250 కోట్ల గూగుల్ జీమెయిల్ ఖాతాలు హ్యాక్.. డేటా గురించి యూజర్ల భయం

ప్రముఖ హ్యాకింగ్ గ్రూప్ షైనీహంట్స్.. డేటా ఉల్లంఘన ద్వారా సున్నితమైన సమాచారాన్ని దొంగిలించడంతో జీ- మెయిల్ వినియోగదారులకు గూగుల్ ఒక హెచ్చరిక జారీ చేసింది. హ్యాకింగ్ ద్వారా 2.5 బిలియన్ (250 కోట్లు) జీమెయిల్ ఖాతాలు రిస్క్‌లో పడ్డాయి. ఈ క్రమంలోనే వినియోగదారులు.. తమ పాస్‌వర్డ్‌లను రీసెట్ చేయమని, అకౌంట్ సేఫ్టీని బలోపేతం చేయాలని గూగుల్ కోరింది. గూగుల్ థ్రెట్ ఇంటెలిజెన్స్ రిపోర్ట్ ప్రకారం.. హ్యాకర్లు కార్పొరేట్ సేల్స్‌ఫోర్స్ సిస్టమ్ ద్వారా డేటాను పొందారు, తద్వారా ఫిషింగ్ స్కామ్‌లు, దోపిడీ ప్రయత్నాలు చేశారు.

టెక్ రాడార్ ప్రకారం, షైనీహంట్స్ కంపెనీ సిబ్బందిగా నటిస్తూ ఐటీ సపోర్ట్ టీమ్‌లను మోసం చేసి గూగుల్ సేల్స్‌ఫోర్స్ ఇన్‌స్టాన్స్‌కు యాక్సెస్ పొందినప్పుడు ఈ ఉల్లంఘన జరిగింది. దొంగిలించబడిన డేటా ఎక్కువగా పబ్లిక్ బిజినెస్ సమాచారానికి పరిమితం చేయబడిందని గూగుల్ ధ్రువీకరించింది. అయితే ముప్పును తక్కువగా అంచనా వేయకూడదని నొక్కి చెప్పింది.

"జూన్‌లో.. గూగుల్ కార్పొరేట్ సేల్స్‌ఫోర్స్ ఇన్‌స్టాన్స్‌లలో ఒకటి UNC6040 కార్యాచరణ ద్వారా ప్రభావితమైంది. తిరిగి పొందిన డేటా ప్రాథమిక వ్యాపార పేర్లు, సంప్రదింపు వివరాలకు పరిమితం చేయబడింది" అని కంపెనీ ఒక ప్రకటనలో తెలిపింది.

హ్యాకింగ్ ద్వారా ఎఫెక్ట్ అయిన వినియోగదారులకు గూగుల్ ఒక ఇ- మెయిల్ పంపింది. గతంలో ఫిషింగ్ ఇమెయిల్‌ల కోసం చూడమని, బిట్‌కాయిన్ చెల్లింపులను డిమాండ్ చేస్తూ ఏమైనా మెయిల్స్ వచ్చాయో చెక్ చేసుకోవాలని స్పష్టం చేసింది. హానిచేయని సమాచారం కూడా సోషల్ ఇంజనీరింగ్ దాడుల్ని సృష్టించడానికి సంకేతాలు అని సైబర్ నిపుణులు చెబుతున్నారు. ఇది వినియోగదారులను సున్నితమైన డేటాను పంచుకునేలా చేస్తుంది.

షైనీహంట్స్‌కు ప్రధాన సైబర్ దాడులకు సంబంధించి సుదీర్ఘ చరిత్ర ఉంది. గతంలో శాంటాండర్, AT&T లకు సంబంధించిన ఉల్లంఘనలతో సంబంధం కలిగి ఉంది. ఇప్పుడు ఇది అత్యంత ప్రమాదకరమైన హ్యాకర్ గ్రూపులలో ఒకటిగా నిలిచింది. బాధితులపై మరింత ఒత్తిడి తెచ్చేందుకు హ్యాకర్లు సమీప భవిష్యత్తులో డేటా లీక్ సైట్‌ను (DLS) ప్రారంభించే అవకాశం ఉందని గూగుల్ రిపోర్ట్ హెచ్చరించింది.

షైనీహంట్స్‌ను పర్యవేక్షిస్తున్నామని దీనికి సంబంధించి ఎప్పటికప్పుడు అప్‌డేట్ చేస్తామని గూగుల్ తెలిపింది. ఈ సమయంలో.. వినియోగదారులు తమ పాస్‌వర్డ్‌లను మార్చుకోవాలి, టూ-ఫాక్టర్ ప్రామాణీకరణను ధ్రువీకరించాలి. అనుమానాస్పద ఇమెయిల్‌లు లేదా కాల్‌ల పట్ల జాగ్రత్తగా ఉండాలి.