ట్రంప్ చేతిపై గాయాలు.. కనిపించకుండా మేకప్‌తో కవర్

అగ్రరాజ్యం అమెరికా అధ్యక్షుడు డొనాల్డ్ ట్రంప్ ఆరోగ్యంపై మరోసారి చర్చ మొదలైంది. ఇటీవల ఆయన చేతిపై ఉన్న గాయాలు, వాటిని కప్పిపుచ్చడానికి వాడిన మేకప్‌కు సంబంధించిన ఒక వీడియో సోషల్ మీడియాలో మళ్లీ వైరల్ అవుతోంది. ఈ వీడియోలో ట్రంప్ చేతిపై కనిపించిన గాయాలు, చర్మం రంగుకు భిన్నంగా ఉన్న మేకప్ రంగుపై నెటిజన్లు తీవ్రంగా చర్చించుకుంటున్నారు. ఈక్రమంలోనే ఆయనకు అసలు ఏం సమస్య ఉంది, ఎందుకలా చేతులపై గాయాలు అవుతున్నాయని ప్రశ్నిస్తున్నారు. అయితే దీనిపై గతంలోనే ఓసారి వైట్ హౌస్ స్పందించింది. మరి ఏం చెప్పిందో మనం ఇప్పుడు తెలుసుకుందామా..?

వైరల్ అయిన వీడియోలో ట్రంప్ చేతిపై ఉన్న గాయం చాలా స్పష్టంగా కనిపిస్తోంది. అంతేకాకుండా గాయం చుట్టూ ఉన్న చర్మంపై మేకప్ వేసినట్లుగా కనిపిస్తోంది. సాధారణంగా ట్రంప్ ముఖంపై కనిపించే మేకప్ రంగుకు, చేతిపై ఉన్న మేకప్ రంగుకు మధ్య చాలా తేడా ఉండటం వలన ఈ విషయం బయటపడింది. ఇది చూసిన ప్రతీ ఒక్కరూ ట్రంప్ ఏదో అరుదైన వ్యాధితోనే బాధ పడుతున్నారంటూ అనుమానాలు వ్యక్తం చేస్తున్నారు. అసలా సమస్య ఏంటని తెలుసుకునేందుకు అనేక ప్రయత్నాలు చేస్తున్నారు.

ట్రంప్ చేతిపై గాయాలు కనిపించడం ఇది మొదటిసారి కాదు. ఈ సంవత్సరం జనవరి, ఫిబ్రవరి నెలల్లో కూడా ఇలాంటి ఫోటోలు, వీడియోలు సోషల్ మీడియాలో కలకలం సృష్టించాయి. అప్పుడు ట్రంప్ మద్దతుదారులు ఇది సాధారణ గాయమని, ఎక్కడైనా పడి ఉండవచ్చని వివరణ ఇచ్చారు. అయితే ఇప్పుడు మళ్లీ అదే విధమైన గాయాలు కనిపించడంతో.. అవి తాత్కాలిక గాయాలు కాదని, అంతర్గత ఆరోగ్య సమస్యలకు సంకేతాలుగా ఉండవచ్చని విశ్లేషకులు భావించారు.

అయితే అంతా ఊహిస్తున్నది నిజమే అయింది. ట్రంప్‌కు 'క్రానిక్ వీనస్ ఇన్సఫిషియెన్సీ' అనే అరుదైన వ్యాధితో ఇబ్బంది పడుతున్నారని రెండు నెలల క్రితమే వైట్ హౌస్ పేర్కొంది. ఈ వ్యాధి నిర్ధారణ అయిన వెంటనే విషయం చెబుతున్నట్లు కూడా ప్రకటించింది. వైట్ హౌస్ ప్రెస్ సెక్రటరీ కరోలిన్ లీవిట్ మాట్లాడుతూ.. ట్రంప్ ఇటీవల తన కాళ్ల కింది భాగంలో స్వల్ప వాపును గమనించారని, దీనిపై వైట్ హౌస్ మెడికల్ యూనిట్ సమగ్ర పరీక్షలు నిర్వహించిందని తెలిపారు. ఈ పరీక్షల్లో ట్రంప్‌నకు క్రానిక్ వీనస్ ఇన్సఫిషియెన్సీ ఉన్నట్లు తేలిందని.. ఇది వృద్ధులలో సాధారణంగా కనిపించే ఒక నిరపాయకరమైన పరిస్థితి అని ఆమె వివరించారు.

సిరల్లోని చిన్న కవాటాలు రక్తాన్ని గుండె వైపు పంపడంలో సరిగా పని చేయకపోవడం వల్ల ఈ సమస్య తలెత్తుతుందని... ఫలితంగా రక్తం కాళ్లలో పేరుకుపోయి వాపు వస్తుందని వైద్య నిపుణులు చెబుతున్నారు. దాని వల్లే ఇప్పుడు కూడా చేతిపై గాయం అయిందని.. ఆ వాపును కవర్ చేసేందుకు ట్రంప్ మేకప్ వేసుకుని ఉంటారని తెలుస్తోంది.