సుంకాలు లేకపోతే అమెరికా పూర్తిగా నాశనమవుతుంది: కోర్టు తీర్పుపై ట్రంప్

అగ్రరాజ్యం అమెరికా అధ్యక్షుడు డొనాల్డ్ ట్రంప్ తన వాణిజ్య విధానానికి కీలకమైన సుంకాల విషయంలో.. అమెరికా ఫెడరల్ అప్పీల్స్ కోర్టు ఇచ్చిన తీర్పుపై తీవ్రంగా స్పందించారు. ఈ తీర్పు చట్టానికి అనుగుణంగా లేదని ఆయన ధ్వజమెత్తారు. టారిఫ్‌లు లేకపోతే అమెరికా ఆర్థికంగా పూర్తిగా నాశనం అవుతుందని, దేశ సైనిక శక్తి కూడా నామమాత్రంగా మారిపోతుందని హెచ్చరించారు.

తన సొంత సోషల్ మీడియా ప్లాట్‌ఫామ్ ట్రూత్ సోషల్‍‌లో ట్రంప్ ఈ తీర్పుపై స్పందించారు. ముఖ్యంగా ఈ తీర్పు ఇచ్చిన న్యాయమూర్తుల బృందాన్ని 'రాడికల్ లెఫ్ట్ గ్రూప్'గా అభివర్ణించారు. 7-4 నిష్పత్తితో వచ్చిన ఈ తీర్పు సరైనది కాదని.. కానీ ఈ బృందంలో ఉన్న ఒకే ఒక్క డెమోక్రటిక్, ఒబామా నియమించిన న్యాయమూర్తి మాత్రం దేశాన్ని కాపాడేందుకు ఓటు వేశారని ఆయన ప్రశంసించారు. ఆయనకు తన ధన్యవాదాలు తెలియజేస్తున్నానని.. ఆయనకు దేశం పట్ల గౌరవం మరియు ప్రేమ ఉందని ట్రంప్ పేర్కొన్నారు.

"టారిఫ్‌లు లేకపోతే.. మేము ఇప్పటికే సంపాదించిన ట్రిలియన్ల డాలర్ల ఆదాయం మాకు రాదు. సుంకాలు లేకపోతే మన దేశం పూర్తిగా నాశనమవుతుంది. సైనిక శక్తి కూడా తక్షణమే కనుమరుగైపోతుంది" అని ట్రంప్ తన పోస్టులో రాసుకొచ్చారు. "7కి 4 అభిప్రాయంతో ఒక రాడికల్ లెఫ్ట్ గ్రూప్ న్యాయమూర్తులు తమకిష్టం వచ్చి తీర్పును వెలువరించారు. కానీ ఒబామా నియమించిన ఒక డెమోక్రాట్ మాత్రం నిజంగా మన దేశాన్ని కాపాడేందుకు ఓటు వేశారు. నేను ఆయన ధైర్యానికి ధన్యవాదాలు చెప్పాలనుకుంటున్నాను. ఆయన అమెరికాను ప్రేమిస్తారు, గౌరవిస్తారు" అని ట్రంప్ తన అభిప్రాయాన్ని వెలిబుచ్చారు.

ఫెడరల్ అప్పీల్ కోర్టు ఇచ్చిన తీర్పుతో తీవ్ర అసంతృప్తి చెందిన ట్రంప్ ఈ రకమైన వ్యాఖ్యలు చేశారు. ముఖ్యంగా న్యాయమూర్తుల బృందం.. అత్యవసర అధికారాలను ఉపయోగించి దిగుమతి సుంకాలు విధించడం ద్వారా ట్రంప్ తన అధికారాన్ని అతిక్రమించారని పేర్కొంది. టారిఫ్‌లు, పన్నులు విధించే అధికారం అమెరికా రాజ్యాంగం ప్రకారం కాంగ్రెస్‌కు మాత్రమే ఉందని.. ఈ విషయంలో ట్రంప్ తన కార్యనిర్వాహక అధికారాన్ని అనవసరంగా అతిక్రమించారని కోర్టు నొక్కి చెప్పింది. అలాగే ఈ తీర్పును అక్టోబర్ వరకు తాత్కాలికంగా నిలిపివేస్తున్నట్లు ప్రకటించింది. ఇలా ఈ నిర్ణయాన్ని యూఎస్ సుప్రీం కోర్టులో సవాలు చేసేందుకు కోర్టు అనుమతి ఇచ్చింది. ట్రంప్ కూడా అప్పీళ్ల కోర్టు తీర్పుపై సుప్రీం కోర్టులో పోరాడనున్నారు.

తీర్పు వెలువడిన వెంటనే ట్రంప్ దీనిపై స్పందించారు. తీవ్ర ఆగ్రహం వ్యక్తం చేస్తూనే.. అన్ని టారిఫ్‌లు అమలులో ఉంటాయని.. హైలీ పార్టిసన్ అప్పీల్స్ కోర్టు తప్పుడు తీర్పు ఇచ్చిందని పేర్కొన్నారు. ఈ తీర్పు "దేశానికి ఒక పెద్ద విపత్తు” అని వ్యాఖ్యానించారు. అలాగే ఈ సుంకాలు అమెరికా పరిశ్రమలను రక్షించడంలో, ఉపాధిని పెంచడంలో ముఖ్యమైన పాత్ర పోషించాయని వాదించారు.