12 బంతుల్లో 11 సిక్స్‌లు.,,,కేరళ లీగ్‌లో 26 బంతుల్లో 86 పరుగులు

కేరళ క్రికెట్ లీగ్‌లో ఓ బ్యాటర్ సిక్సర్ల వర్షం కురిపించాడు. ఒకటి కాదు రెండు కాదు ఏకంగా 12 బంతుల్లో 11 సిక్సర్లు బాది స్టేడియాన్ని దద్దరిల్లించాడు. తొలి 13 బంతుల్లో 17 పరుగులు మాత్రమే చేసిన ఆ ఆటగాడు, 26 బంతుల్లో ఏకంగా 86 పరుగులతో నాటౌట్‌గా నిలిచాడు. ఇంతకీ ఆ విధ్వంసకర బ్యాటర్ ఎవరు అని అనుకుంటున్నారా సల్మాన్ నిజార్ .

 తిరువనంతపురంలోని గ్రీన్ ఫీల్డ్ ఇంటర్నేషనల్ స్టేడియం వేదికగా ఇవాళ అదానీ త్రివేండ్రమ్ రాయల్స్, కాలికట్ గ్లోబస్టార్స్ మధ్య మ్యాచ్ జరిగింది. ఈ మ్యాచ్‌లో టాస్ గెలిచిన అదానీ జట్టు కాలికట్‌ను బ్యాటింగ్‌కి ఆహ్వానించింది. ఆరంభంలో వరుస వికెట్లు కోల్పోయిన కాలికట్ జట్టు ఆఖర్లో మాత్రం పరుగుల వరద పారించింది.

ఆరో స్థానంలో బ్యాటింగ్‌కి వచ్చిన సల్మాన్ నిజార్ 26 బంతుల్లో 12 సిక్సర్లు బాది 86 పరుగులతో నాటౌట్‌గా నిలిచాడు. ఆఖరి రెండు ఓవర్లలో తానే స్ట్రయికింగ్‌గా ఉండి త్రివేండ్రం బౌలర్లకు చుక్కలు చూపెట్టాడు. ఆడిన ప్రతి బంతీ సిక్సర్ వెళ్లడంతో ఫీల్డర్లంతా ఆకాశం వైపు చూడటం తప్పా ఏం చేయలేకపోయారు.

త్రివేండ్రం బౌలర్ బాసిల్ థంపీ వేసిన 19వ ఓవర్‌లో వరుసగా ఐదు సిక్సర్లు బాది ఆరో బంతికి సింగిల్ తీసుకున్నాడు. ఇక ఆఖరి ఓవర్ వేసిన అభిజిత్ ప్రవీణ్ బౌలింగ్‌లో ఏకంగా నలభై పరుగులు రాబట్టాడు. నిజార్ ఆరు సిక్సర్లు బాదగా మిగతా నాలుగు పరుగులు ఎక్స్‌ట్రా రూపంలో రావడం విశేషం. సల్మాన్ నిజార్ విధ్వంసంతో కాలికట్ జట్టు 20 ఓవర్లలో 6 వికెట్ల నష్టానికి 186 పరుగులు చేసింది. అదానీ జట్టు సమష్టిగా పోరాడినప్పటికీ 19.3 ఓవర్లలో 173 పరుగులకు ఆలౌట్ అయింది. దాంతో కాలికట్ 13 పరుగుల తేడాతో విజయం సాధించింది. టీ20 ఫార్మాట్‌లోనే కాకుండా రంజీల్లో కూడా సల్మాన్ నిజార్ అద్భుతమైన ఫామ్‌లో ఉన్నాడు. ఈ ఏడాది కేరళ తరఫున రంజీల్లో అత్యధిక పరుగులు చేసిన ఆటగాడిగా కూడా నిజార్ నిలిచాడు. 86.71 యావరేజ్‌తో 607 పరుగులు నమోదు చేశాడు.