సింగిల్ బెడ్రూం అపార్ట్‌మెంట్ అద్దె నెలకు రూ.1.20 లక్షలంట

సాధారణంగా సింగిల్ బెడ్రూం రూమ్ రెంట్ అంటే ఎంత ఉంటుంది.. మన హైదరాబాద్‌లో అయితే ఏరియాను బట్టి చూసుకున్నా.. 6 వేల నుంచి 20 వేల రూపాయల వరకు ఉండవచ్చు. విత్ ఫర్నిచర్ అయితే రెంట్ మరి కాస్త ఎక్కువ ఉంటుంది. సరే కొన్ని ప్రాంతాల్లో ఇంకా ఎక్కువగానే ఉంటుంది అనుకుందాం. ఎంత ఎక్కువ అయినా సరే.. మన దగ్గర సింగిల్ బెడ్రూం ప్లాట్ రెంట్ మాత్రం లక్ష రూపాయల పైన అస్సలు ఉండదు. అంత మొత్తం పెట్టి రెంట్‌కు ఉండే బదులు.. అదే మొత్తాన్ని ఈఎంఐ కట్టుకుంటే.. సొంత ప్లాట్ వస్తుందని భావిస్తారు. సింగల్ బెడ్రూం ప్లాట్‌కు నెలకు రూ.1.20 లక్షల రెంట్ అంటే నమ్మశక్యంగా లేకపోయినా.. ఇది మాత్రం వాస్తవం అంటున్నారు ఓ రష్యన్ మహిళ. తాను సింగిల్ బ్రెడ్రూం అపార్ట్‌మెంట్‌కి నెలకు రూ.1.20 లక్షల రెంట్ కడుతున్నట్లు తెలిపి అందరిని ఆశ్చర్యపరిచారు. ఆ వివరాలు..

గుర్‌గ్రామ్‌లో ఒక రష్యన్ మహిళ తన నెలవారీ ఖర్చుల గురించి చెబుతూ పోస్ట్ చేసిన ఓ వీడియో నెట్టింట వైరల్‌గా మారింది. విక్టోరియా కోవన్ అనే రష్యన్ మహిళ తాను సింగిల్ బెడ్రూం అపార్ట్‌మెంట్‌కు నెలకు రూ. 1,20,000 అద్దె చెల్లిస్తున్నానని చెప్పి అందరిని షాక్‌కు గురి చేసింది. ఆమె చెప్పిన అద్దె చూసి చాలా మంది ఆశ్చర్యపోయారు. సాధారణంగా గుర్‌గ్రామ్‌లో ఇలాంటి ఫ్లాట్‌లు రూ. 8,000 నుంచి రూ. 23,000 మధ్యలో దొరుకుతాయంటున్నారు ఈ వీడియో చూసిన నెటిజనులు.

గుర్‌గ్రామ్‌లో మంచి జీవితం గడపాలంటే మీ జేబుల నిండ డబ్బులుండాలి అనే క్యాప్షన్‌తో ఆమె పోస్ట్ చేసిన వీడియోలో తన నెలవారీ ఖర్చుల గురించి ఇలా చెప్పుకొచ్చారు.

ఉబర్ బ్లాక్ ఒక్కో రైడ్‌కు రూ. 1,000

కరెంటు బిల్లు: రూ. 15,000

షాపింగ్: రూ. 30,000

మందులు: రూ. 20,000

సరుకులు: రూ. 40,000

వీడియో వైరల్ కావడంతో చాలా మంది ఆమె చెప్పిన రెంట్ చాలా ఎక్కువని.. అంత భారీ రెంట్లు లేవని కామెంట్ చేశారు. దీంతో సదరు మహిళ స్పందిస్తూ.. తాను ఫిర్యాదు చేయడం లేదని.. కేవలం గురుగ్రామ్‌లో మంచి జీవితం గడపాలంటే.. జేబు నిండా డబ్బులండాలని చెప్పడమే తన ఉద్దేశం అని చెప్పుకొచ్చారు. ఇక వీడియో చూసిన నెటిజనులు ఆమె చాలా వరకు ఖర్చులు తగ్గించుకోవచ్చని సలహా ఇస్తున్నారు. ఉబర్ బ్లాక్ బదులుగా సాధారణ ఉబర్ వాడుకోవచ్చు.. ఇంత రెంట్ చెల్లించే ఇంట్లో బదులు తక్కువ అద్దె ఉన్న అపార్ట్‌మెంట్‌కు మారవచ్చు.. అలానే షాపింగ్ ఖర్చులు కూడా తగ్గించుకోమని సలహా ఇస్తున్నారు.

మరొక యూజర్ రూ. 1,20,000 అద్దెనా.. అంత పెద్ద ఏరియాలో 4బీహెచ్‌కే ఫ్లాట్‌లో ఉంటే ఓకే. కానీ, అలా కాకపోతే మిమ్మల్ని ఎవరూ మోసం చేస్తున్నారు అని కామెంట్ చేశారు. మరో యూజర్ స్పందిస్తూ.. నెలకు రూ. 1,20,000 అద్దె కట్టే బదులు EMI కట్టి అపార్ట్‌మెంట్ కొనుక్కోవచ్చు సలహా ఇచ్చాడు. అంటే, అంత అద్దె కట్టే బదులు సొంత ఇల్లు కొనుక్కోవడం మంచిదని అతని ఉద్దేశం. ఈ వీడియో సోషల్ మీడియాలో పెద్ద చర్చకు దారితీసింది. గుర్‌గ్రామ్‌లో జీవన వ్యయం గురించి చాలామంది తమ అభిప్రాయాలను పంచుకున్నారు.