అర్షదీప్ సింగ్ పేరు చెప్పడం మర్చిపోయి,,హిట్మ్యాన్లా మారిపోతున్న సూర్యకుమార్
sports | Suryaa Desk | Published : Fri, Sep 19, 2025, 10:34 PM
టీమిండియా టీ20 కెప్టెన్ సూర్యకుమార్ యాదవ్ .. ఆసియాకప్లో ఒమన్తో మ్యాచ్లో టాస్ సందర్భంగా రోహిత్ శర్మను గుర్తు చేశాడు. టాస్ సమయంలో ఆటగాళ్ల పేరు చెప్పడం మర్చిపోయిన అతడు.. నేను రోహిత్లా మారిపోతున్నా.. అని నవ్వుతూ బదులిచ్చాడు. చాలా సేపు ఆలోచించినా.. ప్లేయింగ్ లెవెన్లో మార్పులను గురించి చెప్పలేకపోయాడు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్గా మారింది.
అసలేం జరిగిందంటే..
ఆసియాకప్ 2025 చివరి లీగ్ మ్యాచ్లో భారత్, ఒమన్ అబుదాబీ వేదికగా తలపడుతున్నాయి. ఈ మ్యాచ్లో టాస్ గెలిచిన టీమిండియా కెప్టెన్ సూర్యకుమార్ యాదవ్.. తొలుత బ్యాటింగ్ ఎంచుకున్నాడు. అయితే వ్యాఖ్యతగా ఉన్న రవిశాస్త్రి.. తుది జట్టులో మార్పులేమైనా ఉన్నాయా? అని సూర్యను అడిగాడు. దీంతో అప్పటివరకు బాగానే ఉన్న సూర్య ఒక్కసారిగా తుది జట్టులో మార్పులను మర్చిపోయాడు.
“హర్షిత్ రాణా తుది జట్టులోకి వచ్చాడు. ఇంకొకరు ఎవరంటే.. ఎవరంటే.. అదేంటి నేను రోహిత్ శర్మలా మారిపోయాను. ఏదోలే మొత్తంగా రెండు మార్పులతో ఈ మ్యాచ్లో బరిలోకి దిగాం” అని చెప్పి అక్కడి నుంచి వెళ్లిపోయాడు సూర్య. అర్షదీప్ సింగ్ పేరు చెప్పడం అతడు మర్చిపోయాడు. చాలా సేపు గ్రౌండ్లో అటూ ఇటూ చూసినా.. అతడికి అర్షదీప్ సింగ్ పేరు మాత్రం గుర్తుకు రాలేదు. చివరికి రవిశాస్త్రి పేరు చెప్పకపోయినా పర్లేదులే అని చెప్పడంతో సూర్యకుమార్ యాదవ్ అక్కడి నుంచి వెళ్లిపోయాడు.
ఈ వీడియో చూసిన నెటిజన్లు ఫన్నీ కామెంట్లు చేస్తున్నారు. సూర్యకుమార్ యాదవ్ రూపంలో మనకు రోహిత్ శర్మ లాంటి కెప్టెన్ దొరికాడని కామెంట్లు చేస్తున్నారు. రోహిత్ శర్మ సైతం గతంలో చాలాసార్లు టాస్ సమయంలో ఆటగాళ్ల పేరు చెప్పడం మర్చిపోయాడు. ఇక ఒమన్తో మ్యాచ్లో టీమిండియా తుది జట్టులో రెండు మార్పులు చేసింది. బుమ్రా, వరుణ్ చక్రవర్తి స్థానంలో హర్షిత్ రాణా, అర్షదీప్ సింగ్ను జట్టులోకి తీసుకుంది.
ఒమన్తో మ్యాచ్కు టీమిండియా తుది జట్టు ఇదే..
అభిషేక్ శర్మ, శుభ్మన్ గిల్, సంజూ శాంసన్ (వికెట్ కీపర్), సూర్యకుమార్ యాదవ్ (కెప్టెన్), తిలక్ వర్మ, శివమ్ దూబే, హార్దిక్ పాండ్యా, అక్షర్ పటేల్, హర్షిత్ రాణా, అర్ష్దీప్ సింగ్, కుల్దీప్ యాదవ్
|
|