పాక్ ప్రధానిని పట్టించుకోని మోదీ, పుతిన్, జిన్‌పింగ్

చైనాలోని టియాంజిన్ నగరంలో జరిగిన ప్రతిష్ఠాత్మక షాంఘై సహకార సంస్థ (SCO) సదస్సు ప్రపంచ దేశాల దృష్టిని ఆకర్షించింది. ఈ సదస్సులో జరిగిన ఒక ప్రత్యేక సంఘటన ఇప్పుడు అంతర్జాతీయ మీడియాలో, సామాజిక మాధ్యమాల్లో ప్రధాన చర్చనీయాంశంగా మారింది. ముఖ్యంగా భారత ప్రధాని నరేంద్ర మోదీ, రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్‌పింగ్‌ల ఒకరినొకరు ఆప్యాయంగా పలకరించుకుంటూ నవ్వులు కురిపిస్తూ అటూ ఇటూ తిరిగారు. కానీ వీరిందరి మధ్య పాకిస్థాన్ ప్రధాని షెహబాజ్ షరీఫ్ మాత్రం ఒంటరిగా ముఖం మాడ్చుకుని కనిపించారు. ప్రస్తుతం ఇందుకు సంబంధించిన వీడియో సోషల్ మీడియాలో తెగ వైరల్ అవుతోంది.

సదస్సు ప్రారంభానికి ముందు ప్రధాని నరేంద్ర మోదీ, అధ్యక్షుడు పుతిన్, అధ్యక్షుడు జిన్‌పింగ్‌లు ముగ్గురూ కలిసి రావడం, కరచాలనాలు చేసుకోవడం, ఒకరితో ఒకరు నవ్వుకుంటూ సరదాగా మాట్లాడుకోవడం ఒక వీడియోలో స్పష్టంగా కనిపించింది. అయితే సదస్సులో పాల్గొన్న కీలక దేశాల అధినేతల మధ్య కనిపించిన ఈ అపూర్వ స్నేహపూరిత వాతావరణం అందరి దృష్టిని ఆకర్షించింది. ఈ సంఘటనకు సంబంధించిన ఫోటోలు, వీడియోలు వెంటనే వైరల్ అయ్యాయి. ఈ ముగ్గురు నేతలు ఎంత సఖ్యంగా ఉన్నారో ఆ దృశ్యాలు తెలియజేయగా అంతా వీటిని చూస్తూ తెగ సంబుర పడిపోతున్నారు.

మరోవైపు ఈ ముగ్గురు నేతల మధ్య ఆప్యాయత కనిపిస్తుండగా.. దీనికి పూర్తి భిన్నంగా పాకిస్థాన్ ప్రధాని షెహబాజ్ షరీఫ్ ఒంటరిగా కనిపించారు. ప్రధాని మోదీ, అధ్యక్షుడు పుతిన్‌లు నవ్వుకుంటూ వెళ్తుండగా.. పక్కనే ఉన్న షరీఫ్‌ను ఏమాత్రం పట్టించుకోలేదు. ఈక్రమంలోనే ఆయన ముఖం మాడ్చుకుని కనిపించారు. ఆయనతో ఎవరూ మాట్లాడకపోవడంతో సీరియస్‌గా చూస్తూ ఉండిపోయారు. ప్రస్తుతం ఇందుకు సంబంధించిన ఫొటోలు, వీడియోలు సోషల్ మీడియాలో తెగ వైరల్ అవుతున్నాయి. ముఖ్యంగా షెహబాజ్ షరీఫ్ ముఖం మాడ్చుకుని ఉన్న ఫొటోలను చాలా మంది ట్రోల్ చేస్తున్నారు. మోదీతో పెట్టుకుంటే ఇలాగే ఉంటుందని చెప్పుకొస్తున్నారు.

ప్రధాని మోదీకి ఉన్న విలువ మీకు ఉండదంటూ వివరిస్తున్నారు. ప్రపంచంలోని అనేక దేశాలు భారత్‌తోనే స్నేహం కోరుకుంటాయని.. పాకిస్థాన్ పక్కనే పెడతాయంటూ పేర్కొంటున్నారు. ఇదిలా ఉండగా.. ఈ సదస్సులో ఫ్యామిలీ ఫోటో సెషన్‌లోనూ, ఆ తర్వాత జరిగిన విందులోనూ మోదీ, షరీఫ్‌లు ఒకరికొకరు దూరంగా నిలబడ్డారు. ఈ సంఘటన భారత్-పాకిస్థాన్ మధ్య ఉన్న ప్రస్తుత దౌత్య సంబంధాల స్థితిని స్పష్టంగా ప్రతిబింబిస్తోంది.