పండుగ వేళ ప్రభుత్వోదోగ్యులకు సర్కారు గుడ్‌న్యూస్.. డీఏ పెంపుకు ఆమోదం

ప్రధాన మంత్రి నరేంద్ర మోదీ నేతృత్వంలోని కేంద్ర ప్రభుత్వం పండుగ సీజన్ ప్రారంభమవుతున్న సందర్భంగా కేంద్ర ప్రభుత్వ ఉద్యోగులు, పెన్షనర్లకు శుభవార్త చెప్పబోతుంది. నేడే ప్రధాని అధ్యక్షతన జరిగే కేంద్ర మంత్రివర్గ సమావేశంలో డియర్‌నెస్ అలవెన్స్, కరవు భత్యాన్ని సవరించడంపై (పెంచడంపై) కీలక నిర్ణయం తీసుకున్నట్లు కేంద్రమంత్రి అశ్వినీ వైష్ణవ్ తెలిపారు. మంగళవారం రోజే దీనికి మంత్రివర్గం ఆమోద ముద్ర వేసిందని చెప్పారు. సవరించిన ఈ డీఏ పెంపు జులై 1 నుంచే అమలులోకి వస్తుంది. ఈ ప్రభుత్వ నిర్ణయం దేశవ్యాప్తంగా దాదాపు కోటి మంది కేంద్ర ప్రభుత్వ ఉద్యోగులు మరియు పెన్షనర్లకు ఆర్థికంగా పెద్ద ఉపశమనం అందించనుంది.

డీఏ పెంపు ప్రాతిపదిక, విధానం

కేంద్ర ప్రభుత్వం సాధారణంగా ఏటా రెండుసార్లు ఉద్యోగుల డీఏను పెంచుతుంది. ఈ పెంపు జనవరి, జూలై నెలల్లో జరగాల్సి ఉన్నప్పటికీ.. ప్రభుత్వ మాత్రం ఏటా మార్చి, అక్టోబర్ నెలల్లో ప్రకటిస్తూ వస్తోంది. ఈసారి ఈ ప్రకటన కాస్త ఆలస్యమైనప్పటికీ.. పెంపు మాత్రం బకాయిలతో కలిపి జనవరి, జులై నుంచే చెల్లిస్తారు. ముఖ్యంగా డీఏ సవరణ కోసం ప్రభుత్వం పారిశ్రామిక కార్మికుల కోసం ఉన్న అఖిల భారత వినియోగదారుల ధరల సూచిక డేటాను ప్రాతిపదికగా తీసుకుంటుంది. ఈ సూచికే దేశంలో నెలకొన్న ద్రవ్యోల్బణాన్ని అంచనా వేస్తుంది.

ఈ ఏడాది మార్చిలో ప్రభుత్వం డీఏను 2 శాతం పెంచింది. ఈ పెంపుతో డియర్‌నెస్ అలవెన్స్ రేటు 53 శాతం నుంచి 55 శాతానికి చేరుకుంది. ఇప్పుడు తాజాగా 3 శాతం పెంచడంతో 58 శాతానికి చేరుకుంది. అయితే అంతా ఊహించినట్లు, గత ఏడాది అక్టోబర్‌లో పెంచినట్లుగానే 3 ఈసారి కూడా శాతం పెంచారు.

కేంద్ర ప్రభుత్వం తన ఉద్యోగులకు డీఏను పెంచిన తర్వాత దాదాపు అదే స్థాయిలో రాష్ట్ర ప్రభుత్వాలు కూడా తమ ఉద్యోగులకు, పెన్షనర్లకు కరవు భత్యాన్ని పెంచేందుకు నిర్ణయం తీసుకునే అవకాశం ఉంటుంది. ఈ విధంగా కేంద్రం తీసుకునే ప్రతి నిర్ణయం, రాష్ట్ర ప్రభుత్వాల ఆర్థిక ప్రణాళికలు, కోట్లాది రాష్ట్ర ఉద్యోగుల జీతాలపైనా ప్రభావం చూపుతుంది. నేటి కేబినెట్ నిర్ణయంతో దాదాపు కోటి మందికి పైగా కేంద్ర ప్రభుత్వ ఉద్యోగులు మరియు పెన్షనర్లకు పండగ వాతావరణం మరింత ఆనందదాయకంగా మారుతుందని చెప్పవచ్చు.