ఇండియన్ హత్యపై ట్రంప్ అంత రియాక్షన్ ఎందుకు

గతవారం అమెరికాలోని డల్లాస్‌లో ఓ భారతీయుడు దారుణ హత్యకు గురైన విషయం తెలిసిందే. ఓ మోటల్‌లో మేనేజర్‌గా పనిచేస్తున్న చంద్రమౌళి నాగమల్లయ్య (50)ను అతడి భార్య, కుమారుడి ఎదుటే దుండుగుడు కత్తితో నరికి అతి కిరాతకంగా హత్య చేశాడు. వాషింగ్ మిషన్ విషయంలో ఇరువురి మధ్య మొదలైన వాగ్వాదం.. హత్యకు దారితీసింది. నాగమల్లయ్య వద్ద పనిచేస్తోన్న క్యూబాకు చెందిన మార్టినెజ్‌ ఈ దారుణానికి ఒడిగట్టాడు. నిందితుడు కత్తితో వెంబడిస్తున్న సమయంలో బాధితుడ్ని భార్య, కుమారుడు రక్షించడానికి ప్రయత్నించారు.

అయినాసరే హంతకుడు చివరికి అతన్ని పట్టుకుని కత్తితో దాడి చేస్తూనే ఉన్నాడు. ఈ సమయంలో నాగమల్లయ్య జేబులో నుంచి మొబైల్ ఫోన్, కీ కార్డును తీసుకున్నాడు. అనంతరం తల నరికి మొండెం నుంచి వేరిచేసి.. దానిని డస్ట్‌బిన్ వద్దకు తన్నుకుంటూ వెళ్లిన అందులో పడేసిన భయానక వీడియో సోషల్ మీడియాలో వైరల్ అయ్యింది. హంతకుడ్ని పోలీసులు అరెస్ట్ చేసి.. అతడిపై పలు సెక్షన్ల కింద కేసు నమోదు చేశారు. మోటల్‌లో మార్టినెజ్‌ గదిని శుభ్రం చేస్తుండగా.. పగిలిపోయిన వాషింగ్‌ మెషీన్‌ను ఉపయోగించవద్దని నాగమల్లయ్య చెప్పాడు. అయితే, ఈ విషయాన్ని తనకు నేరుగా చెప్పకుండా మరో మహిళా ఉద్యోగి ద్వారా చెప్పించడంతో మార్టినెజ్ ఆగ్రహానికి గురయ్యాడు

ఎవరీ చంద్రమౌళి నాగమల్లయ్య?

కర్ణాటకకు చెందిన చంద్రమౌళి నాగమల్లయ్య (50) డాలస్‌ శామ్యూల్ బౌలేవార్డ్‌లోని డౌన్‌టౌన్ ష్యూట్స్ మోటల్‌లో గత ఐదేళ్లుగా మేనేజర్‌గా పనిచేస్తున్నాడు. అతడ్ని కుటుంబసభ్యులు, స్నేహితులు ‘బాబ్’ అని ముద్దుగా పిలుచుకుంటారు. నాగమల్లయ్య ఫేస్‌బుక్ ప్రొఫైల్ ప్రకారం.. బెంగళూరులోని ఇందిరా‌నగర్ కేంబ్రిడ్జ్ స్కూల్‌లో ప్రాథమిక విద్య తర్వాత.. బసవనగుడి నేషనల్ కాలేజీలో ఉన్నత విద్య చదివారు. బెంగళూరులో కొన్నాళ్లు ఉద్యోగం చేసిన ఆయన.. 2018లో అమెరికాకు వలస వెళ్లారు. తొలుత శాన్ ఆంటోనియాలో తర్వాత డాలస్‌కు వెళ్లి స్థిరపడ్డారు. ఆయనకు భార్య, కుమార్తె నిషా, కుమారుడు గౌరవ్ (18) ఉన్నారు. ఇటీవలే గౌరవ్ ప్లస్ 2 పూర్తిచేసి, కాలేజీలో చేరడానికి సిద్ధమవుతున్నాడు. నాగమల్లయ్య కుమారుడు హాస్పిటాలిటీ మేనేజ్‌మెంట్ డిగ్రీని పూర్తిచేయడానికి కుటుంబం ఇప్పటికే రూ.3 కోట్ల విరాళాలు సేకరించింది.

ట్రంప్ రియాక్షన్

మరోవైపు, నాగమల్లయ్య హత్యపై అమెరికా అధ్యక్షుడు డొనాల్డ్ ట్రంప్ తీవ్రంగా స్పందించారు. నిందితుడిపై పూర్తిస్థాయిలో చర్యలు తీసుకుంటామని హామీ ఇచ్చారు. ఇదే సమయంలో‘అక్రమ వలస నేరస్థుల పట్ల ఏమాత్రం ఉదాసీనత ప్రదర్శించకుండా అమెరికాను మళ్ళీ సురక్షితంగా’ ఉంచుతానని కూడా ఆయన ప్రతిజ్ఞ చేశారు.

‘టెక్సాస్‌లోని డల్లాస్‌లో చంద్ర నాగమల్లయ్య హత్యకు సంబంధించిన భయంకరమైన నివేదికల గురించి నాకు తెలుసు, ఆయనను క్యూబాకు చెందిన ఒక అక్రమ వలసదారుడు తన భార్య, కొడుకు ముందే దారుణంగా తల నరికి చంపాడు, నిందితుడు మన దేశంలో ఇక ఉండకూడదు’ అని ఆయన తన సొంత సామాజిక మాధ్యమం ట్రూత్ సోషల్‌లో పేర్కొన్నారు. ఈ క్రమంలో మార్టినేజ్‌ను గత జో బైడైన్ యంత్రాంగం వదలిపెట్టిందని విమర్శించారు. గతంలో చిన్నారులపై లైంగిక వేధింపులు సహా పలు భయంకర నేరాల్లో అరెస్టయ్యాడని పేర్కొన్నాడు. అలాంటి వ్యక్తిని బైడెన్‌ మన దేశానికి తీసుకొచ్చాడని, ఎందుకంటే క్యూబా ఇలాంటి దుర్మార్గులను తన దేశంలో ఉంచుకోవాలనుకోలేదని అన్నారు. ఇకపై అక్రమ వలసదారులపై ఊపేక్షించబోమని స్పష్టం చేశారు.