అనారోగ్య సమస్యలపై క్లారిటీ ఇచ్చేసిన అధ్యక్షుడు

అగ్రరాజ్యం అమెరికా అధ్యక్షుడు డొనాల్డ్ ట్రంప్ చనిపోయారంటూ సామాజిక మాధ్యమాల్లో వైరల్‌గా మారిన పుకార్లపై.. స్వయంగా ఆయనే స్పందించారు. తన ఆరోగ్యంపై వస్తున్న ఊహాగానాలను తీవ్రంగా ఖండిస్తూ.. "నా జీవితంలో ఇంత ఆరోగ్యంగా ఎప్పుడూ లేను" అని స్పష్టం చేశారు. ఈ ప్రకటనతో ఆయన మద్దతుదారుల్లో నెలకొన్న ఆందోళన ఒక్కసారిగా తగ్గిపోయింది.

డొనాల్డ్ ట్రంప్ ఆరోగ్యంపై గత కొన్ని రోజులుగా పెద్ద ఎత్తున వార్తలు వస్తున్నాయి. ముఖ్యంగా ఆయన చేతులు, కాళ్లపై గాయాలు ఉండడం, వాటిని కవర్ చేసేందుకు ట్రంప్ మేకప్ వేసుకుని మీడియాకు దొరికిపోవడంతో.. అంతా ఆయన ఏదో అనారోగ్య సమస్యతో బాధ పడుతున్నారిన భావించారు. ఇందుకు సంబంధించిన ఫొటోలు సోషల్ మీడియాలో వైరల్ కావడంతో.. ట్రంప్ ఆరోగ్యంపై పెద్ద ఎత్తున పుకార్లు వచ్చాయి. ముఖ్యంగా దీనిపై అమెరికా ఉపాధ్యక్షుడు జేడీ వాన్స్ స్పందిస్తూ.. ట్రంప్ ఆరోగ్యం బాగానే ఉందని చెప్పారు. కానీ ఏదైనా అనుకోని భయంకరమైన విషాదం జరిగితే తానే అధ్యక్ష పదవీ బాధ్యతలు చేపడతానని ప్రకటించారు.

జేడీ వాన్స్ ఇలా ప్రకటించడంతో ట్రంప్ ఆరోగ్యంపై మరింత అనుమానం పెరిగింది. ముఖ్యంగా ఎవరికి తోచినట్లుగా వారు వార్తలు రాసుకుంటూ వచ్చారు. కొందరు అయితే ఏకంగా ట్రంప్ చనిపోయారని ప్రచారం ప్రారంభించారు. ముఖ్యంగా ట్రంప్ డెడ్ యాష్‌ట్యాగ్‌ను నెట్టింట ట్రెండ్ చేశారు. ఈక్రమంలోనే ట్రంప్ శనివారం రోజు గోల్ఫ్ ఆడుతున్న ఓ ఫొటోను పోస్ట్ చేసి అందరికీ తాను ఆరోగ్యంగానే ఉన్నానని చెప్పకనే చెప్పారు. కానీ దీన్ని కూడా కొంతమంది సోషల్ మీడియా వినియోగదారులు 'నకిలీ' అని కొట్టిపారేశారు. దీంతో ట్రంప్ మద్దతుదారుడు, ప్రముఖ రాజకీయ వ్యాఖ్యాత డీసీ డ్రైనో ఓ పోస్టు పెట్టారు.

"జో బైడెన్ వారాలపాటు ప్రజల ముందుకు రాకుండా ఉంటారు. కానీ మీడియా ఆయన 'చురుగ్గా', 'ట్రంప్ పట్ల ఎంతో ఉత్సాహంగా' ఉన్నారని చెబుతుంది. ఇలాగే ఆయన డైపర్‌లు ధరించి నిద్రపోతున్నారు. అయినా ఇదేమీ పెద్ద సమస్య కాదు. కానీ ట్రంప్ 24 గంటలు కనిపించకపోతే మీడియా గగ్గోలు పెడుతోంది. ఇది హాస్యాస్పదమైన ద్వంద్వ ప్రమాణం. అమెరికా చరిత్రలోనే అందరి అధ్యక్షుల కంటే ట్రంప్ ఎక్కువ సమయం ప్రజా పనుల్లో గడిపారు" అని వివరించారు. దీనికి స్పందించిన ట్రంప్.. "నా జీవితంలో ఇంత ఆరోగ్యంగా ఎప్పుడూ లేను" అని ఒకే వాక్యంలో సమాధానం ఇచ్చారు.

ట్రంప్ ఆరోగ్యంపై ఆందోళనలు ఈ ఏడాది ప్రారంభం నుంచే మొదలయ్యాయి. ఆయన చేతి వెనుక భాగంలో ఒక పెద్ద గాయం కనిపించింది. కొన్ని రోజుల తర్వాత ఆయన అరచేతిపై కూడా కొన్ని గాయాలు కనిపించాయి. ట్రంప్ బృందం ఆ గాయాలను కవర్ చేయడానికి పలుమార్లు ప్రయత్నించింది. మేకప్ వేస్తూ మీడియా కంటపడింది. ఇలా ఆయన ఆరోగ్య సమస్యలు వెలుగులోకి వచ్చాయి. దీంతో పుకార్లను తగ్గించడానికి వైట్‌హౌస్ ఆయన ఆరోగ్య సమస్య గురించి వెల్లడించింది. తరచుగా వేలాది మందితో ట్రంప్ కరచాలనం చేయడం వల్లే ఆయనకు ఆ గాయాలు వచ్చాయని పేర్కొంది.

కానీ ఆ తర్వాత ట్రంప్ కాళ్లపై కూడా వాపులు రావడంతో.. వైట్ హౌస్ వైద్యుడు డాక్టర్ సీన్ బార్బబెల్లా ట్రంప్‌కు "క్రానిక్ వీనస్ ఇన్సఫిషియన్సీ" అనే వ్యాధి ఉన్నట్లు నిర్ధారించారు. ఇది 70 సంవత్సరాల కంటే ఎక్కువ వయస్సు ఉన్నవారిలో సాధారణంగా కనిపించే ఒక ప్రమాదకరం కాని పరిస్థితి అని స్పష్టం చేశారు. ఈ రకమైన వ్యాధి సిరల్లో రక్త ప్రసరణ సరిగా లేకపోవడం వల్ల ఏర్పడుతుందన్నారు.