తల్లిదండ్రులు చనిపోతే ఆశ్రయం ఇచ్చి,,,12 ఏళ్ల బాలికను గర్భవతిని చేసిన బాబాయ్

విజయవాడ నగర శివారు పాయకాపురంలో అమానుష ఘటన చోటుచేసుకుంది. తల్లిదండ్రులు చనిపోయి.. అనాథలా ఉన్న బాలికను పిన్ని, బాబాయ్ ఇంటికి తీసుకువచ్చి పెంచుకుంటున్నారు. అయితే బాలికపై కన్నేసిన బాబాయ్.. పలుమార్లు ఆమెపై అత్యాచారానికి పాల్పడ్డాడు. కొన్నిసార్లు ఆ బాలికను బెదిరించి.. రేప్ చేశాడు. గత కొన్ని రోజులుగా ఆ బాలిక తీవ్ర అనారోగ్యంతో బాధపడుతుండగా.. ఆమెను ఆస్పత్రికి తరలించారు. ఆమెను పరీక్షించిన డాక్టర్లు.. బాలిక 3 నెలల గర్భంతో ఉన్నట్టు చెప్పడంతో ఆమె పిన్ని షాక్ అయింది. అసలు ఏం జరిగిందని ప్రశ్నించగా.. పూర్తి విషయం బయటికి వచ్చింది. బాబాయ్ చేసిన దారుణాలను ఆ బాలిక అందరికీ వెల్లడించింది. దీంతో కేసు నమోదు చేసుకున్న నున్న పోలీసులు.. నిందితుడిపై పోక్సో కేసు నమోదు చేశారు. ఆ బాలిక ప్రస్తుతం ఏడో తరగతి చదువుతోందని పోలీసులు వెల్లడించారు.

6 ఏళ్ల క్రితం బాలిక తల్లిదండ్రులు ఒక రోడ్డు ప్రమాదంలో ఒకేసారి చనిపోవడంతో.. ఆమెను పిన్ని, బాబాయ్ ఇంటికి తీసుకెళ్లి పెంచుకుంటున్నారు. ఈ క్రమంలోనే ఆ బాలిక వారి ఇంట్లో ఉండగా.. రాత్రి పూట అంతా నిద్రపోయిన తర్వాత.. బాలిక నోట్లో గుడ్డలు కుక్కి.. బాబాయ్ అత్యాచారానికి పాల్పడేవాడని ఆ బాలిక పోలీసులకు రాసిన ఫిర్యాదులో వెల్లడించింది. వరుసకు బాబాయ్ అయిన వ్యక్తి.. అంతటి దారుణానికి ఒడిగట్టాడని బాధితురాలు వాపోయింది. పోలీసులకు బాధితురాలు రాసిచ్చిన ఫిర్యాదులో ఉన్న అంశాలను చూస్తుంటే.. కన్నీరు తెప్పిస్తోంది.

పలుమార్లు బాలికపై అత్యాచారానికి పాల్పడిన నిందితుడు.. ఈ ఘటన గురించి ఎవరికైనా చెబితే చంపేస్తానని బెదిరింపులకు దిగినట్లు బాధితురాలు పోలీసులకు ఇచ్చిన ఫిర్యాదులో వెల్లడించింది. ప్రస్తుతం ఆ బాలిక 3 నెలల గర్భవతి అని వైద్యులు గుర్తించారు. దీంతో ఆ బాలిక బాబాయ్‌పై భారతీయ న్యాయ సంహిత (బీఎన్ఎస్) 64(2)(ఆర్), 65(1), సెక్షన్ 6 పోక్సో చట్టం కింద నున్న పోలీసులు కేసు నమోదు చేశారు. ఈ ఘటనతో ఆ ప్రాంతంలో తీవ్ర కలకలం రేపుతోంది.