మాయావతి బంగ్లా కావాలన్న కేజ్రీవాల్‌కు మరో బంగ్లా కేటాయింపు

దేశరాజధాని ఢిల్లీ మాజీ ముఖ్యమంత్రి, ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్‌కు ఎట్టకేలకు అధికారిక బంగ్లా లభించింది. ముఖ్యమంత్రి పదవికి రాజీనామా చేసి.. అధికారిక నివాసాన్ని ఖాళీ చేసిన దాదాపు ఏదాడి తర్వాత కేంద్ర ప్రభుత్వం ఆయనకు ఈ బంగ్లాను కేటాయించింది. అది కూడా కోర్టు జోక్యం చేసుకోవడం వల్లే ఇంత త్వరగా నివాసాన్ని ఇచ్చింది.

దేశరాజధాని ఢిల్లీలోని లోధి ఎస్టేట్‌లోని టైప్-7 బంగ్లాను కేంద్ర ప్రభుత్వం.. మాజీ సీఎం అరవింద్ కేజ్రీవాల్‌కు కేటాయించింది. అయితే గతంలో ఆమ్ ఆద్మీ పార్టీ.. అరవింద్ కేజ్రీవాల్‌కు బహుజన్ సమాజ్ పార్టీ (బీఎస్పీ) అధినేత్రి మాయావతి గతంలో నివసించిన బంగ్లాను కేటాయించాలని కేంద్ర ప్రభుత్వాన్ని కోరింది. లోధి ఎస్టేట్‌లోని ఆ బంగ్లాలో ప్రముఖులు ఉండడం, కొంత చరిత్ర కల్గి ఉండడంతో ఆప్ దానిపై దృష్టి పెట్టింది. కానీ ఆప్ అభ్యర్థనను కేంద్ర ప్రభుత్వం నెరవేర్చలేదు. మాయావతి గతంలో నివసించిన ఆ బంగ్లాను జూన్ నెలలోనే.. కేంద్ర ఆర్థిక శాఖ సహాయ మంత్రి పంకజ్ చౌదరికి కేటాయించారు. దీంతో కేంద్ర ప్రభుత్వం అరవింద్ కేజ్రీవాల్‌కు వేరే టైప్-7 బంగ్లాను కేటాయించింది.

అరవింద్ కేజ్రీవాల్ 2024 అక్టోబర్‌లో ఢిల్లీ ముఖ్యమంత్రి పదవి నుంచి వైదొలిగారు. ఆ వెంటనే ఫ్లాగ్‌స్టాఫ్ రోడ్‌లో ఉన్న ముఖ్యమంత్రి అధికారిక నివాసాన్ని కూడా ఖాళీ చేశారు. ఆ తర్వాత నుంచి ఆయన మండి హౌస్ సమీపంలో నివాసం ఉంటున్న మరో ఆప్ సభ్యుడి అధికారిక నివాసంలోనే ఉంటున్నారు. అయితే నెలలు గడుస్తున్నా.. తనకు అధికారిక బంగ్లా కేటాయింపు జరగకపోవడంపై అరవింద్ కేజ్రీవాల్ అసంతృప్తి వ్యక్తం చేశారు. ఈ క్రమంలోనే తనకు ప్రభుత్వ నివాసం కేటాయించాలని కోరుతూ ఆయన ఢిల్లీ హైకోర్టును ఆశ్రయించారు. విచారణ జరిపిన న్యాయస్థానం.. పదే పది రోజుల్లో అరవింద్ కేజ్రీవాల్‌కు అధికారిక నివాసం కేటాయించాలని ఆదేశాలు జారీ చేసింది. ఈనేపథ్యంలోనే తాజాగా సర్కారు ఆయనకు లోధి టైప్-7 బంగ్లాను కేటాయించింది.

ముఖ్యమంత్రి పదవి నుంచి వైదొలగిన తర్వాత కూడా మాజీ ముఖ్యమంత్రి హోదాలో కేజ్రీవాల్‌కు సెక్యూరిటీ, ఇతర ప్రోటోకాల్స్ దృష్ట్యా తగిన అధికారిక నివాసం కేటాయించడం ప్రభుత్వ బాధ్యత. అయితే నివాసం కేటాయింపులో జరిగిన ఈ జాప్యం.. అలాగే ఆయన కోరిన బంగ్లాను వేరే నాయకుడికి కేటాయించడం రాజకీయ వర్గాల్లో చర్చనీయాంశంగా మారింది. ఏదేమైనా కోర్టు జోక్యంతో కేజ్రీవాల్‌కు ఢిల్లీలో ప్రభుత్వ నివాసం లభించింది.