుమార్.. తన మొదటి భార్యకు విడాకులు ఇస్తానని నమ్మబలికి ఈమెను ప్రేమలో పడేశాడు. అయితే 2022లో సల్మా బీ గర్భం దాల్చడంతో.. ఆమె పెళ్లి చేసుకోవాలని ఒత్తిడి చేసింది.

దీంతో చేసేదేమీ లేక ముత్తు కుమార్ అమెను వివాహం ఆడాడు. ఇలా మొదటి భార్యకు తెలియకుండా సల్మా బీతో కాపురం చేస్తున్నాడు. అయితే 2023 సెప్టెంబర్ 14వ తేదీన సల్మా బీ ఓ పండంటి బాబుకు జన్మను ఇచ్చింది. ఆ సమయంలో ముత్తు కుమార్ కూడా ఆస్పత్రిలోనే ఉండి తన భార్య, బిడ్డల్ని చక్కగా చూసుకున్నాడు. ఇదంతా బాగానే ఉండగా.. మొదటి భార్య అదే రోజు ఆస్పత్రిలో ఉన్న తన బంధువును చూసేందుకు వచ్చింది. అక్కడే తన భర్త. డెలివరీ వార్డు నుంచి బయటకు రావడం గమనించి అతడిని నిలదీసింది. ఈక్రమంలోనే అతడు జరిగిందంతా చెప్పాడు. తనకు రెండో భార్య ఉందని.. ఇప్పుడామెకు ఓ బాబు కూడా పుట్టాడని వివరించాడు.

దీంతో మొదటి భార్య గుండె పగిలేలా రోదించింది. తనను మోసం చేయడం సరికాదంటూనే నేరుగా పోలీస్ స్టేషన్‌కు వెళ్లి ఫిర్యాదు చేసింది. ఈ ఘటనపై సింగపూర్ పోలీసులు కేసు నమోదు చేసి ముత్తుకుమార్‌ను అదుపులోకి తీసుకున్నారు. విచారణలో ముత్తు కుమార్ రెండు పెళ్లిళ్లు చేసుకున్న నేరాన్ని అంగీకరించాడు. అలాగే జూన్ నెలలో శాశ్వత నివాసం కోసం దరఖాస్తు చేసుకున్న తాను.. రెండు వివాహాలు జరిగినా ఒక్కసారి కూడా పెళ్లి కాలేదని ఆధారాలు సమర్పించినట్లు వివరించాడు. అతని నేరాలను తీవ్రంగా పరిగణించిన కోర్టు.. మూడు నెలల మూడు వారాల జైలు శిక్షను విధించింది. ప్రస్తుతం అతడు జైల్లో ఊచలు లెక్కబెడుతున్నాడు.