రాజీనామా చేసిన 4 రోజులకు.. మళ్లీ లెకార్నుకే ప్రధాని పీఠం

ఫ్రాన్స్ అధ్యక్షుడు ఇమ్మాన్యుయెల్ మెక్రాన్ ఎవరూ ఊహించని ఓ షాకింగ్ నిర్ణయం తీసుకున్నారు. ముఖ్యంగా నాలుగు రోజుల క్రితమే ప్రధాన మంత్రి పదవికి రాజీనామా చేసిన సెబాస్టియన్ లెకార్నును.. మళ్లీ అదే పదవిలో నియమించారు. పొదుపు చర్యలతో కూడిన బడ్జెట్‌పై నెలల తరబడి కొనసాగుతున్న రాజకీయ స్తంభనను అంతం చేయడానికి, ప్రభుత్వంలో ఒక కొత్త వ్యక్తిని చూడాలని మిత్రపక్షాలు, ప్రతిపక్షాలు ఇద్దరూ ఆశించినప్పటికీ.. అందరి ఆశలకు భిన్నంగా మెక్రాన్ 39 ఏళ్ల లెకార్నునే తిరిగి నియమించడం గమనార్హం. ఈ విషయాన్ని ఫ్రాన్స్ అధ్యక్ష భవనం ఎక్స్ వేదికగా తెలిపిది. రిపబ్లిక్ అధ్యక్షుడు సెబాస్టియన్ లెకార్నును ప్రధాన మంత్రిగా నామినేట్ చేసి.. ప్రభుత్వాన్ని ఏర్పాటు చేసే బాధ్యతను అప్పగించారని పేర్కొంది.

గతేడాది మెక్రాన్ తీసుకున్న ఒక సాహసోపేతమైన నిర్ణయం ఈ రాజకీయ చిక్కుముడికి కారణమైంది. అధికారంలో పట్టు సాధించవచ్చనే ఆశతో ఆయన ముందస్తు ఎన్నికలకు వెళ్లారు. అయితే ఆ ఎన్నికలు ఆశించిన ఫలితాలను ఇవ్వకపోగా.. పార్లమెంట్‌లో ఏ పార్టీకి స్పష్టమైన మెజారిటీ రాలేదు. అంతేకాక తీవ్రవాద కుడిపక్షానికి (ఫార్-రైట్) మరిన్ని స్థానాలు లభించాయి. దీంతో ఫ్రాన్స్ రాజకీయ సంక్షోభంలో కూరుకుపోయింది.

ఫ్రాన్స్ అధ్యక్ష భవనం ప్రకటన తర్వాత లెకార్ను తన ఎక్స్ ఖాతాలో స్పందిస్తూ.. దీన్ని తాను అంగీకరించానని పేర్కొన్నారు. మనం ఈ రాజకీయ సంక్షోభాన్ని ముగించాలని కూడా ఆయన పిలుపునిచ్చారు. ఈ ఏడాది చివరి నాటికి ఫ్రాన్స్‌కు బడ్జెట్‌ను అందించడానికి తాను సాధ్యమైన కృషి చేస్తానని ప్రతిజ్ఞ చేశారు. అలాగే ప్రజా ఆర్థిక వ్యవస్థను పునరుద్ధరించడం మన భవిష్యత్తుకు మూలం అని చెప్పారు. మరోవైపు ఈ నిర్ణయంపై ప్రతిపక్షాలు తీవ్ర ఆగ్రహం వ్యక్తం చేస్తున్నాయి. లెకార్నును తిరిగి నియమించడాన్ని ప్రతిపక్షాలు తీవ్రంగా వ్యతిరేకిస్తున్నాయి. వామపక్ష నాయకుడు ఒకరు లెకార్ను తిరిగి రావడం "ఫ్రెంచ్ ప్రజలకు చేసిన అవమానం" అని ఆగ్రహం వ్యక్తం చేశారు.

లెకార్ను షరతులు

మెక్రాన్ పట్ల విశ్వాసపాత్రుడైన లెకార్ను.. ఇంతకు ముందు రక్షణ మంత్రిగా పనిచేశారు. రాజీనామా చేసిన తర్వాత కూడా ఆయన అన్ని రాజకీయ పార్టీలతో మాట్లాడటానికి రెండు రోజులు అదనంగా పదవిలో కొనసాగారు. 2026 ముసాయిదా బడ్జెట్‌ను సోమవారం నాటికి ముందుకు తీసుకు రావచ్చని.. తద్వారా ఏడాది చివరి నాటికి దాని ఆమోద గడువును చేరుకోవచ్చని ఆయన బుధవారం ఫ్రెంచ్ టెలివిజన్‌కు తెలిపారు. అలాగే తన ప్రభుత్వంలో చేరాలనుకునే వారందరూ 2027 ఎన్నికల కోసం తమ అధ్యక్ష ఆశయాలను పక్కన పెట్టడానికి కట్టుబడి ఉండాలిని చెప్పారు. గత ఆదివారం లెకార్ను సూచించిన మంత్రుల జాబితా గతంతో సంబంధాలను తెంచలేదని విమర్శలు ఎదురవడంతో.. ఆయన బుధవారం తన మంత్రి వర్గంలో టెక్నోక్రాట్‌లను చేర్చాలని సూచించారు.