డ్వాక్రా మహిళలకు గుడ్ న్యూస్.... ఇక ఆ ఇబ్బంది ఉండదు

డ్వాక్రా మహిళలకు ఆంధ్రప్రదేశ్ ప్రభుత్వం శుభవార్త వినిపించింది. పొదుపు సంఘాలలోని మహిళల కోసం కొత్త యాప్ అందుబాటులోకి తీసుకువచ్చింది. మహిళా సాధికారత కోసం డ్వాక్రా సంఘాలు, స్వయం సహాయక సంఘాలు ఏర్పాటు చేసిన సంగతి తెలిసిందే. వీటి ద్వారా బ్యాంక్ లింకేజీ రుణాలు అందించి మహిళలు తమ సొంత కాళ్ల మీద నిలబడేలా ప్రభుత్వాలు చర్యలు తీసుకుంటున్నాయి. అందులో భాగంగా వారికి సున్నా వడ్డీకే రుణాలు అందిస్తూ మహిళల ఆర్థికాభివృద్ధికి తోడ్పాటునందిస్తుంటాయి. అయితే బ్యాంకుల నుంచి డ్వాక్రా సంఘాలు తీసుకున్న రుణాలను వాయిదా పద్ధతిలో తిరిగి బ్యాంకులకు చెల్లిస్తూ ఉంటారు. బ్యాంకు రుణాలతో పాటుగా పొదుపును కూడా ప్రతి నెలా బ్యాంక్‌లో జమ చేస్తుంటారు. అయితే ఈ విషయంలో కొన్నిచోట్ల అక్రమాలు జరుగుతున్నాయనే ఫిర్యాదులు అప్పుడప్పుడూ వస్తున్న సంగతి తెలిసిందే. ఈ విషయాన్ని దృష్టిలో పెట్టుకుని ఏపీ ప్రభుత్వం డ్వాక్రా సంఘాల మహిళల కోసం మన డబ్బులు మన లెక్కలు అనే యాప్ అందుబాటులోకి తీసుకువచ్చింది.

మన డబ్బులు- మన లెక్కలు యాప్ ద్వారా పొదుపు సంఘాలు రుణాలు చెల్లింపులో అక్రమాలు చెక్ పెట్టవచ్చని అధికారులు చెప్తున్నారు. గతంలో కొంతమంది సభ్యులు రుణ వాయిదా డబ్బులు కట్టకుండా సొంతానికి వాడుకున్నారని అక్కడక్కడా వార్తలు వచ్చేవి. అయితే ఈ యాప్ అందుబాటులోకి రావటంతో ఇకపై ఇలాంటివి జరగవని అధికారులు చెప్తున్నారు. ఎలాంటి అక్రమాలకు తావు లేకుండా ఈ యాప్‌లో డ్వాక్రా సంఘాలకు సంబంధించిన సభ్యుల వివరాలను నమోదు చేస్తున్నట్లు అధికారులు చెప్తున్నారు. డ్వాక్రా సంఘాలలో సభ్యులుగా ఉండే ప్రతి మహిళ వివరాలను ఇందులో నమోదు చేసి.. వారికో ఐడీ కేటాయిస్తారు. ఆ తర్వాత రుణ వాయిదాలు, బ్యాంక్ ఖాతాలో పొదుపు డబ్బులు జమ చేస్తే.. వెలుగు సిబ్బంది ఆ వివరాలను కూడా ఇందులో నమోదు చేస్తారు. ఇక డ్వాక్రా సంఘాల సమావేశం జరిగినప్పుడు వెలుగు సిబ్బంది యాప్‌లోని వివరాలను పేరుపేరునా వెల్లడిస్తారు. దీంతో ఎలాంటి అక్రమాలకు ఆస్కారం ఉండదని అధికారులు చెప్తున్నారు.

మరోవైపు మన డబ్బులు- మన లెక్కలు యాప్ ద్వారా డ్వాక్రా సంఘాల బ్యాంక్ లావాదేవీలను కూడా సంఘంలోని సభ్యులు పరిశీలించుకోవచ్చు. దీంతో రుణ వాయిదాలు ఎప్పుడు చెల్లించారు, పొదుపు ఖాతాలో డబ్బులు జమ చేశారా లేదా వంటి వివరాలను తనిఖీ చేసుకునేందుకు వీలు దొరుకుతుంది. దీంతో డ్వాక్రా సంఘాల లెక్కలలో తేడాలు రావని.. మహిళల మధ్య గొడవలు జరిగే ఆస్కారం ఉండదని చెప్తున్నారు. మరోవైపు డ్వాక్రా సంఘాల కోసం ఉన్నతి వంటి పథకాలను కూడా అమలు చేస్తున్న సంగతి తెలిసిందే.