ఉసిరికాయ ఉంటే చాలు, జుట్టు రాలడం తగ్గి ఒత్తుగా పెరుగుతుంది

వర్షాకాలం వాతావరణం ఆహ్లాదకరంగా ఉన్నా.. అనేక సమస్యల్ని తీసుకువస్తుంది. ఆరోగ్య సమస్యలతో పాటు జుట్టు ఆరోగ్యాన్ని కూడా దెబ్బతీస్తుంది. వర్షాకాలంలో జుట్టు రాలడం ఎక్కువగా ఉంటుంది. చాలా మందికి చిన్న వయసులోనే జుట్టు ఎక్కువగా రాలిపోతుంటుంది. చాలా మంది జుట్టు రాలడం తగ్గడానికి అనేక పద్ధతులు అవలంభిస్తారు. కొందరు మార్కెట్లో దొరికే ఖరీదైన రసాయనాలతో నిండి ఉన్న ప్రొడక్ట్స్ వాడుతుంటారు.

అయితే, వీటి వాడకం వల్ల అంత ప్రయోజనాలు ఉండకపోవచ్చు. అయితే, ఇలాంటి వారికి ఉసిరికాయ మేలు చేస్తుందని ఆయుర్వేద నిపుణులు అంటున్నారు. ఇందులో ఉండే విటమిన్ సి, యాంటీ ఆక్సిడెంట్లు, యాంటీ బ్యాక్టీరియల్ లక్షణాలు జుట్టుకు మేలు చేస్తాయి. జుట్టు రాలడం, పల్చగా ఉన్న జట్టు వంటి సమస్యల్ని ఎదుర్కోవడంలో సాయపడుతుంది. అయితే, ఉసిరిని ఎలా వాడాలో తెలుసుకుందాం.

ఉసిరి నూనె

ఉసిరి నూనె జుట్టు సంరక్షణలో ఎంతో కీలక పాత్ర పోషిస్తుంది. దీనిని మార్కెట్ నుంచి కొనుగోలు చేయవచ్చు. లేదంటే ఇంట్లోనే తయారు చేసుకోవచ్చు. ఈ నూనెను తయారు చేయడం కోసం ఎండిన ఉసిరి ముక్కలను కొబ్బరి లేదా బాదం నూనెలో తక్కువ మంట మీద వేడి చేసి, చల్లారిన తర్వాత ఫిల్టర్ చేయండి. ఈ నూనెతో తలకు బాగా మసాజ్ చేయండి. 1-2 గంటలు లేదా రాత్రంతా అలాగే ఉంచండి. ఆ తర్వాత తేలికపాటి షాంపూతో వాష్ చేసుకోండి. వారానికి 2-3 సార్లు వాడటం వల్ల జుట్టు రాలడం తగ్గుతుంది. అంతేకాకుండా జుట్టు ఒత్తుగా పెరుగుతుంది.

ఉసిరిపొడితో హెయిర్ మాస్క్

జుట్టు కోసం ఉసిరి పొడి కూడా మంచి ఆప్షన్ అంటున్నారు ఆయుర్వేద నిపుణులు. ఉసిరి పొడి మార్కెట్లో దొరుకుతుంది. ఇది జుట్టు కుదుళ్ల నుంచి చివర్ల వరకు తగిన పోషణ ఇస్తుంది. హెయిర్ మాస్క్ కోసం ముందుగా రెండు - మూడు టీ స్పూన్ల ఉసిరి పొడిని నీరు, పెరుగు లేదా కొబ్బరిపాలతో అవసరాన్ని బట్టి కలిపి మృదువైన పేస్ట్ తయారు చేసుకోండి. ఈ పేస్ట్‌ను తలకు, జుట్టుకు బాగా అప్లై చేయండి. 30-45 నిమిషాల తర్వాత జుట్టు వాష్ చేసుకోండి. పెరుగుతో కలిపితే జుట్టు మృదువుగా, మెరుస్తూ ఉంటుంది. కొబ్బరి పాలతో కలిపితే జుట్టుకు లోతైన పోషణ లభిస్తుంది.

ఉసిరి నీరు

ఉసిరి నీరు జుట్టుకు సహజ కండిషనర్‌గా పనిచేస్తుంది. ఇది జుట్టు సహజ మెరుపును పెంచడంలో, కుదుళ్లను బలంగా చేయడంలో సాయపడుతుంది. ఇందుకోసం ఒక గుప్పెడు ఎండిన ఉసిరి ముక్కల్ని రాత్రంతా నీటిలో నానబెట్టండి. మరుసటి రోజు ఉదయం ఈ నీటిని ఫిల్టర్ చేయండి. ఇది వాడటం కూడా చాలా ఈజీ. షాంపూతో తలస్నానం చేసిన తర్వాత ఉసిరి నీటితో జుట్టును బాగా కడగాలి. 5-10 నిమిషాలు అలాగే ఉంచండి. ఆ తరువాత సాధారణ నీటితో శుభ్రం చేసుకోండి. ఇది జుట్టు సహజ మెరుపును పునరద్దరిస్తుంది.

ఉసిరి రసం

మీరు తాజా ఉసిరి తీసుకుంటుంటే, అది జుట్టుకు చాలా మంచిది. తాజా ఉసిరి రసం విటమిన్-సి కి ఉత్తమ మూలం. ఇది జుట్టుకు తగిన పోషణనిచ్చి.. రాలడాన్ని నివారిస్తుంది. ఇందుకోసం తాజా ఉసిరికాయల్ని తీసుకుని వాటిని ముక్కలు ముక్కలుగా కట్ చేసుకోండి. ఆ ముక్కల్ని జ్యూసులా చేసుకోండి. ఈ రసాన్ని కొబ్బరి నూనెతో కలిపి వాడవచ్చు. లేదంటే డైరెక్టుగా వాడవచ్చు. ఈ రసాన్ని నేరుగా తలకు పట్టించి 20-30 నిమిషాలు అలాగే ఉంచండి. ఆ తర్వాత జుట్టును వాష్ చేసుకోండి. ఇది కుదుళ్లను శుభ్రపరచడం ద్వారా కొత్త జుట్టు పెరగడానికి సాయపడుతుంది. చుండ్రును దూరంగా ఉంచుతుంది.

ఆహారంలో చేర్చుకోండి

జుట్టుకు బాహ్య చికిత్సతో పాటు.. అంతర్గత పోషణ కూడా అంతే ముఖ్యం. అందుకే ఉసిరికాయని మీ ఆహారంలో చేర్చుకోండి. ఉసిరి తినడం వల్ల శరీరానికి అవసరమైన పోషకాలు లభిస్తాయి. ముఖ్యంగా విటమిన్ సి, యాంటీ ఆక్సిడెంట్లు లభిస్తాయి. ఇవి జుట్టు ఆరోగ్యాన్ని నేరుగా ప్రభావితం చేస్తాయి. మీరు ప్రతిరోజూ ఒక ఉసిరికాయను తినండి. లేదంటే ఉసిరి మిఠాయి (ఉసిరి క్యాండీ), ఉసిరి రసం లేదా పొడి రూపంలో కూడా తీసుకోవచ్చు. గోరువెచ్చని నీటిలో ఉసిరి పొడి కలుపుకుని తాగడం చాలా మంచిది. కావాలనుకుంటే రుచి కోసం తేనె కూడా యాడ్ చేయవచ్చు. ఇలా ఉసిరి జుట్టు ఆరోగ్యానికి ఎంతో మేలు చేస్తుందని ఆయుర్వేద నిపుణులు అంటున్నారు.