ఎస్సీ, ఎస్టీ విద్యార్థులకు గుడ్ న్యూస్.. చంద్రబాబు కీలక నిర్ణయం

ఆంధ్రప్రదేశ్‌లోని ఎస్సీ, ఎస్టీ విద్యార్థులకు ముఖ్యమంత్రి నారా చంద్రబాబు నాయుడు శుభవార్త వినిపించారు. ఎస్సీ, ఎస్టీ విద్యార్ధులకు ఉపయోగపడేలా రాష్ట్రంలో మరో 7 ఐఐటీ, నీట్ కోచింగ్ సెంటర్లు ఏర్పాటు చేస్తామని ప్రకటించారు. ఆంధ్రప్రదేశ్ సాంఘిక సంక్షేమ గురుకుల పాఠశాలల్లో చదివి.. డాక్టర్ బీఆర్ అంబేద్కర్ ఐఐటీ-నీట్ సెంటర్లలో కోచింగ్ తీసుకుని.. ఈ ఏడాది జరిగిన ఐఐటీ, నిట్, నీట్‌ పరీక్షల్లో సత్తా చాటిన విద్యార్థులను చంద్రబాబు అభినందించారు. 55 మంది ఎస్సీ, ఎస్టీ విద్యార్ధులు సోమవారం రోజున సచివాలయంలో సీఎం చంద్రబాబును కలిశారు. పరీక్షల సన్నద్ధత కోసం రాష్ట్ర ప్రభుత్వం అందించిన ప్రోత్సాహానికి కృతజ్ఞతలు తెలిపారు. ఈ సందర్భంగా వారిని అభినందించిన చంద్రబాబు.. భవిష్యత్తులో మరిన్ని విజయాలు సాధించాలని ఆకాంక్షించారు.

సానబెడితేనే వజ్రం విలువ తెలుస్తుందన్న చంద్రబాబు.. మట్టిలో మాణిక్యాలకు సరైన అవకాశం కల్పిస్తే అద్భుతాలు సాధించే సత్తా ఉంటుందన్నారు. సాంఘిక సంక్షేమ గురుకుల పాఠశాల విద్యార్థులు సాధించిన విజయాలు వారి సమర్థతను తెలియజేస్తున్నాయన్నారు. సరైన శిక్షణ, సదుపాయాలు కల్పిస్తే ప్రపంచంతో పోటీపడే సత్తా మన విద్యార్థులకు ఉందని చంద్రబాబు పేర్కొన్నారు. ప్రతిష్టాత్మక సంస్థల్లో సీట్లు పొందిన వారికి ఒక్కొక్కరికి లక్ష ప్రోత్సాహకంతో పాటుగా మెమొంటోను చంద్రబాబు అందజేశారు. వీరి విజయం ఎంతోమందికి స్ఫూర్తిదాయకంగా నిలవాలని ఆకాంక్షించారు.

మరోవైపు విద్యార్థుల కోసం ఏపీ సాంఘిక సంక్షేమ శాఖ పరిధిలోని ఎంపిక చేసిన గురుకులాల్లో ఐఐటీ, నీట్ పరీక్షల కోసం ప్రత్యేక తరగతులు నిర్వహిస్తున్న సంగతి తెలిసిందే. పేద పిల్లలకు ఉన్నత చదువులు అందించాలనే ఉద్దేశంతో ప్రభుత్వం ఈ నిర్ణయం తీసుకుంది. ఐఐటీ, నీట్ పరీక్షలకు ట్రైనింగ్ అందించేందుకు ప్రత్యేకంగా సిబ్బందిని కూడా నియమిస్తున్నారు. గతంలో ఐఐటీ , నీట్‌ ట్రైనింగ్ ఇచ్చిన అనుభవం ఉన్నవారిని కాంట్రాక్టు పద్ధతిలో చేర్చుకుంటున్నారు. కార్పోరేట్ కాలేజీల్లో ఏ రకమైన ట్రైనింగ్ ఇస్తారో అందుకు ధీటుగా గురుకులాల్లోనూ శిక్షణ అందిస్తున్నారు. ఈ క్రమంలోనే ఈ ఏడాది జరిగిన పరీక్షల్లో సత్తాచాటిన 55 మంది ఎస్సీ, ఎస్టీ విద్యార్థులకు చంద్రబాబు చేతుల మీదుగా మెమొంటోలు, లక్ష ప్రోత్సాహకం అందించారు.