కరూర్ తొక్కిసలాట బాధిత కుటుంబాలకు ఓదార్పు.. విజయ్ వీడియో కాల్

కరూర్ తొక్కిసలాట బాధిత కుటుంబాలకు టీవీకే చీఫ్ , నటుడు విజయ్ వీడియో కాల్ చేసి, వారిని ఓదార్చారు. కరూర్‌లో విజయ్ నిర్వహించిన ర్యాలీలో తొక్కిసలాట చోటుచేసుకుని, 41 మంది ప్రాణాలు కోల్పోయిన సంగతి తెలిసిందే. ఈ ఘటనలో చనిపోయినవారి కుటుంబాలకు ఫోన్ చేసి మాట్లాడిన విజయ్. త్వరలో తాను ప్రత్యక్షంగా కలుస్తానని వారికి హామీ ఇచ్చారు. సెప్టెంబరు 27న విజయ్‌ ర్యాలీలో జరిగిన తొక్కిసలాట యావత్తు దేశాన్ని తీవ్ర దిగ్భ్రాంతికి గురిచేసింది. ఈ ఘటనపై కేసు నమోదుచేసిన తమిళనాడు పోలీసులు.. కొంత మంది టీవీకే నాయకులను అరెస్టు చేశారు.

తమిళ వెట్రి కళగం అధినేత విజయ్ తమతో మాట్లాడినట్టు తొక్కిసలాట ఘటనలో భార్య ప్రియదర్శిని (35), కుమార్తె ధరణిక (14)లను కోల్పోయిన ఈమూర్ పుడూర్‌కు చెందిన కె. శక్తివేల్ ఫ్యామిలీ వెల్లడించింది. ‘‘ఈ నష్టం పూడ్చలేనిదని విజయ్ అన్నారు.. తీవ్ర విచారాన్ని వ్యక్తం చేశారు. త్వరలో మమ్మల్ని కలుస్తానని ఆయన నాకు చెప్పారు’ అని శక్తివేల్ అన్నారు. ‘దాదాపు రెండు నిమిషాలు మాట్లాడారు.. వ్యక్తిగతంగా నేను కలుస్తాను అన్నారు... ఏవైనా అవసరాలు ఉంటే పార్టీ కార్యకర్తలు ద్వారా తెలియజేయాలని నాకు చెప్పారు’’ అని ఆయన తెలిపారు.

కాగా, తొక్కిసలాటపై స్వతంత్ర దర్యాప్తు కోరుతూ టీవీకే వేసిన పిటిషన్‌ను మద్రాసు హైకోర్టు తొలుత వ్యతిరేకించింది. కానీ, తర్వాత కరూర్ తొక్కిసలాటపై సిట్‌ దర్యాప్తునకు ఆదేశించింది. ఇదే సమయంలో ఘటన జరిగిన వెంటనే అక్కడ నుంచి విజయ్ వెళ్లిపోవడం, టీవీకే నాయకులు ఎటువంటి సహాయక చర్యలు చేపట్టకపోవడంపై హైకోర్టు తీవ్రంగా ఆక్షేపించింది. ఇదిలా ఉండగా, బహిరంగ సభలు, ర్యాలీలపై ప్రామాణిక నిర్వహణ విధాన నిబంధనలు రూపొందించేవరకు ఏ రాజకీయ పార్టీలకు పోలీసులు అనుమతివ్వరని డీఎంకే ప్రభుత్వం స్పష్టం చేసింది.

అంతేకాదు, పార్టీ తరఫున ప్రకటించిన ఆర్థిక సాయం త్వరలోనే అందజేయనున్నట్టు టీవీకే నేతలు తనకు తెలియజేశారని శక్తివేల్ అన్నారు. ఇక, తొక్కిసలాట ప్రాణాలు కోల్పోయిన సెంథిమంగళం ఈస్ట్‌కు చెందిన బృంద (22) భర్త సుధాన్ కుటుంబంతోనే విజయ్ మాట్లాడారు. బాధపడొద్దని, త్వరలోనే తాను వచ్చి కలుస్తానని విజయ్ చెప్పినట్టు సుధాన్ వెల్లడించారు.