మెడిసిన్‌పై అమెరికా 100 శాతం టారిఫ్‌ల వేళ డ్రాగన్ సున్నా శాతమే

భారతదేశ ఔషధ రంగానికి.. అమెరికా అధ్యక్షుడు డొనాల్డ్ ట్రంప్ భారీ దెబ్బ కొట్టిన నేపథ్యంలో.. చైనా గుడ్‌న్యూస్ చెప్పింది. భారతీయ ఔషధాల దిగుమతి సుంకాన్ని 30 శాతం నుంచి సున్నాకు తగ్గిస్తున్నట్లు తాజాగా చైనా ప్రభుత్వం ప్రకటించడం భారత ఔషధ రంగానికి భారీ ఊరటను కల్పించింది. ఈ చారిత్రక నిర్ణయం ద్వారా భారతీయ ఔషధ తయారీ సంస్థలు ఎలాంటి సుంకాలు లేకుండా ప్రపంచంలోనే రెండో అతిపెద్ద ఫార్మా మార్కెట్ అయిన చైనాకు తమ ఉత్పత్తులను ఎగుమతి చేసే అవకాశం లభించింది. ఇది భారత్‌కు బిలియన్ల డాలర్ల ఆదాయాన్ని తెచ్చే అవకాశాలు ఉన్నాయి.

అత్యంత కీలక సమయంలో ఈ నిర్ణయం రావడం విశేషం. ఎందుకంటే అమెరికా అధ్యక్షుడు డొనాల్డ్ ట్రంప్ ఇటీవలే ఫార్మా దిగుమతులపై 100 శాతం సుంకాలను ప్రకటించిన సంగతి తెలిసిందే. ట్రంప్ తీసుకున్న ఈ నిర్ణయంతో 25 బిలియన్ డాలర్ల కంటే ఎక్కువ విలువైన భారతదేశ ఔషధ ఎగుమతి పరిశ్రమను దెబ్బతీసే అవకాశాలు ఉన్నాయని నిపుణులు హెచ్చరించిన నేపథ్యంలో చైనా భారీ ఊరటను కల్పించింది.

భారత ఫార్మా రంగానికి అమెరికా మార్కెట్ కఠినతరం అవుతున్న వేళ.. చైనా తన నిర్ణయం వెలువరించడం ద్వారా భారత ఎగుమతిదారులకు భారీ అవకాశాలు కల్పించినట్లయింది. చైనాలోని జనాభా, వేగంగా పెరుగుతున్న ఆరోగ్య సంరక్షణ డిమాండ్‌ను అందుకోవడానికి భారత ఫార్మా ఇండస్ట్రీకి ఒక భారీ అవకాశం కల్పించినట్లయింది.

భారతదేశాన్ని తరచుగా ప్రపంచపు ఫార్మసీ అని పిలుస్తారు. ఇది ప్రపంచవ్యాప్తంగా సరసమైన ధరలకు జనరిక్ ఔషధాలు, టీకాలును సరఫరాలో అగ్రగామిగా నిలుస్తోంది. అయితే చైనాలో ఉన్న అధిక దిగుమతి సుంకాల కారణంగా.. ఇంతకాలం ఆ దేశ మార్కెట్‌లోకి భారత్ ప్రవేశించకుండా అడ్డుకుంది. సుంకం తొలగించడంతో.. భారతీయ కంపెనీలు చైనాలో ధర, నాణ్యత విషయంలో పోటీపడగలుగుతాయని నిపుణులు అభిప్రాయం వ్యక్తం చేస్తున్నారు. తాజా పరిణామం.. ప్రపంచంలోని రెండో అతిపెద్ద ఔషధ మార్కెట్‌ అయిన చైనాలో భారత్ తన ఉనికిని గణనీయంగా విస్తరించడానికి సహాయం చేయనుంది.

ఫార్మా పరిశ్రమ నిపుణుల అభిప్రాయం ప్రకారం.. ఈ నిర్ణయం చైనాకు అనుకూలంగా ఉన్న భారత్-చైనా వాణిజ్య సమతుల్యతను సరిచేయగలదని పేర్కొంటున్నారు. ఇది దేశంలో వేలాది కొత్త ఉద్యోగాలను, తయారీ సామర్థ్యాన్ని పెంచుతుందని పేర్కొంటున్నారు. ప్రపంచ ఆరోగ్య సంరక్షణ సరఫరా గొలుసులో భారతదేశ పాత్రను మరింత బలోపేతం చేస్తుంది.