విజయవాడకు ఎన్ని పేర్లు ఉన్నాయంటే.. మీకెన్ని తెలుసు?

ఆంధ్రప్రదేశ్ చరిత్రలో విజయవాడ కు ప్రత్యేక స్థానం ఉంది. శాతవాహన కాలం నుంచి పలు శాసనాల్లో విజయవాడ ప్రస్తావన ఉంది. ఇక కాలాలు మారే కొద్దీ విజయవాడ పేర్లు కూడా మారుతూ వచ్చాయి. ఆ రకంగా విజయవాడకు అనేక పేర్లు వచ్చాయి. మనకు తెలిసినంత వరకూ విజయవాడకు బెజవాడ అనే పేరు మాత్రమే పరిచయం. కానీ మనకు తెలియని పేర్లు ఎన్నో. అలాంటి పేర్లను పేర్కొంటూ ఓ వ్యక్తి చేసిన ట్వీట్ ప్రస్తుతం సోషల్ మీడియాలో వైరల్ అవుతోంది. ఇక విజయవాడకు ఉన్న వివిధ పేర్లు, ఆ పేర్ల వెనుక నేపథ్యం వంటి విషయాల సంగతికి వస్తే..

విజయవాడకు ఉన్న మరో పేరు బెజవాడ. ఈ పేరు పండరంగడు వేయించిన అద్దంకి శాసనంలో కనిపిస్తుంది. కందుకూరున్బెజవాడ గావించె మెచ్చి అంటూ ఆ శాసనంలో బెజవాడ ప్రస్తావన ఉంది. అలాగే యుద్ధమల్లుడు వేయించిన శాసనంలోనూ బెజవాడ పేరు ప్రస్తావన ఉంది. అలాగే విజయవాడకు పెచ్చవాడ అనే పేరు కూడా ఉంది. మల్వేశ్వర స్వామి ఆలయానికి సంబంధించి త్రికోటిబోయడు వేయించిన శాసనాల్లో పెచ్చవాడ అని ప్రస్తావించారు. అలాగే విజయవాటీపురం అని కూడా పలు శాసనాల్లో ప్రస్తావించారు. అలాగే బెజవాడ కండ్రవాడ అని క్రీ. శ. 12వ శతాబ్దానికి చెందిన ఓ శాసనంలోనూ వ్యవహరించారు. అలాగే అర్జునస్యపుర్యాం అంటూ త్యాగివంశీయుడైన పోతరాజు ఓ శాసనంలో ప్రకటించారు.

ఇక తొలిసారిగా విజయవాడ అనే పేరు ముప్పల మహాదేవి కరణం కేతరాజు వేయించిన శాసనంలో కనిపిస్తుంది. ఇక కనకదుర్గమ్మ అమ్మవారు కొలువైన ప్రాంతం కావటంతో కనకప్రభ, కనకపురం, కనకవాడ అనే పేర్లతో కూడా పిలిచేవారు. అలాగే బీజపురం, జయపురి, విజయపురి, బీజపురి , బీజవాటిక, బెజ్జంవాడ, అర్జునపురి, చోళరాజేంద్రపురం, ఆంగ్లేయుల కాలంలో బ్లేజ్‌వాడగా కూడా పేర్కొన్నారు.

అలాగే విజయవాటిక, వెజభదర, విజయకందరపురం, బెజప్రోలు వంటి పేర్లు కూడా ఉన్నాయంటూ సోషల్ మీడియాలో పోస్ట్ వైరల్ అవుతోంది. మొత్తానికి వివిధ కాలాల్లో వివిధ పేర్లతో పిలుస్తూ వచ్చిన బెజవాడ చివరాఖరికి విజయవాడ స్థిరపడింది. ఆ పేరుతోనే ప్రసిద్ధి చెందింది. ఇంద్రకీలాద్రిపై కొలువైన కనకదుర్గమ్మ పాదాల చెంత ఉన్న విజయవాడ.. వివిధ పేర్లతో అలా భాసిల్లుతోంది.