ఏపీలో దివ్యాంగుల పింఛన్ల వ్యవహారం.. వారికి షాక్ ఇవ్వనున్న ప్రభుత్వం

ఆంధ్రప్రదేశ్ వ్యాప్తంగా గత కొన్ని రోజులుగా దివ్యాంగుల పింఛన్ల వ్యవహారం హాట్ టాపిక్‌గా మారింది. దివ్యాంగుల పింఛన్లలో అనర్హులు ఎక్కువగా ఉన్నారని అనుమానిస్తున్న ఏపీ ప్రభుత్వం.. వారిని తొలగించేందుకు ఇటీవల కసరత్తు మొదలుపెట్టింది. అందులో భాగంగా ప్రత్యేక శిబిరాలను ఏర్పాటు చేసి వికలత్వ నిర్ధరణ పరీక్షలు నిర్వహించారు. ఈ పరీక్షల్లో వైకల్య శాతం 40 కంటే తక్కువగా ఉన్నవారికి ఎన్టీఆర్ భరోసా సామాజిక భద్రతా పింఛన్లు నిలుపుదల చేస్తున్నట్లు సచివాలయ సిబ్బంది ద్వారా నోటీసులు కూడా అందించారు. అలాగే అప్పీలు చేసుకునేందుకు అవకాశం ఇవ్వగా.. నోటీసులు అందుకున్న వారిలో 96 శాతానికి పైగా అప్పీలు చేసుకున్నారు. దీంతో సెప్టెంబర్ నెలకు సంబంధించి నోటీసులు అందుకున్న వారికి కూడా దివ్యాంగుల పింఛన్లను ప్రభుత్వం పంపిణీ చేసింది.

అయితే ఇదిలా ఉండగా.. గతంలో నకిలీ సదరం పత్రాలు ఇచ్చిన డాక్టర్లపై చర్యలు తీసుకోవాలని వికలాంగుల సంఘం కోరుతోంది. దివ్యాంగులలో నకిలీలను తొలగిస్తే అభ్యంతరం లేదని.. కానీ అర్హులకు మాత్రం అన్యాయం జరగకుండా చూడాలని ప్రభుత్వాన్ని కోరుతోంది. ఈ క్రమంలోనే నకిలీ సదరం సర్టిఫికేట్లు ఇచ్చిన వైద్యులపై చర్యలు తీసుకోవాలంటూ నవ్యాంధ్ర వికలాంగుల సేవాసమితి అధ్యక్షుడు షేక్‌ కాలేషా ఆంధ్రప్రదేశ్ ముఖ్యమంత్రి కార్యాలయంలో ఇటీవల అర్జీ ఇచ్చారు.

దీనిపై ఏపీ ముఖ్యమంత్రి కార్యాలయం స్పందించింది. సీఎం ముఖ్య కార్యదర్శి ఎం.రవిచంద్ర వీటిపై విచారణకు ఆదేశించారు. నెల రోజుల్లో చర్యలు తీసుకుని.. ఆ వివరాలను పీజీఆర్‌ఎస్‌ ఆన్‌లైన్‌ పోర్టల్‌లో ఉంచాలని సీఎం ముఖ్య కార్యదర్శి రవిచంద్ర.. ఏపీ వైద్య, ఆరోగ్యశాఖ ఉన్నతాధికారులను ఆదేశించారు. ఈ నేపథ్యంలో అధికారులు వీరిపై దృష్టి సారించినట్లు తెలిసింది.

మరోవైపు నోటీసులు అందుకున్న వారిలో చాలా మంది అప్పీలు చేసుకున్నారు. ఇలాంటి వారికి మరోసారి స్ర్కీనింగ్ చేయాలని ప్రభుత్వం నిర్ణయించింది. వారిని మరోసారి సదరం శిబిరానికి పిలిపించి స్క్రీనింగ్‌ చేయనున్నారు. వీరిలో వృద్ధాప్య పింఛనుకు అర్హులు ఎవరైనా ఉంటే వారిని ఆ జాబితాలోకి మారుస్తారు. పునఃపరిశీలన కూడా త్వరలోనే ముగియనుంది. రెండోసారి పునఃపరిశీలన తర్వాత కూడా బోగస్ అని తేలితే.. అలాంటి పింఛన్లపై త్వరలోనే నిర్ణయం తీసుకుంటారు. అలాగే నకిలీ సదరం సర్టిఫికేట్లు ఇచ్చిన వైద్యులపైనా చర్యలు తీసుకునే అవకాశం ఉన్నట్లు తెలిసింది.