పిల్లల్లో షుగర్ ఉంటే ఎలాంటి లక్షణాలు కనిపిస్తాయో తెలుసా

డయాబెటిస్ కేసులు క్రమంగా పెరుగుతున్నాయి. ఇన్సులిన్ లేకపోవడం లేదా ఇన్సులిన్ నిరోధకత కారణంగా, రక్తంలో చక్కెరను నియంత్రించడం చాలా కష్టమవుతుంది. దీని కారణంగా రక్తంలో షుగర్ లెవల్స్ అదుపు తప్పుతాయి. ఈ పరిస్థితిని డయాబెటిస్ అంటారు. సాధారణంగా డయాబెటిస్ పెద్దవారికి మాత్రమే వస్తుందనుకుంటారు. అయితే, మారుతున్న జీవనశైలి కారణంగా ఈ వ్యాధి పిల్లల్ని కూడా ప్రభావితం చేస్తుంది. ఇది చాలా ఆందోళన కలిగించే విషయం.

కానీ సరైన సమాచారం లేకపోవడం వల్ల ఇది ఆలస్యంగా గుర్తించబడుతుంది. ఇది క్రమంగా పెరుగుతుంది. డాక్టర్ మాధవి పిల్లలలో డయాబెటిస్ చాలా వేగంగా పెరుగుతోందని చెప్పారు. దీనిని సకాలంలో గుర్తించి జాగ్రత్త తీసుకోవడం చాలా ముఖ్యం అని అన్నారు. పిల్లలలో డయాబెటిస్ కేసులు (ముఖ్యంగా టైప్ 1) వేగంగా పెరుగుతున్నాయి. నిపుణుల అభిప్రాయం ప్రకారం పిల్లల్లో కొన్ని లక్షణాల ద్వారా వారిలో షుగర్ వ్యాధిని గుర్తించవచ్చు. ఆ లక్షణాలేంటో ఇప్పుడు తెలుసుకుందాం.

  తరచుగా మూత్ర విసర్జన

రక్తంలో చక్కెర చాలా ఎక్కువగా ఉన్నప్పుడు.. శరీరం మూత్రం ద్వారా అదనపు గ్లూకోజ్‌ను వదిలించుకోవడానికి ప్రయత్నిస్తుంది. దీనివల్ల రాత్రిపూట తరచుగా టాయిలెట్‌కు వెళ్లాల్సిన అవసరం ఏర్పడుతుంది. మీ పిల్లలు రాత్రి సమయాల్లో ఎక్కువగా మూత్ర విసర్జన చేస్తుంటే అలర్ట్ అవ్వాలని డాక్టర్ సూచిస్తున్నారు. డయాబెటిస్ ఉంటే పిల్లలకు టాయిలెట్ అలవాటు ఉన్నప్పటికీ, నిద్రపోతున్నప్పుడు మంచం తడపడం జరుగుతుంది.

అధిక దాహం

అధిక మూత్ర విసర్జన వల్ల డీహైడ్రేషన్ ఏర్పడుతుంది. దీంతో పిల్లలకు అసాధారణంగా దాహం వేస్తుంది. రక్తంలో చక్కెర స్థాయిలు పెరగడం వల్ల అధిక దాహం ఏర్పడుతుంది. మీ పిల్లలు అకస్మాత్తుగా అవసరమైన దానికంటే ఎక్కువ నీరు తాగడం ప్రారంభించినట్లయితే లేదా తరచుగా దాహం వేస్తే, అది మధుమేహానికి సంకేతం కావచ్చు. ఈ లక్షణం కనిపిస్తే పిల్లల్ని నిపుణుల దగ్గరికి తీసుకువెళ్లడం ముఖ్యం.

స్పష్టమైన కారణం లేకుండా బరువు తగ్గడం

ఇన్సులిన్ సమస్యల కారణంగా కణాలు గ్లూకోజ్‌ను గ్రహించలేనప్పుడు, శరీరం శక్తి కోసం కొవ్వు బర్న్ చేస్తుంది. అంతేకాకుండా కండరాలను విచ్ఛిన్నం చేయడం ప్రారంభిస్తుంది. పిల్లలు ఏ కారణం లేకుండా బరువు తగ్గడం మీరు గమనించినట్లయితే అలర్ట్ అవ్వాలని నిపుణులు సూచిస్తున్నారు. పిల్లలు టైమ్‌కి తింటున్నా.. బరువు తగ్గితే మాత్రం అది డయాబెటిస్‌కి సంకేతం కావచ్చు. టైప్-1 డయాబెటిస్‌లో ఈ లక్షణం ఎక్కువగా కనిపిస్తున్నప్పటికీ, టైప్-2 డయాబెటిస్‌లో కూడా బరువు తగ్గవచ్చు.

అలసట లేదా బద్ధకం

కణాలలోకి తగినంత గ్లూకోజ్ ప్రవేశించకుండా, పిల్లల శరీరం సరిగ్గా పనిచేయడానికి అవసరమైన శక్తిని కోల్పోతుంది. నిరంతరం అలసట, ఆడుకోవడంలో ఉత్సాహం లేకపోవడం లేదా ఎక్కువగా నిద్రపోవడం మధుమేహం లక్షణాలు కావచ్చు. ఈ లక్షణాలు పిల్లల్లో కనిపిస్తే అలర్ట్ అవ్వాలని నిపుణులు సూచిస్తున్నారు.

అధిక ఆకలి

రక్తంలో చక్కెర అధికంగా ఉన్నప్పటికీ, కణాలకు శక్తి ఉండదు. ఇది ఆహారం ఎక్కువ తీసుకునేలా మెదడుకు సంకేతాలను పంపుతుంది. పిల్లలు నిరంతరం ఆకలితో ఉండి, భోజనం చేసిన వెంటనే ఆహారం అడిగితే తల్లిదండ్రులు అలర్ట్ అవ్వడం ముఖ్యం. ఆకలితో ఉండటం మధుమేహం లక్షణాల్లో ఒకటని డాక్టర్ అంటున్నారు.

పిల్లల్లో డయాబెటిస్‌కి కారణాలు

* పిల్లల్లో మధుమేహం రావడానికి అధిక బరువు లేదా ఊబకాయం ఒక ప్రధాన కారణం కావచ్చు. ఊబకాయం కారణంగా.. శరీరం ఇన్సులిన్‌ను సరిగ్గా ఉపయోగించుకోలేకపోతుంది. దీని కారణంగా రక్తంలో చక్కెర స్థాయి పెరుగుతుంది.

* మీ పిల్లలు శారీరకంగా తక్కువగా చురుకుగా ఉంటే, ఈ పరిస్థితిలో కూడా డయాబెటిస్ ప్రమాదం పెరుగుతుంది. తక్కువ శారీరక శ్రమ మధుమేహం ప్రమాదాన్ని పెంచుతుంది. ఇలాంటి పరిస్థితుల్లో బరువును అదుపులో ఉంచడం చాలా ముఖ్యం.

* కుటుంబంలో ఎవరికైనా అంటే తల్లిదండ్రులు, తాతామామలు లేదా తోబుట్టువులకు డయాబెటిస్ ఉంటే, పిల్లలకు ఈ వ్యాధి వచ్చే ప్రమాదం పెరుగుతుంది. డయాబెటిస్ జన్యుపరంగా కూడా వస్తుంది.