పొరపాటున ఉద్యోగి ఖాతాలోకి 300 రెట్లు అధిక జీతం

ఎవరికైనా పొరపాటున పడాల్సిన దానికంటే ఎక్కువ జీతం పడితే ముందు షాక్ అవుతారు. ఆ తర్వాత ఏం జరిగిందో తెలుసుకుని వెనక్కి ఇచ్చేస్తారు. అయితే ఓ నెలకు బదులుగా రెండు మూడు నెలలో, 20, 30 వేలో అధికంగా పడడం మనం ఇప్పటి వరకు చూశాం. కానీ చిలీకి చెందిన ఉద్యోగికి మాత్రం ఎవరూ ఊహించని విధగా ఏకంగా 300 రెట్లు ఎక్కువ మొత్తంలో జీతం పడింది. అయితే విషయం గుర్తించిన సదరు కంపెనీ డబ్బు గురించి అతడిని అడగ్గా.. మొదట్లో తిరిగిచ్చేస్తానని చెప్పాడు. కానీ ఆ పని చేయడానికి ముందే ఉద్యోగానికి రాజీనామా చేశాడు. డబ్బును ఇవ్వనంటూ తేల్చి చెప్పాడు. దీంతో కంపెనీ న్యాయపోరాటానికి దిగగా.. ఉద్యోగే ఇక్కడ గెలిచి అందరినీ ఆశ్చర్యానికి గురి చేశాడు.

అసలేం జరిగిందంటే?

చిలీలోని 'డాన్ కన్సార్సియో ఇండస్ట్రియల్ డి అలిమెంటోస్ డి చిలీ' అనే కంపెనీలో అసిస్టెంట్‌గా పని చేసే ఓ వ్యక్తికి నెలవారీ జీతం సుమారు 386 పౌండ్లు (భారత కరెన్సీలో సుమారు రూ.40 వేలకు పైగా) ఉండేది. కానీ 2022 మే నెలలో ఎవరూ ఊహించని విధంగా సంస్థ పొరపాటున అతని ఖాతాలోకి 1,27,000 పౌండ్లను (భారత కరెన్సీలో సుమారు రూ.1.3 కోట్లకు పైగా) బదిలీ చేసింది. అయితే కంపెనీ ప్రతినిధులు వెంటనే ఈ భారీ పొరపాటును గుర్తించి.. డబ్బును తిరిగివ్వమని ఉద్యోగిని అడిగారు. దీనికి అతడు కూడా మొదట్లో ఓకే చెప్పాడు. డబ్బు కచ్చితంగా ఇస్తానని హామీ ఇచ్చాడు. కానీ ఆ తర్వాత మూడు రోజులకే మనసు మార్చుకున్న అతడు.. తన ఉద్యోగానికి రాజీనామా చేశాడు. డబ్బులు కూడా ఇవ్వనంటూ ముఖం చాచేశాడు.

దీంతో ఏం చేయాలో పాలుపోని కంపెనీ.. అతడిపై చట్టపరమైన చర్యలు తీసుకుంది. ఆ ఉద్యోగిపై దొంగతనం ఆరోపణలు మోపి మూడేళ్లు న్యాయ పోరాటం చేసింది. అయితే శాంటియాగోలోని కోర్టు ఈ కేసుపై లోతుగా విచారణ జరిపి ఉద్యోగికి అనుకూలంగా సంచలన తీర్పు ఇచ్చింది. ముఖ్యంగా ఉద్యోగి చేసింది దొంగతనం కాదని.. కేవలం అనధికారిక సేకరణ మాత్రమేనని తేల్చి చెప్పింది. ఈ చట్టపరమైన తేడా కారణంగా ఈ కేసును కావాలని చేసిన నేరంగా పరిగణించలేదు. ఆ డబ్బును అతడు వాడుకోవచ్చని కూడా వివరించింది.

అయితే కోర్టు తీర్పు తమకు ఏమాత్రం ఆమోదయోగ్యం కాదని, ఆ డబ్బును తిరిగి రప్పించుకోవడానికి ప్రతి చట్టపరమైన మార్గాన్ని అనుసరిస్తామని కంపెనీ ప్రకటించింది. డియారియో ఫైనాన్సియెరోకిచ్చిన ప్రకటనలో.. ఈ తీర్పును రద్దు చేయడానికి, దానిని సమీక్షించడానికి తాము సాధ్యమైన అన్ని న్యాయపరమైన చర్యలను తీసుకుంటామని సంస్థ ప్రతినిధులు స్పష్టం చేశారు. చూడాలి మరి మున్ముందు ఏం జరగనుంది అనేది.