ట్రంప్‌నకు ఏమైనా జరిగితే నేనే అధ్యక్ష బాధ్యతలు స్వీకరిస్తా.. జేడీ వాన్స్ సంచలనం

అమెరికా ఉపాధ్యక్షుడు జేడీ వాన్స్ సంచలన వ్యాఖ్యలు చేశారు. దేశంలో ఏమైనా అనుకోని భయంకరమైన విషాదం చోటు చేసుకుంటే.. తాను అధ్యక్ష పదవి బాధ్యతలు స్వీకరించడానికి సిద్ధంగా ఉన్నానని పేర్కొన్నారు. అమెరికా అధ్యక్షుడు డొనాల్డ్ ట్రంప్ అనారోగ్యంపై పెద్ద ఎత్తున ఊహాగానాలు వస్తున్న ఈ సమయంలో.. జేడీ వాన్స్ చేసిన ఈ ప్రకటన అంతర్జాతీయ వ్యాప్తంగా తీవ్ర చర్చనీయాంశం అయింది.

జేడీ వాన్స్ 'యుఎస్ఏ టుడే' పత్రికకు ఇచ్చిన ఇంటర్వ్యూలో మాట్లాడుతూ.. ప్రస్తుతం ట్రంప్ ఆరోగ్య పరిస్థితి చాలా బాగుందన్నారు. ట్రంప్‌తో పని చేసే వారిలో చాలా మంది ఆయనకంటే చిన్నవాళ్లే ఉన్నారని వివరించారు. కానీ వారందరి కంటే చివరగా నిద్ర పోయేది, అందరికంటే ముందు నిద్ర లేచేది ట్రంపేనని స్పష్టం చేశారు. ఎప్పుడూ చాలా ఉత్సాహంగా ఉండే ట్రంప్ పూర్తి ఆరోగ్యంతో ఉన్నారని పునరుద్ఘాటించారు. కానీ కొన్నిసార్లు అనుకోని భయంకరమైన విషాదాలు జరుగుతాయని.. వాటన్నింటినీ దాటుకుని ట్రంప్ మిగిలిన పదవీ కాలాన్ని పూర్తి చేస్తారని ఆశాభావం వ్యక్తం చేశారు.

ట్రంప్ అమెరికన్లకు చాలా మంచి చేస్తారన్న నమ్మకం తనకు ఉందని జేడీ వాన్స్ స్పష్టం చేశారు. ఒకవేళ ఏమైనా అనుకోని ఉపద్రవం ఏర్పడితే.. తాను అధ్యక్షుడిగా బాధ్యతలు స్వీకరించేందుకు సిద్ధంగా ఉన్నానని చెప్పుకొచ్చారు. తన 41 ఏళ్ల వయసులో అమెరికా చరిత్రలో మూడవ అతి పిన్న వయస్కుడైన ఉపాధ్యక్షుడిగా.. దేశాన్ని నడిపించాల్సిన పరిస్థితి వస్తే తాను ఆ బాధ్యతను సమర్థవంతంగా నిర్వహించగలనని వాన్స్ విశ్వాసం వ్యక్తం చేశారు. గత 200 రోజులుగా ఉపాధ్యక్షుడిగా తాను పొందిన అనుభవం, అత్యుత్తమ 'ఆన్-ది-జాబ్ ట్రైనింగ్' అని ఆయన అభివర్ణించారు.

ట్రంప్ ఆరోగ్యానికి సంబంధించి ఇటీవల కాలంలో అనేక సందేహాలు వ్యక్తం అవుతున్నాయి. ముఖ్యంగా దక్షిణ కొరియా అధ్యక్షుడు లీ జే మ్యుంగ్‌తో ట్రంప్ సమావేశం అయినప్పుడు.. ఆయన చేతిపై కనిపించిన గాయం ఈ చర్చలకు కేంద్ర బిందువుగా మారింది. ఈ గాయానికి సంబంధించిన ఫోటోలు, వీడియోలు సోషల్ మీడియాలో వైరల్ కావడంతో ట్రంప్‌కి ఏదో అనారోగ్య సమస్య ఉందనే అనుమానాలు బలపడ్డాయి. దీనిపై వైట్ హౌస్ వివరణ ఇస్తూ.. తరచుగా బలవంతంగా కరచాలనాలు చేయడం, అలాగే ఆస్ప్రిన్ వాడకం వల్ల ఈ గాయం ఏర్పడిందని పేర్కొంది. వైట్ హౌస్ ప్రెస్ సెక్రటరీ కరోలిన్ లీవిట్ ఒక ప్రకటన విడుదల చేస్తూ.. "అధ్యక్షుడు ట్రంప్ ప్రజల మనిషి, చరిత్రలో ఇతర అధ్యక్షుల కంటే ఎక్కువగా ఆయన ప్రతిరోజూ అమెరికన్లను కలుసుకుంటూ, వారితో కరచాలనం చేస్తారు" అని పేర్కొన్నారు. ఇది ఆయన ప్రజలతో నిరంతర సంభాషణకు నిదర్శనమని ఆమె అన్నారు.

అంతకుముందు జులైలో ట్రంప్ కాళ్లపై కనిపించిన వాపు కూడా ఆయన ఆరోగ్య పరిస్థితిపై అనుమానాలను పెంచింది. ఆ సమయంలో వైట్ హౌస్ వైద్యుడు డాక్టర్ సీన్ బార్బబెల్లా ట్రంప్‌కు "క్రానిక్ వీనస్ ఇన్సఫిషియన్సీ" అనే వ్యాధి ఉన్నట్లు నిర్ధారించారు. ఇది 70 సంవత్సరాల కంటే ఎక్కువ వయస్సు ఉన్నవారిలో సాధారణంగా కనిపించే ఒక ప్రమాదకరం కాని పరిస్థితి అని స్పష్టం చేశారు. ఈ రకమైన వ్యాధి సిరల్లో రక్త ప్రసరణ సరిగా లేకపోవడం వల్ల ఏర్పడుతుందన్నారు. అయితే ఈ వైద్యపరమైన వివరాలు ట్రంప్ ఆరోగ్యంపై ఉన్న చర్చలకు తాత్కాలికంగా ముగింపు పలికినప్పటికీ.. జేడీ వాన్స్ తాజా వ్యాఖ్యలు ఆ చర్చలను మళ్లీ తెరపైకి తెచ్చాయి.