టూరిస్ట్, వర్క్ వీసాలు బ్యాన్,,,బంగ్లాదేశ్ సహా 9 ముస్లిం దేశాలకు యూఏఈ షాక్

బంగ్లాదేశ్, అఫ్గనిస్థాన్ సహా మొత్తం తొమ్మిది దేశాల పౌరులకు యునైటెడ్ అరబ్ ఎమిరైట్స్ తాత్కాలికంగా టూరిస్ట్, వర్క్ వీసాలను రద్దుచేసిందని, ఈ నిషేధం తక్షణమే అమల్లోకి వస్తుందని పలు మీడియాల్లో కథనాలు వెలువడుతున్నాయి. అయితే, అధికారికంగా దీనిని ధ్రువీకరించకపోయినా.. మీడియాకు అందిన అంతర్గత ఇమ్మిగ్రేషన్ సర్క్యులర్ ఈ మార్పులను సూచిస్తుందని ఓ నివేదిక పేర్కొంది. ఈ ప్రకటన యూఏఈ 2026 వీసా నిషేధంలో భాగమని తెలిపింది. దాదాపు ఐదు ఆఫ్రికన్ దేశాలతో సహా నాలుగు ఆసియా దేశాల నుంచి వలస వచ్చిన వారిని ఇది ప్రభావితం చేస్తుంది. ఇప్పటికే యూఏఈ వీసాలు కలిగి ఉన్న వ్యక్తులపై ఈ నిషేధం ప్రభావం ఉండదు.

ఉగాండా, సూడాన్, సోమాలియా, కామెరూన్, లిబియా, ఆఫ్గనిస్థాన్, యెమెన్, లెబనాన్, బంగ్లాదేశ్‌‌లు యునైటెడ్ అరబ్ ఎమిరైట్స్ వీసాలు నిలిపివేసిన దేశాలు జాబితాలో ఉన్నాయి. అయితే, ఉగాండాలోని యూఏఈ రాయబారి అబ్దుల్లా హసన్ అల్‌షమ్షీ ఈ నివేదికను తోసిపుచ్చారు. ఉగాండా పౌరులకు వీసాలపై నిషేధానికి సంబంధించి ఎటువంటి అధికార ధ్రువీకరణ లేదని అన్నారు. మీడియాలో దీనిపై వస్తున్నవి తప్పుడు కథనాలని పేర్కొన్నారు.

మరోవైపు, బంగ్లాదేశ్ అధికారులు సైతం.. తమ పౌరులపై యూఏఈ వీసా నిషేధం విధించలేదని ఖండించారు. సోషల్ మీడియాలో తప్పుడు ప్రచారం జరుగుతోందని అన్నారు. యూఈఏలో బంగ్లాదేశ్ రాయబారి తారిఖ్ అహ్మద్ మాట్లాడుతూ.. టూరిస్ట్, వర్క్ వీసా బ్యాన్‌పై యునైటెడ్ అరబ్ ఎమిరైట్స్ అధికారులు ఎలాంటి ఉత్తర్వులు జారీచేయలేదని తేల్చిచెప్పారు. అయితే, 9 దేశాలకు యూఏఈ వీసా జారీపై నిషేధం విధించినట్టు పలు మీడియా సంస్థలు ఆన్‌లైన్‌లో కథనాలు ప్రచురించడం గమనార్హం.

దుబాయ్, ఉత్తర ఎమిరేట్స్‌లోని బంగ్లాదేశ్ కాన్సుల్ జనరల్ మహమ్మద్ రషెదుజ్జమాన్ ప్రకారం.. యూఏఈలో బంగ్లాదేశ్ జనాభా దాదాపు పది లక్షలు ఉంటుందని అంచనా వేశారు. గ్లోబల్ మీడియా ఇన్‌సైట్ ఈ సంఖ్య దాదాపు 0.84 మిలియన్లుగా పేర్కొంది. దీంతో భారతీయులు, పాకిస్థానీయుల తర్వాత ఆ దేశంలో మూడో అతిపెద్ద ప్రవాస సమూహంగా బంగ్లాదేశీయులు నిలిచారు. తమ పౌరులకు వీసా ప్రక్రియను మరింత సులభతరం చేసేలా యూఏఈతో చర్చలు జరుగుతున్నాయని, ఆదేశం ఆర్ధికవృద్ధిలో బంగ్లాదేశీయులు మరింతగా మిళితం కావాలనే ఆశాభావాన్ని రషెదుజ్జమాన్ వ్యక్తం చేశారు.