అమెరికా వీసా ఇంటర్వూకి ఇకపై తిప్పలే.. ట్రంప్ సర్కారు కొత్త రూల్

అమెరికా వీసాల కోసం ఎదురు చూస్తున్న ఇండియన్లకు ట్రంప్ యంత్రాంగం మరో షాక్ ఇచ్చింది. వీసాలపై అమెరికా తాజాగా కొత్త రూల్ తెచ్చింది. దీని ప్రకారం ఇక నుంచి ఎవరైనా సరే నాన్- ఇమ్మిగ్రెంట్ వీసా ఇంటర్వ్యూకి తమ సొంత దేశం లేదా చట్టబద్ధంగా నివాసం ఉంటున్న దేశంలోనే అపాయింట్‌మెంట్ తీసుకోవాల్సి ఉంటుంది. ఈ నిబంధన తక్షణమే అమల్లోకి వస్తుందని అమెరికా ప్రభుత్వం తేల్చి చెప్పేసింది. సాధారణంగా వ్యాపారం, పర్యటకం కోసం బీ1, బీ2 వీసాలకు చాలామంది దరఖాస్తు చేసుకుంటారు.తాజా నిబంధన కారణంగా భారతీయులైన వ్యాపారులు, పర్యటకులకు ఇబ్బందులు తప్పకపోవచ్చు. వీళ్లు బీ1 (B1 Visa) (వ్యాపార), బీ2 (B2 Visa)(టూరిస్ట్‌) వీసాలను స్వల్ప వ్యవధిలో పొందడం సాధ్యం కాకపోవచ్చు.

గతంలో ఈ వీసా అపాయింట్‌మెంట్లను విదేశాల్లో బుక్‌ చేసుకొనే అవకాశం ఉండేది. ఇప్పుడు అది వీలుపడదు. కోవిడ్‌-19 సమయంలో వ్యాపార, పర్యాటక వీసాల జారీలో తీవ్ర జాప్యం ఏర్పడింది.. తాజా నిబంధనలతో మళ్లీ అలాంటి పరిస్థితే తలెత్తవచ్చు. నాన్‌ ఇమిగ్రెంట్‌ వీసాలను వ్యాపార, పర్యాటక, విద్య, తాత్కాలిక ఉద్యోగాలు, అమెరికా (USA) పౌరులతో వివాహం వంటి వాటికి సాధారణంగా ఇస్తుంటారు. సరికొత్త నిబంధన తక్షణమే అమల్లోకి వస్తుందని అమెరికా (USA) విదేశాంగశాఖ శనివారం వెల్లడించింది. ఈ నేపథ్యంలో దరఖాస్తుదారులు వారి స్వదేశాల్లో వీసా అపాయింట్‌మెంట్లను షెడ్యూల్‌ చేసుకోవాలని సూచించింది.

ప్రస్తుతం భారత్‌లో హైదరాబాద్‌, ముంబయిల్లోని అమెరికా కాన్సులేట్స్‌లో బీ 1, బీ 2 వీసాల ఇంటర్వ్యూలకు సుమారు మూడున్నర నెలల సమయం పడుతోంది. ఢిల్లీలో అయితే నాలుగు నెలలు, కోల్‌కతాలో ఐదు నెలలు, చెన్నైలో 9 నెలల సమయం తీసుకొంటోంది. సాధారణంగా భారతీయులు ఈ వీసాల ఇంటర్వ్యూల కోసం జర్మనీ, సింగపుర్‌, బ్యాంకాక్‌కు వెళుతుంటారని ట్రావెల్‌ ఏజెన్సీలు చెబుతున్నాయి. రెండేళ్ల కిందట ఫ్రాంక్‌ఫర్ట్‌లోని అమెరికా దౌత్య కార్యాలయం భారతీయుల కోసం ప్రత్యేకంగా ఇంటర్వ్యూలు కూడా నిర్వహించే ఏర్పాట్లు చేసింది. ఈ సందర్భంగా హెచ్‌-1బీ వీసాదారులు తమ ఇంటర్వ్యూల కోసం బ్రెజిల్‌, థాయ్‌ల్యాండ్‌లకు కూడా వెళ్లారు. అమెరికాలో వీసాల జారీలో ఇబ్బందుల వల్ల చాలామంది భారతీయ విద్యార్థులు ఇతర దేశాలపై దృష్టిపెట్టారు. గత కొన్ని నెలలుగా అగ్రరాజ్యానికి వెళ్లే విద్యార్థుల సంఖ్య గణనీయంగా తగ్గుతోందని గణంకాలు వెల్లడిస్తున్నాయి.

అమెరికా వీసా అప్లై చేసుకున్న వారికి ఆగస్టు 1, 2025 నుంచి ఇతరుల ద్వారా పాస్‌పోర్ట్‌ను తీసుకునే పద్ధతి రద్దు చేసింది. ఇకపై ఎవరు పాస్‌పోర్ట్‌ను వారే స్వయంగా తీసుకోవాలి, లేదా హోమ్ డెలివరీ కోసం వారు దరఖాస్తు చేసుకోవాలి. అంతే కానీ.. ఇంకెవరి చేతికీ మీ వీసా ఇవ్వడం కుదరదని ఇటీవలే వెల్లడించింది.