మానసిక వికలాంగులను చంపేయండి..: టీవీ యాంకర్ సంచలనం

మానసిక అనారోగ్యం ఉన్న నిరాశ్రయులపై అమెరికాలో ఒక ప్రముఖ టీవీ హోస్ట్ చేసిన వివాదాస్పద వ్యాఖ్యలు తీవ్ర దుమారం రేపాయి. ప్రముఖ కన్జర్వేటివ్ టాక్ షో 'ఫోక్స్ అండ్ ఫ్రెండ్స్'కు హోస్ట్‌గా వ్యవహరిస్తున్న బ్రియన్ కిల్‌మీడ్.. ఇండ్లు లేని మానసిక వికలాంగులకు విషపూరిత ఇంజక్షన్లు ఇచ్చి చంపేయాలని అన్నారు. ఆయన మీడియా ముఖంగా చేసిన ఈ కామెంట్లు అందరినీ ఆశ్చర్యానికి గురిచేశాయి. ఈ వ్యాఖ్యలపై విస్తృతంగా విమర్శలు రావడంతో ఆయన క్షమాపణలు చెప్పక తప్పలేదు. అలాగే తాను మాట్లాడిన తీరు చాలా అసహ్యంగా ఉందని, తన వ్యాఖ్యలు అత్యంత అసంబద్ధమైనవని ఆయన అంగీకరించారు.

కిల్‌మీడ్ ఈ వ్యాఖ్యలను గత బుధవారం తన షోలో చేశారు. నార్త్ కరోలినాలో జరిగిన ఒక ఉక్రేనియన్ మహిళ హత్య గురించి గురించి జరిగిన ఒక చర్చలో.. కిల్‌మీడ్‌తో పాటు ఆయన సహ-హోస్ట్ లారెన్స్ జోన్స్ పాల్గొన్నారు. ఈ సందర్భంగా లారెన్స్ జోన్స్ మాట్లాడుతూ.. మానసిక అనారోగ్యం ఉన్న నిరాశ్రయులు చికిత్సా కార్యక్రమాలను అంగీకరించాలి లేదా జైలుకు వెళ్లాలని అన్నారు. దీనికి బదులుగా కిల్‌మీడ్.. లేకపోతే విషపూరిత ఇంజక్షన్ ఇవ్వాలి లేదా మరేదైనా పద్దతిలో వాళ్లని చంపేయాలని అని వ్యాఖ్యానించారు.

ఈ వ్యాఖ్యలు అమెరికాలోనే కాకుండా అంతర్జాతీయ వ్యాప్తంగా తీవ్ర ఆగ్రహానికి కారణం అయ్యాయి. మానసిక ఆరోగ్య సమస్యలున్న నిరాశ్రయులపై ఇంతటి అమానవీయ వ్యాఖ్యలు చేయడంపై సోషల్ మీడియాలో, మీడియా వర్గాల్లో తీవ్ర విమర్శలు వెల్లువెత్తాయి. దీనిపై స్పందించిన కిల్‌మీడ్.. ఆదివారం తన షోలో క్షమాపణలు చెప్పారు. నేను చేసిన వ్యాఖ్యలకు క్షమాపణలు కోరుతున్నానన్నారు. అవి అత్యంత అసంబద్ధమైనవని ఒప్పుకున్నారు. మానసిక అనారోగ్యం ఉన్న నిరాశ్రయులందరూ నార్త్ కరోలినాలో హత్య చేసిన వ్యక్తిలా ప్రవర్తించరని తనకు తెలుసన్నారు. చాలా మంది నిరాశ్రయులకు మన సహానుభూతి , కరుణ అవసరం అని స్పష్టం చేశారు.

మనం సమాజంలో చూస్తున్న చాలా సమస్యలలో నిరాశ్రయుల సమస్య ఒకటని తెలిపారు. దీనికి అనేక కారణాలు ఉన్నాయని.. వాటిలో మానసిక అనారోగ్యం ఒక ప్రధాన సమస్యగా మారిందన్నారు. ఇలాంటి సున్నితమైన అంశంపై తానిలా మాట్లాడి ఉండకూడదని తెలిపారు. కానీ తన తప్పు తనకు తెలిసిందని, అందుకే క్షమాపణలు చెబుతున్నానని పునరుద్ఘాటించారు.