నాడే చనిపోయిన గాజా మిలిటరీ చీఫ్.. ఎట్టకేలకు కన్ఫార్మ్ చేసిన హమాస్

ఇజ్రాయెల్ సైన్యం తాము నెలల క్రితం చంపినట్లు ప్రకటించిన హమాస్ సైనిక కమాండర్ మహమ్మద్ సిన్వార్ మరణాన్ని ఆ సంస్థ శనివారం అధికారికంగా ధ్రువీకరించింది. హమాస్ ఈ మరణంపై వివరాలు వెల్లడించనప్పటికీ.. ఇతర హమాస్ నాయకులతో పాటు మహమ్మద్ సిన్వార్ చిత్రాలను విడుదల చేస్తూ వారిని 'అమరవీరులు'గా అభివర్ణించింది. గాజా సైనిక చీఫ్‌గా వ్యవహరించిన మహమ్మద్ సిన్వార్.. హమాస్ సైనిక కమాండర్‌లలో అత్యంత ముఖ్యమైన వ్యక్తి. ముఖ్యంగా ఇతడు హమాస్ రాజకీయ విభాగం చీఫ్‌గా బాధ్యతలు నిర్వహించారు. 2023 అక్టోబర్ 7వ తేదీన ఇజ్రాయెల్‌పై జరిగిన భయంకరమైన దాడికి ప్రధాన సూత్రధారి అయిన యాహ్వా సిన్వార్ సోదరుడు. గతంలో ఇజ్రాయెల్ తన సైనిక చర్యలో యాహ్యా సిన్వార్‌ను అంతం చేసిందని ప్రకటించింది. అలాగే అతడి తమ్ముడు మహమ్మద్ సిన్వార్ మరణాన్ని కూడా ఇజ్రాయెల్ కొన్ని నెలల క్రితమే ధ్రువీకరించింది. అయితే హమాస్ దీనిపై ఎలాంటి క్లారిటీ ఇవ్వలేదు. కానీ తాజాగా ఈ విషయాన్ని హమాస్ అధికారికంగా ప్రకటించింది.

గాజాలోని ఇజ్రాయెల్ వైమానిక దాడుల్లో మే నెలలో మహమ్మద్ సిన్వార్ చనిపోయి ఉండవచ్చని ఇజ్రాయెల్ బలగాలు అప్పట్లోనే అంచనా వేశాయి. అయితే హమాస్ ఎప్పుడూ ఈ మరణాన్ని ధ్రువీకరించలేదు. కానీ తాజాగా మహమ్మద్ సిన్వార్ మరణించాడని ప్రకటించడంతో.. అతని స్థానంలోకి కొత్త వ్యక్తి వచ్చే అవకాశం ఉందని అంతా అంచనా వేస్తున్నారు. ముఖ్యంగా గాజా అంతటా హమాస్ సాయుధ దళాల కార్యకలాపాలను పర్యవేక్షించే.. ఇజ్ అల్-దిన్ హద్దాద్ బాధ్యతలు స్వీకరించే అవకాశం సమాచారం.

యాహ్యా సిన్వార్‌తో కలిసి అక్టోబర్ 7 దాడులను పర్యవేక్షించిన మహమ్మద్ సిన్వార్.. ఇజ్రాయెల్‌కు మోస్ట్ వాంటెడ్ ఉగ్రవాదుల జాబితాలో ఉండేవాడు. ఇజ్రాయెల్ భద్రతా బలగాలు అతడి కోసం దశాబ్దాలుగా వేట సాగించాయి. ఇతని మరణం ఇజ్రాయెల్ సైనిక విజయంగా భావిస్తున్నారు. అయితే ఈ పరిణామం గాజాలో ఉద్రిక్తతలను మరింత పెంచుతుందని నిపుణులు హెచ్చరిస్తున్నారు. ఇజ్రాయెల్ బలగాల దాడులకు హమాస్ ప్రతీకారం తీర్చుకుంటుందని, ఈ ప్రాంతంలో హింస మరింత పెరిగే అవకాశం ఉందని వారు చెబుతున్నారు. హమాస్ నాయకత్వానికి ఇది తీవ్రమైన దెబ్బ అయినప్పటికీ.. ఈ సంస్థకు కొత్త నాయకులను నియమించుకునే సామర్థ్యం ఉందని, పోరాటాన్ని కొనసాగించగలదని నిపుణులు పేర్కొన్నారు. చూడాలి మరి ఏం జరగనుంది అనేది.